Joona 1 - Wëël Jwøk

Kanya Ö Joona Na Päär Wøk Ni Kana Ree Ki Wuuö Jwøk

¹ Man beeye dwør Wuuö Jwøk mana ö bäät Joona wär Amitay, ena köö,

² ni «Ö maal ni ciï Nineba, päänya dwøŋ, ni cäänï dëëre, kiper rääö mar jiye aöö ni pïïe maal baŋa.»

³ 'Ba Joona aö maal nee reŋ Tarcëc ni kana ree ki Wuuö Jwøk. Køøre ena ci Jøpa ni joot baabuur mar naam mo cøøa Tarci, ni cude ki gwel ni ci yie kiper nee ci Tarci ki jøøa en yie, ni eni kana ree ki Wuuö Jwøk.

⁴ 'Ba Wuuö Jwøk akännö ki jamø mo dwøŋ bäät naama dwøŋ, ni tïm athage ni dwøŋ døc yi naam, ni tïm baabuurri ni manynya man toore.

⁵ Køøre jø tïïc mo baabuur alwäyö døc, ni ö ŋati man nø ni jwöŋe dëër jwøe. Ni leeŋge jammi yi naam moa en yi baabuur, kiper nee baabuur tïme ni jööt kiperge. 'Ba Joona onø ci yi baabuur piny ni nyaaŋ dëëre piny ni put nyeŋŋe gämmö døc.

⁶ 'Ba kwääc baabuur aci baŋe ni pëëny gø, na «?Aŋø, ï butï kiperŋø? Ö maal ni cwølï Jwøï. Kanymør Jwøk cädö kiperø, kiper nøø ba thøø.»

⁷ 'Ba jø tïïc acäänö yïthakicge keerge ni köge, ni «Beerra man thöödhø ki nyuuthe kiper nee ŋata päth gïnni ni raac bäätø en ki køøre nee ŋääø.» 'Ba kanya thöörge nyuuthe, nyuudhi aput päth bäät Joona.

⁸ Ni putge gø pëënynyö, ni «Caanï jïwa, ?gïn raac ni pänh bäätø en oöö ka køør ŋa? ?Tïïc marï agïnaŋø? ?Ïïno käla kaa? ?Pou a kaa? ?Ïïna juna ŋø?»

⁹ Ni løk gø jïge, ni «Aana nyï Ibaru, naa bëëdö naa lwäära Wuuö Jwøk, Jwø maal, eni na cwääc naama dwøŋ ki ŋøøm.»

¹⁰ 'Ba jøøgø aput lwäyö døc, ni köge jïre, «?Aŋø, a teeŋ gïnaŋø na tïïyï en?» Kiper ŋäc jiyi ni eni reŋi ni kana ree ki Wuuö Jwøk, kiper ee nø caan jïge.

¹¹ 'Ba athaŋ naam poot kadhø jaak. Køøre gena köö jïre, na «?Agïnaŋø noo tïïcwa ki ïïni ennø kiper nee athaŋ naam døø piny kiperwa?»

¹² Ni løk gø jïge, ni «Lwørru aani ni leeŋu aani yi naam, kiper athaga nee døø piny kiperu, kiper ŋääa na athaŋŋi ni dwøŋ en ö bäätu kapera.»

¹³ 'Ba jiy baabuur akiiwge døc ki man kïthge gø lak ageela, 'ba kär løny jïge, kiper athaga poot kadhø jaak.

¹⁴ Køøre gena jwöŋö dëër Wuuö Jwøk ni köge, «Wui Wuuö Jwøk, wa kwaya ïïni, kär wa 'nägï ki køør mano raanywa jwïëc ŋati en, ni ba kïthï kwör remø mare bäätwa ni näk mo eni kär bääyö, kiper ï na Wuuö Jwøk, gïna tïïyï en beeye gïna met yiï ki gø.»

¹⁵ Kanyøgø Joona aputge lwør ni leeŋge gø yi naama dwøŋ, ni ö athage ni put cuŋŋö.

¹⁶ Køøre jiy aput lwäyö døc ki Wuuö Jwøk, ni cïpge ko olämi jï Wuuö Jwøk ni putge kööŋ.

¹⁷ 'Ba Wuuö Jwøk rëëö mo dwøŋ ajääŋŋe ni løøny Joona, ni ö Joona ni bëëde ki nïne adäk, wärre ki cääŋŋe moge, ni ena yi rëëö.