Jööp 13 - Wëël Jwøk

¹ «Ka adïëri møn, gïïögø bëët ajooda ki waŋa, ni wïnynya ge ki ïtha, ni kwanya tietge,

² ni gïna näk ŋäyu, ŋääa thuwø; aani, kara ba en piny ki uuni.

³ 'Ba gïna manynya beeye ki man cääna ki Jwøk na en teeki jïre, naa pëënynya luup 'moa ki gø.

⁴ 'Ba uuni, adïëri aummu ki luup tööt; uuni bëët, u caala akïïme mo bäŋ gïn kønyge.

⁵ ?Aŋø ni ba bëëdu nou lïŋö jaak en? Køøre doo tïmö na leec wïc jïïu.

⁶ Ennø, beerra man wïnynyu luubö mara, ni cegu ïdhi mou ki cäänö mara man ni ö wøk ki dhaa en.

⁷ ?Aŋø, u cäänö ki luup mo patha adïëri ki nyeŋ Jwøk? ?Aŋø, u wääö ki luup cwøk ki nyeŋ Jwøk?

⁸ ?Aŋø, ki baŋu, u ena kur Jwøk? ?Aŋø, løny ki man pïëmu kiper Jwøk?

⁹ ?Aŋø, ni näk mo eni u di tetø, tïmö na gïn mo beer kiperu? ?Aŋø, løny ki man cøøgu Jwøk kaawat man wø cøøgu dhaanhø?

¹⁰ Ka adïëri møn, eni u di jooø kanyo tïïu ka ajeeny ki piny.

¹¹ ?Aŋø, u ba lwäär ki dööŋö mar Jwøk? ?Aŋø, dëëtu ba tïmö ni kwanynyi ki eni?

¹² Luupu ni wø caru kaamar leere bëëdö kaamar bur, ni caala kwör gwøk røk mo tïïc ko odhöönh.

¹³ «Lïŋu nø mø, naa läwa cäännö; nee da gïn mo manynya ö bääta, wär ööe.

¹⁴ ?Aperŋø ni cïba dëëra cer gïn mo leth en, naa weta jwïëy 'moa?

¹⁵ 'Ba këël maa nääe nääö, a poot bëëdö naa ŋäätha eni; 'ba ka adïëri møn, luup 'moa poot caana caanø nyïme.

¹⁶ Kanymør gïnögø løny ki man piem aani, kiper ba løny jï ŋat raay ki man cuŋŋe nyïm Jwøk.

¹⁷ Cegu ïthu døøc ki luup 'moa; beerra man ö ïdhi mou ni leŋge luup 'moa.

¹⁸ Ennø, raa yaa nø jiiŋŋø ki luup 'moa, ni ŋääa naa di ŋunnö ni mara beer.

¹⁹ ?Aŋø, da ŋat mo maar lønyø jïre ki man pïëme ki aani? 'Ba ni näk mo dagø, a lïŋö naa puta thøø.

²⁰ «Wui Jwøk! Gïï na ariiø ii wär tïïyï kipera, kiper nee dëëra ba kana ki ïïni.

²¹ Daak cerï bääta, ni ba wëëgï aani bwøk ki køør mana lwäära ki ïïni.

²² Køøre nø, beerra man cwølï aani, naa duunna jïrï, wala wëëk a cäänö, niï duunnï jïra.

²³ ?Aŋø, gïïa tïïa na reyø ki raay moa tïïa, ge nyïëdi røk? Nyuth a gïïa baaa ki raay moa tïïa.

²⁴ ?Aŋø ni kanï täärnyïmï ki aani en, naa iï kwaanø na nyimän marï?

²⁵ ?Aŋø ni wëëgï aani kïmmö en, a ni caal bøøŋ jaath mo okwør jame? ?Aŋø ni rïïŋï køøra, a ni caal lethø jaak en?

²⁶ Kiper ïïna gööt piny bääta ki jammi mo teek, niï dwøga raay 'moa wïïa moa tïïa naa poot thiinh.

²⁷ Tieta akïthï yïth orøge, ni koorï uutjïëthe 'moa bëët mo wø caadha, niï neeta kwör cääthe mo tieta.

²⁸ «Kiper manøgønø, dëër dhaanhø ränynyö kaamar gïn mo okwäk, ni caala abïï mo ocam alweela.»