Jøcua 7 - Wëël Jwøk

Luum Bääyö Mana Tïïc Akanni

¹ 'Ba jø Icriel abääyö ki køør gïna tïïcge røk gïïa näk onø wëëk geni nee raanyge na bäre; kiper Akan o Karmi na näk nyikwaar Dhabdi o Dheera na käl ri jø tuuŋ Juuda, alwötö røk gïïa näk onø wëëk geni nee raanyge na bäre; ni put Wuuö Jwøki wëër døc ki jø Icriel.

² Køøre kanya en jø Icrielli Jerikö, Jøcua jiy ajääŋŋe paana cwøl ni Gaay, na en buut paana cwøl ni Bëëth-Awëën, na en løø Bëthël jï løø kur tuul-cäŋ, ni kööe jïge, ni «Cou ni liewu ŋöömmece.» Ni ö jøøgø ni cige ni liewge Gaay.

³ 'Ba jøøgø aduu baŋ Jøcua ni köge jïgø, ni «Kär jiy bëët ci Gaay; jø leny moo cii manynya jiy mo jïtö ki kume ariiø wala kume adäk keerge. 'Ba kär niï ööla jiy bëët ki man cige kunece, kiper jø Gaay beege jiy mo nøk jaak.»

⁴ Ni ö jø lenynyi mo jïtö ki kume adäk dëët jø leny mo jø Icriel ni cige baŋ jø Gaay. 'Ba kanya tïme na ri leny, gena riem jø Gaay.

⁵ Ni ö jø Gaay ni nääge ki jiy mo jïtö ki pïëradäk ka abïciel dëët jø leny mo jø Icriel. Ni ö jø Gaay ni putge jø Icriel riemmø ki mana täkge ki dhi kiir Gaay këël mana pïïcge kanya cwøl ni Cebarim, ni 'näkge jø Icriel kanya tïme na ri lööny piny. 'Ba jø Icriel cwïnyge abwøk døc ki lwär.

⁶ Kanyøgønø, Jøcua abïï mare ajeee, ni gøø ree piny nyïm acanduk mar Wuuö Jwøk, ni bëëde kaace këël mana tïm pinynyi na abøøya, ni beeye eni ki jø døøk Icriel bëët; ni jørge tør wïthge ki pänh cwïny.

⁷ 'Ba Jøcua aköö, «Wui, Kwäärö Wuuö Jwøk. ?Aŋø, waani, wa käädhï løø Naam Jördan løøi kiper nee wa cïbï ceŋ jø Amör, nee wa 'näk møn? Kee doo beerra eni jïwa ki mana dewa bëëdö løø Naam Jördan løøga ni cwïnywa ewa cïp piny jaak.

⁸ Wui, Kwäärö Wuuö Jwøk. ?Agïnaŋø noo caana nø, kiper jø Icriel ŋäthge alukge nyïïmän moge ni reŋge?

⁹ Kiper gïnögø wïny jø Keenanni wïnynyö, këël jøøa bëëdö yi ŋöömmögø bëët, ni öge ni rumge wa dïër ni putge wïthwa dïïr na bäre. ?'Ba ennø, agïnaŋø noo tïïyï, nee nyeŋŋï bëëde ni poot wïnyö?»

¹⁰ 'Ba Wuuö Jwøk aköö jï Jøcua, «Ö maal. ?Aŋø, aperŋø na gøøï riï piny en?

¹¹ Jø Icriel beege na bääyö; geni luumma mana tuuda na köömma geni ki gø akaalge. Gena lwötö røk gïïa näk onø wëëk geni nee raanyge na bäre, ni kwalge gïïögø, ni cäänge ki tööt. Køøre gïïögø akange dï jammi moa näk moge.

¹² Kiper manøgønø, jø Icriel ba løny ki man cuŋge nyïm nyïïmänge; geni ŋäthge lukge nyïïmänge ni reŋge, kiper gena nø tïmö ni ge caala gïïa näk di raanynyø na bäre yøø. 'Ba ni näk mo gïïa no onø wëëk uuni nee raanynyu na bäre, käru raanynyø dïïu, aani, a na Wuuö Jwøk, a ba bëëdö ki uuni këët.

¹³ «'Ba ennø, ö maal, ni tïïyï jiy nee dëëtge døøcge mo waany ni kööï, ni ‹Døøyu dëëtu mo waany kiper gïno tägi diøø, kiper Wuuö Jwøk na näk Jwø Icriel aköö, ni «Wui, jø Icriel, gïïa no onø wëëk uuni nee raanynyu na bäre dagø dïïu. 'Ba këël kanyo paanynyu gïïa no onø wëëk uuni nee raanynyu na bäre, uuni ba løny jïïu ki man cuŋŋu nyïm nyïïmännu.» ›

¹⁴ «Ni cäŋï köö jïge, ni ‹Ka amöölla wäru ööu kany mo cään ki Wuuö Jwøk, nee wï tuuŋ mano nyooth Wuuö Jwøki no obääyö nee joot. 'Ba ŋato nyooth Wuuö Jwøki dëët wïth tuŋi moøgø, jø dhøk uudi moa en tiere doo ööa kany mo cään. Køøre ŋato nyooth Wuuö Jwøki dëët jø dhøk uudi moøgø, jøøa näk wëëk mïëri na en tiere doo ööa kany mo cään. Køøre ŋato nyooth Wuuö Jwøki dëët wëëk mïëri moøgø, cwøw moa en paare doo ööa kany mo cään na aciel aciel.

¹⁵ 'Ba ŋato joot ni gïïa no onø wëëk uuni nee raanynyu na bäre ena baŋe, wär eni 'näk ki gïïa en jïre bëët, ni rup maac bäätge nee putge waaŋ na bäre, kiper eni luumma tuuda ki jø Icriel akaale, ni tïïc gïn mo wïc laay ki gø dï jø Icriel.› »

¹⁶ 'Ba na tïme na amöölla cøøn, Jøcua apäny maal ni käl jø Icriel kany mo cään ki Wuuö Jwøk ki køør wïth tuŋi moge, ni ö jø tuuŋ Juuda ni nyoodhi.

¹⁷ Ni ö Jøcua ni käl jiy moa en ri jø tuuŋ Juuda kany mo cään, ni ö Wuuö Jwøki ni nyooth dhi øt Dheera; ni ö Jøcua ni käl jiy moa en dhi øt Dheera kany mo cään ni käle na dhaanhø aciel aciel nø, ni ö Dhabdi na näk wää paaci ni nyoodhi.

¹⁸ 'Ba Jøcua cwøw moa bëëdö po Dhabdi akäl kany mo cään na dhaanhø aciel aciel nø; ni ö Akanni o Karmi nyikwaar Dhenberi o Dheera, na käl ri jø tuuŋ Juuda, ni nyoodhi.

¹⁹ Køøre Jøcua aköö jï Akan, ni «Nyie wääda, akwaya ïïni ki man caanï adïëri marï nyïm Wuuö Jwøk na näk Jwø Icriel, ni wøørï eni, ni køpï raay moï jïre. Ennø, gïna näk iï tïïö caanï jïra. Kär gïna näk iï tïïö mooŋï ki aani.»

²⁰ Køøre aløk Akanni jï Jøcua ni kööe, na «Adïëri møn, aani aana bääyö dëër Wuuö Jwøk na näk Jwø Icriel. 'Ba gïna tïïa kiree beeye en.

²¹ Aani, ki røk jammi moa twier bëët, kanya jooda abïï mo mïërö mo tïïca paana cwøl ni Cinaar, ki warkey ma lwøŋŋø ma rumme ma pïërabïïc mar rumi mana cwøl ni cekel, ki gwel-bïrö ma rumme ma dïpe ariiø mar rumi mana cwøl ni cekel, cwïnya atïmö ni päl ki ge ni lwøra geni. 'Ba ennø, gïïögø okoony piny yo oduŋkaara mana näk mara, ni gwel-bïrö beeye ni en ya aŋuudi piny tiet gïïögø bëët.»

²² 'Ba Jøcua aput jäägö ki jiy, ni ö jøøgø ni putge reŋ yo oduŋkaara mar Akan. 'Ba ka adïëri møn, kanya cige, gïïögø ajootge no okoony piny yo oduŋkaara mare ni gwel-bïrö ena ya aŋuudi piny tiet gïïögø bëët.

²³ Ni ö jøøgø ni kälge gïïögø wøk ki yo oduŋkaara ni kälge geni baŋ Jøcua ki jø Icriel bëët, ni peethge ge piny nyïm Wuuö Jwøk.

²⁴ Køøre Jøcua ki jø Icriel bëët, Akan nyikwaar Dheera akälge ki gïïa kwale, ni beege warkey mana näk lwøŋŋø, ki gwel-bïrö, ka abïïna mïërö; ni kälge wääte, ki nyïïe, ki dhäk moe, ka arëëni moe, ki dïëk moe, ko oduŋkaara mare ki gïïa en jïre bëët, ni kïthge geni gool mana cwøl na Akör.

²⁵ Kanyøgønø, Jøcua aköö jï Akan, na «?Aŋø nyie ni kännï bäätwa ki gïn mo leth en? 'Ba dïcäŋi nø Wuuö Jwøk okïth bäätï ki gïn mo leth thuwø.» Ni ö jø Icrielli bëët ni këërge Akan ki kïte, ki jø paare, këël gïïa en jïre bëët. 'Ba na nø këërge geni ki kïte, aputge rup ki maac ni put ge waaŋ na bäre.

²⁶ Ni ö jø Icrielli ni putge kïte mo thööth löör bäät Akan, ni kïte moøgø poot nut no olöör kanya ciel këël dïcäŋi en; ni ö Wuuö Jwøki ni put wëëye paany. Kiper manøgønø, nyeŋ kaace aput cwøl ni Goor Akör këël dïcäŋi en.