Jøøn 7 - Wëël Jwøk

Kanya Ö Jecu Na Taagi Ya Nyïïmenni

¹ 'Ba na tïme na køør manøgøøni, Jecu atïmö ni wïïra yi Galili, ni ba many man ci Judia, kiper na tïm jø Juuthi ni ge manynya man 'näkge eni.

² 'Ba kar kaaca Ajwöm Cam mar jø Juuth man wø wøør ni jøw bëëdö yïth abïle kare ocäännö.

³ Kiper manøgønø, nyïïmenni aköö jïre, ni «Wec kany, ni ciï yi Judia, nee tïïe mo wø tïïyï nee neen bäägï.

⁴ Kiper bäŋ dhaanhø mo doo tïïö ni mare ee kanø, ni näk eni manynya man ŋäc mare. Ni näk gïïögø iï tïïö, nyooth riï jï jiy.»

⁵ 'Ba eni, këël nyïïmenni kär jïëy ki eni ni ŋääthge gøøni.

⁶ Ni løgi ya Jecu jïge, «Caa mara poot kär öö, 'ba uuni, caae bëët beyø kiperu.

⁷ 'Ba jø piny ba doo maara männö ki uuni, 'ba beeye aani na mänge ki gø, kiper na caana moa reyø na tïïcge.

⁸ Uuni, løny jïïu ki man cou kar ajwöma keeru. 'Ba aani, a ba ci kar ajwöma manøgø, kiper caa mara poot kär öö.»

⁹ 'Ba na nø caan luummögøøni, ena dööŋ yi Galili.

Kanya Ci Jecu Kar Ajwöma

¹⁰ 'Ba na näk køøre ni nyïïmenni onø ci kar ajwöma, ena luuny cøø thuwø, 'ba dëëre käre nyoodhø.

¹¹ 'Ba jø Juuth ge neeta gø kar ajwöma, ni köge, na «?Age eni?»

¹² 'Ba kanyøgø jiy atïmö ni ge muuŋö døc ki nyeŋŋe. Ni jø møøk köö, ni «Ena dhaanhø mo beer,» ni kö møøki, ni «Path, eni cøøga jiy jaak.»

¹³ 'Ba kiper mana lwäärge ki jø Juuth, bäŋ ŋat mo ocwøl nyeŋŋe ni wïnyö.

¹⁴ 'Ba kanya poot jiyi ni ge ena kar ajwöma, Jecu aci Øt Jwøk Mana Dwøŋ ni pööe.

¹⁵ 'Ba jø Juuth yïthge athäŋŋö ki pwöc moe ni köge, ni «?Ŋati en luupögø ee kwanyø kaa, ni eni kär pwönynyö?»

¹⁶ Ni løgi ya Jecu jïge, «A ba pöö ka mara, 'ba beeye mar eni na jääŋ aani.

¹⁷ Nee da dhaanhø mo caya man tïïc mana many Jwøki, eni dee ŋääö ki man näk mo pwöc man en käla baŋ Jwøk, wala caana ka wïïa a keera.

¹⁸ Ŋat wø cäänö ki wïïe keere, wø cäänö kaper nee eni pwøc. 'Ba ŋat wø many Eni na jääŋ gøøni nee pwøc beeye na adïëri, ni eni bäŋ cwøk jïre.

¹⁹ ?Aŋø, ciik Jwøk kär cïp Modhe jïïu? 'Ba bäŋ dhaanhø aciel dïïu mo ciik Jwøk ee gwøø. ?Aŋø ni cayu man 'nägu aani en?»

²⁰ 'Ba aløk jøøgø jïre, «Ïïni, riï da anägö. ?Aŋa ni cac man 'näk ïïni?»

²¹ Ni løgi ya Jecu jïge, «Aani gïrpiny aciel atïïa, ni ö uuni ni thäŋ yïthu bëët ki gø.

²² Modhe luum daŋ acïbe jïïu, ni manøgøøni ba täga ri Modhe, 'ba täga ri kwäyu; ni ö uuni ni putu dhaanhø daŋ ki cäŋ jwömö.

²³ ?Aŋø, ni näk dhaanhø you daŋø ki cäŋ jwömö, kiper nee ciik mo Modhe ba dhallu, u doo wëër ki aani kiper na wëëga dëër dhaanhø mo tuu jöönnö bäre ki cäŋ jwömö?

²⁴ Kär nou ŋuta piny ki køør mana neennu ki nyeŋŋu, 'ba ŋudu ki ŋøl ma adïëri.»

Pïëc Kiper Jecu Ki Man Näk Mo Beeye Krictø

²⁵ 'Ba kanyøgøøni jø møøk dï jø Jerucalem aköö, na «?Aŋø, paa ŋata manyge en, nee 'näkge?

²⁶ 'Ba kawaane eni luubö jaak, ni bäŋ gïn mo caange jïre. ?Aŋø, ŋäc kwääri wän ni ŋatøgøøni beeye Krictø?

²⁷ 'Ba ŋati kanya ööe ki yie ŋääø bëët. 'Ba Krictø noo ööe doo bäŋ ŋat mo ŋäc kuno ööe ki yie.»

²⁸ 'Ba Jecu na pööe Øt Jwøk Mana Dwøŋ, dwøre atïŋ maal døc, ni kööe, «Uuni, a ŋäyu. Ni ŋäyu kuna ööa ki yie. 'Ba aani, a kär öö ki wïïa, a keera. Eni na jääŋ aani beeye na adïëri, 'ba eni kuyu.

²⁹ 'Ba aani, eni ŋääa, kiper a käla baŋe, ni beeye eni na jääŋ aani.»

³⁰ Kanyøgø gena tïmö ni ge manynya man makge gø, 'ba bäŋ ŋat mo cere ee rwaak baŋ gø, kiper na poot caa mare ni kär öö.

³¹ 'Ba jiy mo thööth ajïëy ki eni ni ŋääthge gø, ni köge, «?Aŋø, kanyo ö Krictø yie, eni doo tïmö ki ŋïïce mo thööth mo kaala moa tïïc ŋati en?»

Kanya Jääŋ Dïkuye Mo Øt Jwøk Kuna Makge Jecu

³² 'Ba jø Paricith luum lwaaøgø awïnyge ni ge muuŋö na enøgønø ki nyeŋ Jecu. Ni ö kwääc laammi ki jø Paricith ni jääŋge dïkuye mo Øt Jwøk kuna makge gø.

³³ Kanyøgø Jecu aköö, ni «Aano en buutu ki kany mo thiinh; noo näk køøre, aano døø baŋ Ŋata jääŋ aani.

³⁴ Aano cayu, ni ba jootu aani. 'Ba kanyo ena yie, u ba doo maara ö yie.»

³⁵ 'Ba jø Juuth acäänö yïthakicge keerge, ni köge, ni «?Ŋati, a kanya ŋø cøøn noo ci yie, ni eni ba joodø en? ?Aŋø, eni manynya man ci baŋ jø Juuth moa näk okeethø dï jø Gïrïïk, nee jø Gïrïïk pwönynye?

³⁶ ?Tier mare nidïï na caan luummögøøni, ni ‹Aano cayu, ni ba jootu aani, ni kanyo ena yie, u ba doo mara ö yie›?»

Luumma Caan Jecu Kiper Pï Kwøw

³⁷ 'Ba na tïme na aŋuun nïr ajwöm-cam, cäŋa näk mo dwøŋŋa eni, Jecu ree athïïŋe ni tïŋ dwøre maal døc ni kööe, «Nee da dhaanhø mo ree da riew, wär eni ö baŋa nee mädhe.

³⁸ Ŋato jïëy ni ŋääth aani, cwïnye ojïti ki näm mo kwödö ki pï kwøw, kaa mana caani ya wëël Jwøki.»

³⁹ 'Ba luummögøøni caane kaper Jwïëc Jwøk mano ö bäät jøw ojïëy ki eni ni ŋääthge gø. Kiper kar kaaca Jwïëc Jwøk poot kär cïbö, kiper na poot Jecu ni poot kär jïtö ka ajiem.

Kanya Ö Jiyi Na Pääŋge Rege Kiper Jecu

⁴⁰ 'Ba na wïnyge luupögøøni, jø møøk aköö, ni «Ŋati beeye nyikuŋ Jwøk møn mana wäŋŋi.»

⁴¹ Ni kö møøki, ni «Ŋati beeye Krictø.» 'Ba møøk aköö, na «?Aŋø, Krictø doo öö ki yi Galili?

⁴² ?Kär caan wëël Jwøki na bëëde, ni Krictø doo käla ri nyïïkwaac Deebit, ni doo öö ki yi Bethelem, paana kwøŋ Deebiti bëëdö yie?»

⁴³ Yi kar kanyøgøøni, jiy røkge apääŋge kipere.

⁴⁴ Ni møøk dïge caya man makge gø, 'ba bäŋ dhaanhø mo cere ee rwaak baŋ gø.

Luum Ataa Mar Jø Paricith

⁴⁵ 'Ba kanyøgøøni, dïkuye mo Øt Jwøk adøøk ni cige baŋ kwääc laam ki jø Paricith. Ni ö kwääc laammi ki jø Paricith ni köge jïge, na «?Aŋø na ba källu gøøni?»

⁴⁶ Ni løgi ya dïkuye, ni «Bäŋ dhaanhø mo okwøŋ cäänö kaamar ŋatøgøøni.»

⁴⁷ 'Ba aløk jø Paricithi jïge, «?Aŋø, uuna cøøge thuwø?

⁴⁸ ?Da kwääri wala jø Paricith mo ojïëy ni ŋääthge eni?

⁴⁹ 'Ba lwaaøgø enø, na kuc mana en ri ciik Jwøk, geno cienø.»

⁵⁰ 'Ba Niködima na en dëëtge, ŋata kwøŋ ci baŋ Jecu, aköö jïge,

⁵¹ «?Aŋø, ki køør ciik mo pøø, dhaanhø doo ŋøla wøk ni mare kär kwøŋ wïnynyö, ni kwany tier gïna tïïe?»

⁵² Ni løkge gø, «?A ïïni, ïïna nyï Galili thuwø? Noo manynyï yïth weet Jwøk døøc, diï joodø ni doo bäŋ nyikuŋ Jwøk mo doo öö ki yi Galili.» [

⁵³ Ni ö ŋati man nø ni døø paare.