Jøcua 24 - Wëël Jwøk

Kanya Ö Jø Icrielli Na Cooŋge Dëëtge Cekam Ni Cään Jøcua Ki Geni

¹ Køøre Jøcua wïth tuŋi mo jø Icriel bëët acwøle, ni cooŋge dëëtge Cekam, ni ö jø døøŋŋø, ki dïbwöthe, ki jø wø ŋøl luup, ki jø kööre, ni beege mo jø Icriel, ni cwöli wøk ki dï jøøgø; ni öge kany mo cään nyïm Jwøk.

² 'Ba Jøcua aköö jï jø Icriel bëët, ni «Gïna caan Wuuö Jwøki, Jwø Icriel, beeye en, ena köö, ni ‹Ki kany mo bäär kwäyu abëëdö løø Naam Upareeti løøga ni ge wøøra juu møøk, ni dhaanhø aciel røk kwäyu moøgø beeye Teera wää Eeberam ki Neeyör.

³ Køøre kwaru ma Eeberam alwøra løø Naam Upareeti løøga, ni bwødha eni dï ŋööm Keenan nee caadhe bäre, ni cïba wääde ma Aydhak jïre, ni tïïa nyïïkwaacge nee nyaacge.

⁴ 'Ba wäät Aydhak moa cïba jïre beege Jeekap ki Icøø. Kanyøgønø, Cëër, paana en mïëya en bäät kïte, acïba jï Icøø na kure; ni ö Jeekapi ki wääte ni cige Ijep.

⁵ « ‹Køøre Modhe ka Aran ajääŋŋa, a na Wuuö Jwøk, ni tïïa gïï mo leth dëët jø Ijep ki køør gïïa jääŋŋa bäätge; 'ba na tïme na køøre cään, uuna käla wøk ki Ijep.

⁶ 'Ba kanya käla kwäyu wøk ki Ijep, kanya pïïcge bäät Naama Kwaar, jø Ijep aput läm køørge ki jïëthe mo wø tut okwëënyi ki jø okwëënyi, ni maage geni bäät Naama Kwaar.

⁷ 'Ba kanya jwöŋ kwäyu dëëra, a na Wuuö Jwøk, aani yïthakiyu ki jø Ijep atïïa ni da muudhö, ni dwøga pï Naama Kwaar bäät jø Ijep ni muda geni. 'Ba uuni gïna tïïa Ijep ajootu ki nyeŋŋu kiree. Ni putu bëëtö dï paap ki kany mo bäär døc.

⁸ « ‹Køøre uuna käla yi ŋööm jø Amör na en løø Naam Jördan løøga, jï kur tuul-cäŋ, ni ö jøøgø ni këëtge ki uuni; 'ba gena cïba ceŋŋu, ni putu ŋöömö marge mac kanya dïïra wïthge nyïmmu.

⁹ Køøre Balak o Cëëpör, nyeny Möap, ree athïïŋe nee këëde ki uuni, ni jääk baŋ Beelam o Beeyör nee ööe nou tïïe ka ajwøa.

¹⁰ 'Ba aani a kär jïëy ki dwør Beelam. Ni ö eni ni gwïëth uuni ni puta uuni køny cere.

¹¹ « ‹'Ba uuni Naam Jördan aŋøllu ni pïïyu Jerikö; ni ö jøøa bëëdö Jerikö ni këëtge ki uuni. Këël jø Amör, ki jø Përec, ki jø Keenan, ki jø Këth, ki jø Gërgëca, ki jø Ëwi, ki jø Jeebuc gena këëdö ki uuni thuwø. 'Ba ge bëët gena cïba ceŋŋu.

¹² Køøre aani, a na Wuuö Jwøk, piini ajääŋŋa nyïmmu, ni ö nyeye mo jø Amör moa na ariiø ni riemge ge wøk nyïmmu; 'ba ge ba riema u wøk ko opëëlle mou wala athëëre mou.

¹³ Køøre aani pwöth mo u kär ööl kiperge, ki päänye mo ba geera uuni, acïba jïïu, ni putu bëëtö yïth päänye moøgø; ni cämu røk nyïï jera perge leth, ni beege nyïïomøki ki nyïï jer wø wel na mädhi, mo ba piitha uuni.›

¹⁴ «'Ba ennø møn, wøørru Wuuö Jwøk ni tïnynyu eni na adïëri ni you ŋäädhö ki cwïnynyu bäre; tïïyu karu ni bäär ki juu moa wøør kwäyu kanya bëëtge løø Naam Upareeti løøga, ki kanya bëëtge Ijep, ni tïnynyu Wuuö Jwøk keere.

¹⁵ 'Ba ni näk mo määnö jïïu ki man tïnynyu Wuuö Jwøk, dïcäŋi ennø, jëëtu ki jwøk mana dou tïnynyö; ni näk mo beeye juu moa tïny kwäyu kanya enge løø Naam Upareeti løøga, wala juu mo jø Amör ni bëëdu yi ŋöömge en, jierru; 'ba aani ki jø paara bëët, Wuuö Jwøk tïnywa tïnynyö.»

¹⁶ Køøre aløk jø Icrielli ni köge, ni «Ki man wecwa Wuuö Jwøk ni tïnywa juu møøk, wa ba many gø;

¹⁷ kiper beeye Wuuö Jwøk, Jwøk marwa, na käl waani wøk ki kwäcwa bëët ki yi ŋööm Ijep, paana näk po laŋ, ni beeye Jwøa tïïc ŋïïce moa døøŋŋø ni nëënö jïwa, na koor waani ki uutjïëthe bëët moa caathwa, na koor waani ki dï wïth juurre bëët moa dïge caathwa.

¹⁸ Ni ö Wuuö Jwøki ni riem wïth juurre bëët wøk nyïmwa, këël jø Amör na bëëdö yi ŋöömmi en. 'Ba ennø, waani thuwø Wuuö Jwøk tïnywa tïnynyö, kiper beeye eni na Jwøk marwa.»

¹⁹ 'Ba Jøcua aköö jï jø Icriel, ni «Uuni, ba løny jïïu ki man tïnynyu Wuuö Jwøk; kiper eni, ena Jwøk mo ena kur keere, ni ena Jwøk mo këëyö. Eni gïïa bayu ki raay mou ba wëënne.

²⁰ Ni näk Wuuö Jwøk weyu wiiø ni tïnynyu juuga path, eni acaara mare di wiilø ni tïïe ki gïn mo raac dëëtu ni dïïr wïthu, këël na bëëde ni gïn mo beer ee nø tïïc jïïu.»

²¹ 'Ba jø Icriel aköö jï Jøcua, ni «Waani Wuuö Jwøk tïnywa tïnynyö. Eni ba doo løny jïwa ki man wecwa eni.»

²² Køøre Jøcua aköö jï jø Icriel, ni «Uuni, luubö mana caannu ki dëëtu ki køør mana nø jierru Wuuö Jwøk ni eni tïnynyu tïnynyö, luubö manøgø en bäätu.» Ni köge, ni «Kare møn, waani luubö manøgø en bäätwa.»

²³ Ni kö Jøcua, «'Ba ennø, tïïyu karu ni bäär ki juuga path na en dïïu, ni cïpu cwïnynyu jï Wuuö Jwøk Jwø Icriel.»

²⁴ 'Ba jø Icriel aköö jï Jøcua, ni «Wuuö Jwøk, Jwøk marwa, tïnywa tïnynyö ni leŋwa dwøre.»

²⁵ 'Ba dïcäŋöca Jøcua atudö ki luubö ki jø Icriel, ni put kän wøk jïge ki ciik ki luup ŋøl kanya cwøl ni Cekam.

²⁶ Ni ö Jøcua ni göör luup bëët moøgø piny yi wëël ciik mar Jwøk; ni lwöte ki kïdi mo dwøŋ ni cwöth gø piny tier jaadha dwøŋ na en kanya en kur keere na näk mar Wuuö Jwøk.

²⁷ Ni kö Jøcua jï jø Icriel bëët, ni «Neennu, kïdi man en otïmö na nyuudhi kiperø, kiper luup bëët moa caan Wuuö Jwøki kiperø anø wïnynye. Kiper manøgønø, kïdi manøgø bëëdö na nyuudhi kiperu, nee Jwøk maru ba mooŋŋu.»

²⁸ Kanyøgønø, Jøcua jø Icriel awëëk wääth, ni ö ŋati man nø ni put døø yi ŋöömma no onø wëëk eni na mare.

Luum Thøw Jøcua Ki Eliedhar

²⁹ 'Ba na tïme na køør gïïögø bëët, Jøcua o Nun na näk dhaanh Wuuö Jwøk athøw, ni cwiiye dïpa ka apaar.

³⁰ Ni ö jø Icrielli ni koonyge eni yi ŋöömma no onø wëëk eni na kure, ni beeye Temna-Cëëra na en mïëya en bäät kïte na en kur jø tuuŋ Ipariem, na en jï løø wï-piny ki kïnna cwøl ni Geäc.

³¹ 'Ba jø Icriel abëëdö ni ge tïnynya Wuuö Jwøk ki yïth cwiiri bëët moa beet Jøcua ni kwøw, këël yïth cwiiri bëët moa beet jø døøk Icriel moa dööŋ ni kwøw køør thøw Jøcua, ni beege jø døøŋŋø moa ŋäc tïïe bëët moa tïïc Wuuö Jwøki kiper jø Icriel.

³² 'Ba cuu mo Jocep na kuu jø Icrielli kanya öge wøk ki Ijep aputge koony Cekam, yi thäk ŋøøpa ŋeew Jeekapi ki gwel ma dïpa baŋ wäät Eemör, ni beeye Eemör wää Cekam; ni put ŋøømmi moøgø dööŋŋe jï nyïïkwaac Jocep na kurge.

³³ 'Ba Eliedhar wär Aran athøw, ni ö jø Icrielli ni koonyge eni pääny mana cwøl ni Giba na en mïëya en bäät kïte na en kur jø tuuŋ Ipariem, ni beeye pääny mana no onø cïp jï wääde ma Piniac.