Jool 3 - Wëël Jwøk

Luum Ajäla Mar Wïth Juurre

¹ «'Ba ka adïëri møn, kanyo tïme ni yïth nïreke kar kaace, kanyo ö Jerucalemmi ki Juuda bäre noo dwøga ge karge,

² aani wïth juurre bëët cooŋa kanya ciel, ni kïtha ge goor Jøcapath. Ni ööa ni caana luup ŋøl dëëtge kaace naa ena løø jiya ma jø Icriel na näk thööga, kiper beege na keeth jiya dï wïth juurre, ni ö geni na wïth juurre ni pääŋge ŋöömö mara yïthakicge keerge.

³ Geni thuwø gena tïïö ki ŋïïce ki ri kwääk ki baw kiper jiya, ni ö nyilaar dïcwøø ni gathge gø kiper käp, ni dwøkge nyilaar nyakøø pwödhö ki køøŋ nyïïomøki nee maathge.

⁴ «Maya thuwø, u jø Tayar ki jø Caydan ki jiy bëët moa en mïëc Pilitin, ?agïnaŋø na manynyu nee tïïyu dëëra? Aŋø, da kwör mo dou coolø dëëra? 'Ba ni näk mo da kwör mo you caarø ni coollu coolø dëëra, laara ka layø ni dwøga gø dëëtu.

⁵ Kiper uuni warkey mara, ki gwel-bïrö mara, ki jap kwär 'moa akällu ni kïthu ge yïth uut juu mou.

⁶ Uuni, jø wø bëëdö Jerucalem ki dï Juuda bäre agathu baŋ jø Gïrïïk, ni tïïyu karge ni bäär ki ŋöömö marge.

⁷ 'Ba ennø, ge tïŋa maal yïth kwöra gathu ge yïthge, ni ö gïna tïïyu dëëtge ni dwøga gø dëëtu.

⁸ Aani thuwø, wäätu ki nyïïu gadha gadhø baŋ jø Juuda, ni ö jø Juuda ni gathge ge baŋ jø Caaba, wï juna kare bäär.» Kiper beeye Wuuö Jwøk na caan gø.

⁹ Luubö man gøø piny yïthakic wïth juurre: Ni jiiŋŋu dëëtu kiper leny, ni ö jø lenynyi moa teek ni öge maal. Beerra man ö jø lenynyi bëët ni nyiikge kany mo cään ni tukge.

¹⁰ Thääthu jap puur mou no opëëlle, ni ö jap goor wïth jenni mou ni thääthu ge na tøøŋi; ni ö ŋata jääk ni cøm cwïnye ni ŋwöe, ni «Aana dïcwøø mo teek.»

¹¹ U na wïth juurre bëët moa kwöru cärö, läädu ni laaru öö, ni cooŋŋu dëëtu kanya ciel yi gool kaace. Wui Wuuö Jwøk, jø leny moï na teek wär put jääŋŋö piny.

¹² «Beerra man ö wïth juurre ni öge maal ni cige goor Jøcapath, kiper aani, a pïïa piny kaace ni caana luup ŋøl dëët wïth juurre bëët moa kwörge cärö.

¹³ Kiper mana tïm rääö marge ni päl, nyaaru geni piny kaamar caammi mo ociek mo kaa piny, ni cwöthu ge kaamar nyïïomøki mo di cwödhö ki tiel kar biic marge këël mano tïm pï nyïïomøki ni kwönna wøk.»

¹⁴ Wui lwaak, lwaa päl, u ena goor ŋøl luup, kiper cäŋ Wuuö Jwøk kare acäännö goor ŋøl luup.

¹⁵ Cäŋ ki dwääy tïmö ni cøl, ni ö ceerri ni ba rienyge këët.

¹⁶ Wuuö Jwøk määr ki yi Dhayan, ni dwøre wïnyi ka yi Jerucalem, ni ö maalli ki piny ni tïmge ni jäŋŋi. 'Ba Wuuö Jwøk bëëdö na kar kan røk jï jiye, ni eni caala kiir mo ogeerø ni teek jï jø Icriel.

Luum Gwïëth Mar Jø Icriel

¹⁷ «Køøre nø oŋäyu møn ni beeye aani na Wuuö Jwøk, Jwøk maru, naa bëëdö Dhayan bäät kïnna na en kur keere. Jerucalem tïmö ni ena kur keere, ni bäŋ dhaanhø mo path mo ŋøla dïëre këët.

¹⁸ «'Ba kanyo tïme na dïcäŋece, kïte tïmö ni lwanynyi ki køøŋ nyïïomøki mo ŋweeth, ni tïm thuuri ni caak kwönna wøk ki bäätge, ni tïm nyeŋ nämmi moa en Juuda ni kwödö ki pïï. Ni tïm pï jøøro ni kwönna wøk ki yi Øt Wuuö Jwøk, ni jwøc goor Cëthim.

¹⁹ Ijep ränynyö ni tïme na tëën, ni ö Ëdömmi ni tïme na paap mo otal, kiper gïïa leth na tïïcge dëët jø Juuda, ni beeye yi ŋöömma kønyge rem jiy piny yie mo bäŋ gïn mo ege baaø.

²⁰ 'Ba Juuda tïmö ni beeye noo beet na bäre bäre, ni tïm Jerucalemmi na mar beenhnhe bëët mo oööi.

²¹ Aani kwör ajäl remø marge mana näk kära kwøŋ cool, coola coolø. Kiper beeye aani na Wuuö Jwøk ni wø bëëdö Dhayan.»