Jøcua 3 - Wëël Jwøk

Kanya Ö Jø Icrielli Na Ŋølge Naam Jördan

¹ Køøre Jøcua apäny maal ka amöölla cøøn; ni ö eni ki jø Icriel bëët ni tïŋge ki Cëthim ni pïïcge bäät Naam Jördan, ni butge kaace kanya poode ni ge kär ŋut løøga.

² 'Ba na tïme na ri dää nïne, dïbwöthe aci dï twïër;

³ ni köömge jiy, ni köge, ni «Kanyo jootu acanduk man wø nyooth luumma tuut Jwøki ki jiy na näk mar Wuuö Jwøk na näk Jwøu, ni biel dïlämme biellø na näk jø tuuŋ Libay, kar kaace nø, wäru putu ö maal ki kwöra bëëdu yïthge ni läpu køør acanduk,

⁴ nee jöö mano cørru yie nee ŋäyu; kiper jöö manøgø u poot kär cør yie dïkwøŋ. 'Ba kanyo cäädhu, wär yïthakiyu ka acanduk wëënnu ki rumme mo caala yïth gööye ma kume ariiø, ni ba nyiigu buute.»

⁵ Køøre Jøcua aköö jï jiy bëët, ni «Døøyu dëëtu mo waany, kiper diøø Wuuö Jwøk tïïö ki gïn mo rëëma ec dïïu kany.»

⁶ Ni ö Jøcua ni cääne ki dïlämme, ni kööe, ni «Lwørru acanduk man wø nyooth luumma tuut Jwøki ki jiy ni pööthu maal nyïm jiy.» Ni ö dïlämme ni lwørge acanduk man wø nyooth luumma tuut Jwøki ki jiy ni pööthge maal nyïm jiy.

⁷ 'Ba Wuuö Jwøk aköö jï Jøcua, ni «Dïcäŋi en a tägö ki man tïïa ïïni ni ïïna dhaanhø mo kare dwøŋ nyïm jø Icriel bëët, nee ŋäcge naa bëëdö ka ïïni kaawat mana bëëda ki Modhe.

⁸ Ennø, kööm dïlämme moøgø ni biel acanduk man wø nyooth luumma tuut Jwøki ki jiy yøø, ni kööï, ni ‹Kanyo pïïyu deŋ Naam Jördan, wäru putu cuŋŋö yïth pïï kaace.› »

⁹ Køøre Jøcua aköö jï jø Icriel, ni «Ööu kany, ni wïnynyu dwør Wuuö Jwøk na näk Jwøu.»

¹⁰ Ni cäŋ Jøcua köö, ni «Ki ri mano tal naammi en nø, oŋäyu ni Jwøa kwøw ena dïïu, ni ŋäyu gø thuwø ni eni jø Keenan, ki jø Këth, ki jø Ëwi, ki jø Përec, ki jø Gërgëca, ki jø Amör, ki jø Jeebuc rieme wøk nyïmmu.

¹¹ Neennu, acanduk man wø nyooth luumma tuut Jwøki ki jiy na näk mar Wuuö Jwøk na näk kwääc piny bäre, opööth maal nyïmmu kanyo ŋøllu Naam Jördan.

¹² 'Ba ennø, kwänyu ki jiy apaar kurriiø røk wïth tuŋi mo jø Icriel, ni ŋati man nø käla ri wï tuuŋ man nø.

¹³ 'Ba dïlämme moo biel acanduk mar Wuuö Jwøk na näk kwääc piny bäre, kanyo tïm tietge ni këëta yïth pï Naam Jördan, pï Naam Jördan puta niŋul, ni ö pïïyi mo wø kwönni ki kwöra en maal ni cuŋge kaamar gïï mo ocooŋ kanya ciel.»

¹⁴ Kanyøgønø, jø Icriel atïŋŋö, ni puthge oduŋkaare moge wøk nee Naam Jördan ŋølge, ni dïlämme acanduk man wø nyooth luumma tuut Jwøki ki jiy bielge biellø nyïm jiy.

¹⁵ 'Ba kar kaace beeye kany wø kac caammi, ni Naam Jördan opäŋ døc kiree. 'Ba kanya ö dïlämme moa biel acanduk na pïïcge bäät Naam Jördan, kanya gutge pïï ki tietge jaak,

¹⁶ pïï mo wø kwönni ki kwöra en maal aput cuŋŋö ni makge rege kaamar gïï mo ocooŋ kanya ciel, ni pïïögø cuŋŋa kany mo bäär paana cwøl na Adam, na en buut Carthan; ni ö pïïyi mo wø lööny yi Naam Acäbö na en yi gool mana cwøl na Araaba, ni putge niŋul na bäre. Ni ö jø Icrielli ni putge ŋut løøga ni ge dïët ki Jerikö.

¹⁷ 'Ba dïlämme moa biel acanduk man wø nyooth luumma tuut Jwøki ki jiy na näk mar Wuuö Jwøk, gena cuŋŋö kany mo otal dï Naam Jördan; ni ö jø Icrielli bëët ni putge ŋut løøga ni ge cäädhi ka kany mo otal, këël mana ö wïth tuŋi bëët mo jø Icriel ni putge thum løø Naam Jördan løøga.