Jøcua 2 - Wëël Jwøk

Kanya Ö Jøcua Na Jääk Jerikö Ki Dïlëëwe

¹ 'Ba kanya en jø Icrielli Cëthim, Jøcua o Nun ajääk Jerikö ki jiy ariiø na dïlëëwe ki piny ni kuc, ni kööe, ni «Cou, ni liewu ŋööm Keenan këël Jerikö.» Ni ö jøøgø ni aacge ni pïïcge paanøgø po nyaan ma kääbi mo nyeŋŋe cwøl ni Reeyap, ni putge but kaace.

² 'Ba acaan jï nyeny Jerikö, ni køp, ni «Da jiy mo käla baŋ jø Icriel mo ö kuna liewge paac, mo ge ena kany yi wäär man en.»

³ Ni ö nyeny Jerikö ni jääk baŋ Reeyap ki dwøl, ni kööe, ni «Käl jiy wøk moa ö baŋï, na duny paarï kany, kiper gena öö ni ge ööa kuna liewge paac man bäre en.»

⁴ 'Ba nyaanøgø jøøgø na ariiø yøø ee nø kan. Køøre ena köö jï jøøa jääŋ nyeya, ni «Kare møn, jøøgø aö baŋa; 'ba kanya kälge yie kuua.

⁵ 'Ba kanya tïme na kany wø cïëk dhi kiir, ni pinynya wïthïënhö, jøøgø adøny wøk; ni kanya cige yie kuua. 'Ba ni näk uuno laar läp køørge, ge putu ka mak.»

⁶ 'Ba Reeyap jøøgø ee nø kïth bäät øtø maal ni kan ge tiet thiek gïna cwøl ni telba, ni wø thøøthe cwääc na abïï, moa näk ee peeth bäät øtø maal.

⁷ Ni ö jøøa jääŋ nyeya ni läpge køør dïlëëwe ni ge cøra jöö mana näk coonya dhi waath Naam Jördan. 'Ba kanya nø dunyge wøk, dhi kiir aput dëët.

Kanya Kööŋ Dïlëëwe Ki Man Kønyge Reeyap

⁸ 'Ba kanya poot dïlëëwe ni poot kär butö, Reeyap aci baŋge bäät øtø maal,

⁹ ni kööe jïge, ni «Ŋääa ni Wuuö Jwøk ŋöömmi en ee cïbö jïïu, ni wa bëëdö ni wa lwäär ki uuni døc, ni ö jøøi ni bëëdö kany bëët ii, ni bëëtge ni ge böö ki uuni.

¹⁰ Kiper awïnywa ni kanya ööu wøk ki Ijep, Wuuö Jwøk Naama Kwaar atïïe nee tale nyïmmu, ni wïnywa gïna tïïyu dëët nyeye mo jø Amör moa näk ariiø na en løø Naam Jördan løøga, ni beege Cëëwön ki Ög, na wïthge dïïrru na bäre.

¹¹ 'Ba kanya wïnywa gïnögø, cwïnywa abwøk, ni bäŋe dhaanhø aciel mo cwïnye ee maar mak kiperu; kiper Wuuö Jwøk na näk Jwøu, beeye Jwøk mo maal ki piny ena cere.

¹² 'Ba ennø, a kwaya uuni nou kööŋŋu jïra ki nyeŋ Wuuö Jwøk, ki man nyoothu bäth ec maru jï dhi øt wära kaawat mana nyoodha bäth ec mara jïïu en. Beerra man cïpu jïra ki ŋïï ma adïëri.

¹³ Weyu wära ki mera, ki nyïïmera moa näk cwøw ki moa näk mään, ki tuuŋge bëët ni kwøw, ni gwøgu jwïëcwa cer thøø.»

¹⁴ 'Ba jøøgø aköö jï Reeyap, «Ni näk mo gïno caanwa en ba tïïcwa, beerra man ö Wuuö Jwøki ni ŋøl luubö manøgø bäätwa ni 'näk waani. Ennø, ni näk mo gïn tïïcwa en ba caanï, kanyo ö Wuuö Jwøki noo cïp ŋöömmi jïwa, bäth ec marwa nyoothwa nyoodhø jïrï ni tïïcwa adïëri kiperï.»

¹⁵ Køøre Reeyap dïlëëwe atïïe nee ge løøcge piny ŋää kiir ki ri thøøl ni ge løøc piny ki dha awëërnyeŋ, kiper øtø mare ena dëër kiir mar paanøgø, ni eni bëëdö dëër kiir.

¹⁶ 'Ba kanya poot dïlëëwe ni poot kär ci piny, ena köö jïge, ni «Cou bäät kïdi kiper nou ba joot jøøa läp køøru, ni kannu dëëtu kunece ki nïne adäk, këël kanyo duuge. Køøre nø, uuno aay ki jöö mana manynyu.»

¹⁷ 'Ba dïlëëwe aköö jï Reeyap, «Ni näk gïn caanwa en ba tïïyï, kööŋ mana wëëgï wa kööŋ ki gø tïmö ni tøør bäätwa.

¹⁸ Ennø, kanyo öwa yi ŋöömmi, waarø man ni kwaar en wär twöö dha awëërnyeŋ mano tïïyï wa nee wa løøcwa piny ki yie, ni cooŋï tuuŋu yi øtø marï, ni beege wäru ki meru ki nyïïmeru moa näk cwøw ki dhi øt wäru bäre.

¹⁹ 'Ba kar kaace, ŋato duny wøk ki yi ødï ni ci wøk, thøø mano tägi ree ena bääte keere, ni dööŋwa wøk ka ajäl thøø mar ŋatøgø. 'Ba ni näk ma ŋat mo ena yi øtø ki ïïni ciel onääö, ajäl thøø mar ŋatøgø tïmö ni ena bäätwa.

²⁰ 'Ba ni näk mo gïn tïïcwa en caanï caanø, kööŋ mana wëëgï wa kööŋ ki gø tïmö ni tøør bäätwa.»

²¹ Køøre Reeyap aköö, ni «Tïme na kare ki køør döötu moa caru yøø.» Ni put geni wëëk wääth ni aacge. Ni ö Reeyapi ni twöö waanynya kwaar dha awëërnyeŋ.

²² 'Ba dïlëëwe atïŋŋö ni pïïcge bäät kïdi, ni bëëtge kaace ki nïne adäk, këël mana duu jøøa läp køørge. 'Ba jøøa läp køør dïlëëwe, dïlëëwe amanyge waŋjöö bäre; ni kärge dïlëëwe joodø.

²³ Køøre dïlëëwe moø na ariiø yøø alööny piny ki bäät kïdi nee ge døøkge, ni ŋutge løøga ni pïïcge baŋ Jøcua o Nun, ni parge jammi bëët jïgø, ni beege jammi moa tägö dëëtge.

²⁴ Ni köge jï Jøcua, ni «Ka adïëri møn, Wuuö Jwøk ŋöömmöce bäre ee cïbö jïïø, ni ö jøøke bëët ni bëëdö yi ŋöömmöce yøøke, ni bëëtge ni ge böö døc ki øøni.»