Jööp 11 - Wëël Jwøk

Luubö Mana Løk Cöparri

¹ Køøre aløk Cöparri nyï Nayma ni kööe,

² «?Aŋø, luup mo thööth di carø jaak ni ba dwøgi? ?Aŋø, ki man cäänö ki luup mo thööth, luup dhaanhø døøye mo beyø?

³ ?Aŋø, luup moï na näk bäŋ tietge, jiy wëëge lïŋŋö? ?Aŋø, bäŋ dhaanhø mo jooga ïïni kany wø näk miï tïïö ka abuua?

⁴ Kiper ïïna köö, na ‹A cara gïï ma adïëri, ni bëëtö mara beer ki nyïm Jwøk.›

⁵ Wui, doo beer na di Jwøki cäännö, ni jap dhee ni jääl ïïni,

⁶ ni nyooth leec wïc jïrï mana näk tiere okanø; kiper leec wïc mana näk adïëri di joodø ki uutjïëthe ma teeŋi. 'Ba gïn wär ŋäyï: Jwøk ïïna jääle ka ajäla mo thiinhnha eni ki mana diï joodø.

⁷ «?Aŋø, jap Jwøk moa näk tietge okanø løny ki man ŋäyï ge? ?Aŋø, eni na Jwøk na en teeki jïre, løny ki man ŋäyï tiet japa tïïe ki leec wïïe këël aŋuunne?

⁸ Kiper gena gïï mo ena maal døc mo kwörge bäyö ni kaala jap maal. ?Aŋø, agïnaŋø ni løny ki tïïc jïrï? Geni, gena gïï mo ena piny kuya døc ni kaala kar bëët jwïëc jøøa no othøw. ?Aŋø, løny ki man ŋäyï ge?

⁹ Bär mar rumi marge kaala ŋøøm, ni ö dööŋ-eci marge ni kaal naama dwøŋ.

¹⁰ «?Aŋø, ni näk mo Jwøk öö ni leeŋ ïïni øt twöc, ni ŋun bäätï ki luubö, aŋa noo män gø?

¹¹ Kiper eni jø cwøk wø ŋääe ŋääö, ni kany wø joot gïn mo raac, ba wiie jaak ni bäŋ gïn caare kiper gø.

¹² Ki man ö ŋat mo wïïe bäŋ acaara ni lëëny wïïe, jööta eni jï arëën-paap ki man lwaare ki dhaanhø.

¹³ «Ni näk mo cwïnyï iï wëëk Jwøk, ni thaaŋï ceŋŋï jïre,

¹⁴ ni ö raayï moa en cerï ni leeŋï ge wøk, ni bäŋe raay mo jïëyï ki man duny kar bëëtö marï,

¹⁵ ïïni, ïïno bëëdö ni wïïï iï tïŋ maal ni bäŋ laac wïc, ni cuŋŋï niï teek ni bäŋ lwär.

¹⁶ Ka adïëri møn, wïïï 'owïl ki gïna leth na jwørï, ni kwaanï gø kaamar pïï ni wø kwönni ni puta pöödhö.

¹⁷ Bëët kwøw marï orieny ni kaala dhöör-cäŋ, ni ö muudhö marï ni tïme kaamar amöölla.

¹⁸ Ïïno bëëdö niï cuŋŋa ra adïëri kiper ŋäädhe dagø, ni lwïthï deŋŋï ni jwömï riï ni bäŋ gïn lääŋŋï.

¹⁹ Dëërï onyaaŋŋï piny ni bäŋ ŋat mo wëëga ïïni lwär, ni ö jiy mo thööth ni pëënyge køny marï.

²⁰ 'Ba jøøa reyø nyeŋge otal jöö, ni tïme ni bäŋ kany päärge wøk ki yie; ni put tïmö ni ge ŋäätha thøø keere.»