Jøcua 9 - Wëël Jwøk

Kanya Ö Jø Gibienni Na Cøøkge Jøcua

¹ 'Ba na tïme na kaagø, gïïa tïïc jø Icrielli awïny nyeye bëët moa bëëdö løø Naam Jördan jï løø kur pänh-cäŋ, na näk bëëdö mïëya en bäät kïte, ki mïëya en yi ŋöömma näk ree ee päärö, ki mïëya en bäät naama dwøŋ bëët, këël mana këët ri Kïn Libaanø, ni beege jø Këth, ki jø Amör, ki jø Keenan, ki jø Përec, ki jø Ëwi, ki jø Jeebuc.

² 'Ba kanya wïnyge gïnögø, geni rege aputge dwal ni tuutge dhøkge na aciel nee këëtge ki Jøcua ki jø Icriel.

³ 'Ba jø Gibien kanya wïnyge gïna tïïc Jøcua dëër pääny Jerikö ki pääny Gaay,

⁴ geni, gena tïïö ki riek waŋ, ni tïŋge kaamar jiy mo di jääŋŋö. 'Ba opïri mo ojeeyø, ko opïc pëëne mo wø käär kwøk nyïïomøki ki ge mo oruuö moa nø jeeyø ni cäŋi køøyø, alwørge ni kïthge ge bäät arëëni moge.

⁵ Ni kïthge tietge ki war moa nø ruuö no ojeeyø ni cäŋi køøyø, ni runyge dëëtge ka abïïe ma jade; 'ba caammi bëët moa käärge na cam mar øtjöö beege caammi mo otal moa nø puunnö.

⁶ Ni putge ci baŋ Jøcua kanya näk jø Icriel twïër marge ege tïïö yie kanya cwøl ni Gëlgela, ni köge jïgø ki jï jø Icriel, ni «Waani, waana öö ni wa käla paac mo bäär; ennø, wa kwaya uuni nou tudu ki luubö ki waani.»

⁷ 'Ba jø Icriel aköö jï jø Ëwi, «?Aŋø, a kanymør u bëëdö kany mo kare cään ki waani; waano tutwa ki luubö ki uuni kiper ŋø?»

⁸ 'Ba gena köö jï Jøcua, ni «Waani, waana laaŋe moï.» Køøre Jøcua aköö jïge, «?Uuna ŋaani cøøn di? ?U kälu kaa ŋø?»

⁹ 'Ba gena köö jï Jøcua, ni «Waani, wa na laaŋe moï, waana öö ni wa käla paac mo bäär døc kiper wïny nyeŋ mar Wuuö Jwøk na näk Jwøk marï; kiper waae mo gïïa tïïe awïnywa, ni beege gïïa tïïe bëët Ijep,

¹⁰ ki gïïa tïïe bëët dëët nyeye mo jø Amör moa näk ariiø na bëëdö løø Naam Jördan løøga, ni beege Cëëwön, nyeya mana näk bëëdö Ëcbön, ki Ög nyeny jø Baacan na näk bëëdö päänya cwøl na Actaröth.

¹¹ Ni ö jø døøŋŋø mowa ki jiy bëët moa bëëdö powa ni cäänge ki waani, ni köge, ni ‹Käädu ki caammi kiper wääth øtjöö, ni cou nou røømmu ki jø Icriel, ni kööu jïge, ni «Waani, waana laaŋe mou; 'ba ennø, wa kwaya uuni nou tudu ki luubö ki waani.» ›

¹² Caammi moi ni käärwa ii na gala kiper wääth øtjöö, kanya lwørwa ge mïëcwa, ni beeye dïcäŋa tïŋwa yie ni wa ööa baŋu, kar kaaca poot nyärö; 'ba ennø, neenï, anø tal ni puunge.

¹³ Këël opïc pëëne moi ni yïthge ewa pääŋö ii, nyärö kar kaaca. Neenï, gena jeeyø, ni ö abïïe mowa ki war mowa ni ränyge kiper wääth mana caathwa ni yie bäär en.»

¹⁴ Køøre jø Icriel alwötö røk caammi moa käär jøøgø. 'Ba kanya tïïcge gïnögø, Wuuö Jwøk kärge pëënynyö kiper dwøre mano caane.

¹⁵ Ni ö Jøcua ni put jïëy ki man bëëtge ki bëët-mëër ki jø Gibien, ni put tudö ki luubö ki geni, nee bëëtge ni kwøw; ni ö jø døøŋŋø mo lwaa Icriel ni putge kööŋ jï jøøgø.

¹⁶ 'Ba na tïme na dää nïne ni jø Icriel onø tudö ki luubö ki jø Gibien, awïny jø Icrielli ni jøøgø beege jiy mo ena buutge, ni ge bëëdö kany mo kare cään ki geni.

¹⁷ Ni ö jø Icrielli ni tïŋge ni pïïcge päänye mo jøøgø ri dää nïne. 'Ba nyeŋ päänye moøgø beege Gibien, ki Keepira, ki Bëëröth, ki Kiriat-Jeerim.

¹⁸ 'Ba jø Icriel jøøgø kärge nääö kiper mana näk jø døøŋŋø mo lwaa Icriel onø kööŋ jïge ki nyeŋ Wuuö Jwøk na näk Jwø Icriel. Ni ö lwaaki bäre ni ŋurge ki nyeŋ jø døøŋŋø.

¹⁹ 'Ba jø døøŋŋø aköö jï lwaak bäre, ni «Waani, waana nø kööŋ jïge ki nyeŋ Wuuö Jwøk na näk Jwø Icriel; 'ba ennø, øøni jøøgø ba døø gudö.

²⁰ Øøni, gïno tïïö ki geni keere beeye ki man wiiø geni ni kwøw, kiper ni näk mo ge yøø nääö, Jwøk wëëye di jääŋŋö bäätø ki køør mana nø kööŋwa jïge.»

²¹ Ni cäŋ jø døøŋŋø köö, ni «Wiiø geni nee bëëtge ni kwøw.» Køøre jøøgø aput tïmö na dïmööt jenni ki jø wøm pïï jï lwaa Icriel bäre, kaawat mana nø caani jø døøŋŋø jïge.

²² Køøre Jøcua jøøgø acwøle nee öge baŋe, ni cääne ki geni, ni kööe, na «?Aperŋø na cøøgu waani en, ni kööu, ni ‹Waani kar powa bäär døc ki uuni,› ni uuni, karu cään ki waani kiree?

²³ Ennø, uuna jiy mo ocienø møn; 'ba u puta bëëtö ni uuna laaŋe na bäre bäre, ni uuna dïmööt jenni ki jø wøm pïï kiper oduŋkaara na näk kar bëëtö mar Jwøa.»

²⁴ 'Ba aløk jøøgø jï Jøcua ni köge, ni «Gïna caan jïwa, wa na laaŋe moï, beeye en; akøp ni Wuuö Jwøk, Jwøk marï, dhaanhnhe ma Modhe ee nø köömmö nee ŋöömö man bäre en cïbe jïïu, ni dïïr wïth jiy bëët moø bëëdö yi ŋöömö man en nyïmmu. Kiper manøgønø, waana lwäyö døc kiper jwïëy mowa kiper gïna wïnywa kiperu, ni beeye tiere gø ni tïïcwa gïn en.

²⁵ 'Ba ennø, neenï, waano løny ni wa ena cerï; gïna beerra eni na adïëri ki baŋï tïïyï jïwa.»

²⁶ 'Ba gïna tïïc Jøcua beeye en; jøøgø akønye ceŋ jø Icriel, ni ö jø Icrielli ni kärge jøøgø nääö.

²⁷ 'Ba ki mana täge dïcäŋ manøgø, Jøcua jøøgø aput tïïc na dïmööt jenni ki jø wøm pïï jï lwaa Icriel këël kiper gïn wø cïp olämme bääte mar Wuuö Jwøk kany wø jier Wuuö Jwøki jaak. Ni put gïnögø bëëtö ni tïïcge tïïö këël dïcäŋi en.