Jööp 10 - Wëël Jwøk

¹ «Aani, aana männö ki bëët kwøw mara; kiper manøgønø, a bëëdö naa dwaalli jaak nø, ni cääna ki køør këëny cwïny mara.

² Aani caana caanø jï Jwøk ni kööa, ni ‹Kär aani jäälï, 'ba gïna kïthï bääta en caan tiere nee ŋääa.

³ ?Aŋø, beeye gïn mo beer jïrï ki man caannï aani, niï kwiera gïna tïïyï ki cerï, ni tïmï niï wëëga uutjïëthe mo jøøa reyø bëënynyö?

⁴ ?Aŋø, nyeŋ mo dhaanhø dagø jïrï? ?Aŋø, ï rääŋö kaawat man wø räŋ dhaanhe?

⁵ ?Aŋø, nïr kwøw moï caala nïr kwøw mo dhaanhø, wala cwiic kwøw moï caala mo dhaanhø,

⁶ ni tïmï niï manynya bääyö mara keere en, niï caya raay 'moa?

⁷ Ïïni, ŋäyï ni bäŋ gïn mo yaa baa; ni bäŋ ŋat mo løny jïre ki man piem aani cerï.

⁸ « ‹Ceŋŋï beege na cwääc aani na tïïc aani. ?Aŋø, ennø ï cäŋa duu kuna raanynyï aani?

⁹ Par wïïï mø, ïïni aana nø cwääyï ki ro odhöönh; ?aŋø, a cäŋï ka raanynyø naa cäŋa døø ri tør?

¹⁰ ?Aŋø, a kärï thii yi mera kaamar caak, ni wëëgï dëëra mägö kaamar caak ma dïïle, ni tïma ni aana dhaanhø?

¹¹ ?Aŋø, dëëra kärï rïëbö ki buyö ki rïŋö, ni wëëgï dëëra mak na aciel ki cuu ki läär?

¹² Bëët kwøw acïpï jïra, ni nyoothï mëëyï jïra ni wø ba jøøl, ni ö gööki marï ni koor jwïëya.

¹³ « ‹'Ba gïïögø beege gïïa näk iï kan cwïnyï, ni ŋääa ni beege gïïa caarï kipera.

¹⁴ Ni näk mo aano tïïö ki raay, a diï joodø, ni ba diï a wiiø ki jääl ki køør bääyö mara.

¹⁵ Wui, ni näk mo aano bääyö, otïmö ni leth jïra! 'Ba këël bëëtö mara doo tiir, wïïa ba daa tïŋ maal, kiper a ena yi laac wïc mo dwøŋ døc, naa raŋŋa gïna leth na ena yie.

¹⁶ Ni näk mo wïïa tïŋa maal, a diï dwarø kaawat man wø tïïc ŋuuwi, ni diï cäŋ teek marï nyoothø bääta.

¹⁷ Ïïna kännö ki luup møøk mo nyärö mo jääla aani, ni ö wëërri marï ni meet ree bääta; gïï mo leth awëëgï ööny bääta ni rege lwöbö.

¹⁸ « ‹?Aperŋø ni wëëgï aani nywöl wøk en? Wui! doo beer ki mana daa thøw cøøn ni poot bäŋ waŋ mo oneen aani.

¹⁹ Aŋø, kanya ööa wøk ki yi mera, daa put pööth yi bwörö ni keda a kär cwääö, doo beer!

²⁰ ?Aŋø, nïra nøk 'moa poot ba wëëgï thöör bääta nø? Wec aani nø naa jïta ki met ec mo thiinh,

²¹ kanyo poode naa poot kär ci kanya näk bäŋ duun wøk yie, ni beeye kanya näk muudhö mo cøl døc,

²² kanya näk bëëdö na wäär ni näga muudhö, ni wïc ee kierø ni tar mare poot na muudhö.› »