Jøøn 9 - Wëël Jwøk

Kanya Ö Jecu Na Køny Ŋat Mo Nywöli Na Cwør

¹ 'Ba kanya poot Jecu ni cäädhö, eni dhaanhø mo nywöli na cwør ajoode.

² Ni ö bääge ni pëënyge gøøni, ni «?Dïpööy, aŋa na bääyö, beeye nyenøgø, wala jøøa nywøl gø, ni nywöli na cwør en?»

³ Ni løgi ya Jecu, ni «Paa kiper ni nyenøgø obääyö, wala jøøa nywøl gø, 'ba beeye kiper nee tïïe mo Jwøk nyooth ki ree.

⁴ Ø doo tïïya tïïe mo Ŋata jääŋ aani, kany wø poode na waŋcäŋ. Kiper piny otïmö na wäär, kany wø bäŋe ya ŋat mo tïïö.

⁵ Kany pooda naa poot ena piny en, aana tac piny.»

⁶ 'Ba kanya caan gïnögø, ena ŋuut piny ki laaw, ni bïl døødø ki laawøgøøni, ni rwøth døødø nyeŋ ŋata näk cwør,

⁷ ni kööe jïgø, ni «Ciï ni lwøgï yi puul Caylööm;» na näk tier nyeŋŋe beeye Jääk. Køøre ena cøø ni lwøe, ni duue ni nëënö.

⁸ 'Ba jøøa kwøŋ bëëdö ki eni na aciel, ki jøøa wara neen gø ni kwääö, gena köö, na «?Aŋø, ŋati en, paa eni na wara näk opï piny ni kwääö?»

⁹ Ni kö jø møøki, ni «Beeye eni.» 'Ba jø møøk aköö, ni «Path, ge caala rege.» 'Ba ŋatøgø aköö, ni «Beeye aani ki dëëra kiree.»

¹⁰ Ni köge jïgø, ni «?Ni näk beeye ïïni, nyeŋŋï røkge ege jabø nidïï?»

¹¹ Ni løk gø, ni «Ŋat wø cwøl ni Jecu beeye na bïl døødø ni rwøth gø nyeŋŋa ni kööe ki aani, ni ‹Ciï yi Caylööm ni lwøgï.› Køøre aana cøø ni lwøa ni put nyeŋŋa døø karge.»

¹² Ni köge jïre, «?Age eni?» Ni kööe, «Kare kuua.»

Kanya Ö Jø Paricith Na Pëënyge Jöö Mana Køny Cwør Ki Gø

¹³ Kanyøgø nyenøgø na näk okwøŋ cøørø akäl jiyi baŋ jø Paricith.

¹⁴ 'Ba dïcäŋögø beeye cäŋ jwömö na ö Jecu na bïl døødø ni jap nyeŋ gø.

¹⁵ 'Ba jø Paricith ŋatøgø apëënyge thuwø, ni «?Nyeŋŋï odøø karge nidïï?» Ni kööe jïge, ni «Eni døødø arwøth nyeŋŋa, ni lwøa ni neena en.»

¹⁶ 'Ba jø Paricith møøk aköö, ni «Ŋatøgø ba käl baŋ Jwøk, kiper eni luum cäŋ jwömö bäŋ wø gwøe.» 'Ba møøk aköö, no «?Onää ŋatøgø ŋat raay, ŋïïce ma yøøgønø a dee gø tïïö nidïï?» Yi kar kanyøgøøni yïthakicge ajïtö ki pïëm.

¹⁷ Køøre gena cäŋ köö jï ŋata näk ocøør, ni «?Ïïni, agïnaŋø noo caanï kiper ŋatøgø kaa mana jap nyeŋŋï enøgø?» Ni kööe, ni «Ena nyikuŋ Jwøk.»

¹⁸ 'Ba jø Juuth patha ojïëy ni eno kwøŋ bëëdö na cwør, ni cäŋ nyeŋŋe døø karge, këël mana ö geni na cwølge jøøa nywøl ŋata näk nyeŋŋe odøø karge.

¹⁹ Ni pëënyge ge, ni «?Man beeye wäädu mana kööu ni nywöli na cwør? ?Eni ocäŋ nëënne nidïï kawaane?»

²⁰ Ni dwøgi jøøa nywøl gø, ni «Ŋäcwa ni ŋatøgø beeye wäätwa, ni nywöli na cwør.

²¹ 'Ba jöö mana nëëne ki gøøni kawaane kucwa, ki ŋata jap nyeŋ gø. Pëënynyu eni. Eni dwøŋ. Eno cäänö kiper dëëre keere.»

²² Luummögø acaan jøøa nywøl gø kiper na lwäärge ki jø Juuth. Kiper onø ŋøl jø Juuthi ni noo dee dhaanhø mo caan gø ni Jecu beeye Krictø, eni di mänö ki ööny øt acooŋ lam.

²³ Ni beeye na kö jøøa nywøl gø, ni «Eni dwøŋ. Pëënynyu eni.»

²⁴ Kanyøgø ŋata näk ocøør acäŋge cwøllø ri rietge ni köge jïre, ni «Pwøc ka Jwøk. Ŋäcwa ni nyenøgø ŋat raay.»

²⁵ Ni løk gø jïge, ni «Nee ena ŋat raay, wala patha eni, kuua. 'Ba gïrpiny aciel keere beeye ni ŋääa, aani, aana kwøŋ bëëdö ni aana cwør møn, ni nëëna ennø.»

²⁶ Ni köge jïre, «?Agïnaŋø na tïïe dëërï? ?Nyeŋŋï ee jabø nidïï?»

²⁷ Ni løk gø jïge, «Anø caana jïïu, ni ba wïnynyu gøøni. ?Aŋø ni manynyu man cäŋu gø wïnynyö këët en? ?Aŋø, u caya man tïmu ni uuna bääge thuwø?»

²⁸ Ni ö geni ni cäänge ki luubö mo raac dëëre, ni köge, ni «Bee ïïni na bääŋ ŋatøgø, 'ba waani, waana bääk Modhe.

²⁹ Ŋäcwa ni Jwøk acäänö ki Modhe, 'ba mar nyenøgø, kanya ööe ki yie kiree kucwa.»

³⁰ 'Ba aløk ŋatøgøøni, ni «Eni kuna käl yie kuyu, 'ba eni nyeŋŋa ajabe. Manøgø beeye gïn mo rëëma ec.

³¹ Ŋääø ni Jwøk dööt jø raay bäŋ wø wïnynye. 'Ba ni näk da dhaanhø mo wø wøøra Jwøk ni tïïc mana many Jwøki, dwøre wø wïny Jwøki wïnynyö.

³² 'Ba poot kär wïnynyö bäre bäre ki kanya täk pinynyi, ni da ŋat mo nyeŋ dhaanhø mo nywöli na cwør ee jabø.

³³ Onää ŋatøgø ba käl baŋ Jwøk, doo bäŋ gïn mo dee maara tïïc.»

³⁴ Ni løkge gø jïre, ni köge, ni «Ïïni, ï nywöla yïth raay. ?Aŋø, wa diï pwönynyö?» Ni putge gø cöör wøk.

Pwöc Kiper Cøørø Mar Jwïëy

³⁵ 'Ba awïny Jecu ni ŋatøgø ocöör wøk. 'Ba na joot gøøni, ena köö, ni «?Ïïna jïëy ki Wär Dhaanhø ni ŋäädhï?»

³⁶ Ni løk gø jïre, ni «?Kwäärö, ena ŋa? Kiper naa jïëa ni ŋäädha eni.»

³⁷ Ni kö Jecu jïre, «Ena nø neenï, ni bee eni ni cäänö ki ïïni en.»

³⁸ Ni kööe, ni «Kwäärö, aana jïëy ni ŋäädha.» Ni wøør gø.

³⁹ Ni kö Jecu, ni «Aani, a ö piny kaper nee luup jiy ŋøla, nee jøøa bäŋ nyeŋ, nee nëënge, ni tïm jøøa da nyeŋ na cööye.»

⁴⁰ 'Ba jø Paricith møøk mo ena buute na wïnyge luummögø, gena köö jïre, «?A waani, waana cööye thuwø?»

⁴¹ Ni kö Jecu jïge, «Onää uuna cööye, doo bäŋ ajäla bäätu, 'ba kawaane kiper mana kööu, ni jïïu da nyeŋ, ajäla maru adööŋ bäätu.»