Jøcua 14 - Wëël Jwøk

Luum Pääŋ Ŋøøm Moa En Løø Naam Jördan Jï Løø Kur Pänh-Cäŋ

¹ 'Ba moi beege ŋøøm moa en yi ŋööm Keenan, na en løø Naam Jördan jï løø kur pänh-cäŋ, na pääŋŋi jï jø Icriel nee dööŋe jïge na kurge; ni jøøa pääŋ ŋøøm moøgø beege Eliedhar na näk Kwääy Lam Mana Dwøŋ, ki Jøcua o Nun, ki dïbwöthe mo wïth tuŋi mo jø Icriel.

² 'Ba ŋøøm moøgø apääŋŋi jï wïth tuŋi moa näk abïŋween ki thääŋö na ŋøøpo dööŋ jïge na kurge, ni pääŋŋi ka køør ŋïïce mo wø tïïc ki ri kwääk ki baw, kaawat mana nø caani ya Wuuö Jwøki ki dhi Modhe.

³ Kiper Modhe wïth tuŋi moa näk ariiø ki thääŋö, ŋøøm mo dööŋ jïge na kurge ee nø cïp jïge løø Naam Jördan løøga. 'Ba eni jø tuuŋ Libay käre mooø ki ŋøøm na ŋøøpo dööŋ jïge na kurge kanya cïp ŋøøm jï wïth tuŋi moøgø.

⁴ 'Ba kanya pääŋ ŋøøm jï wïth tuŋi mo jø Icriel, këël na bëëde ni jø tuuŋ Libay kär mooø ki ŋøøm, kwään wïth tuŋi mo jø Icriel moa jïtö ki ŋøøm poot di kwaanø na apaar kurriiø kiper mana kwaan wäät Jocep na wïth tuŋi ariiø, ni beege tuuŋ Maneeca ki tuuŋ Ipariem. 'Ba beege päänye keerge na cïp jï jø tuuŋ Libay na kwör bëëte moge, ki kwör kwaath mo kwaacge lääc paac moge yïthge.

⁵ Kar kanyøgønø, jø Icriel ŋøøm aputge pääŋŋö na kare, kaawat mana ö Wuuö Jwøki na kööm Modhe.

Kanya Cïp Pääny Keeprön Jï Kalëp

⁶ 'Ba kanya poode ni ŋøøm poot kär pääŋŋö, jø tuuŋ Juuda aö nyïm Jøcua kanya enge Gëlgela. 'Ba Kalëp o Jöpöni nyikwaar jø Kënec aköö jï gø, ni «Ïïni, dwør Wuuö Jwøk mana caane jï Modhe na näk dhaanh Jwøk ŋäyï, ni dwørøgø caane kiperø ø riedi kanya enø Kadëc-Bernia.

⁷ 'Ba aani cwiiya pïëraŋween kar kaace, kanya ö Modhe na näk dhaanh Wuuö Jwøk na jääŋ øøni ki Kadëc-Bernia nee ŋööm Keenan lieø. 'Ba aani luup moa duua ki geni akøba jïre na adïëri ki cwïnya bäre.

⁸ 'Ba nyïïmëëe moa aaø ki geni na aciel cwïny lwaa Icriel awëëkge pädhö ki lwär; 'ba aani jöör Wuuö Jwøk na näk Jwøa aputa caath ki cwïnya bäre.

⁹ Ni ö Modhe ni put kööŋ jïra dïcäŋeca, ni kööe, ni ‹Ka adïëri møn, ŋöömma nyøønï ki tierï enø ocïba na ŋöömmo dööŋ jïrï ki nyïïkwaayï na bäre bäre, kiper ïïni jöör Wuuö Jwøk na näk Jwøa acaathï ki cwïnyï bäre.›

¹⁰ «'Ba ennø, neenï, ki mana ö Wuuö Jwøki na caan luummögø jï Modhe, cwiiri apäŋ ni pïëraŋween kurbïïc, ni dwørøgø caane kanya cääth jø Icrielli dï paap; ni ö Wuuö Jwøki ni wec aani naa poot kwøw këël kar kany ennø, kaawat mana caane. 'Ba ennø, cwiiri 'moa beege pïërabära kurbïïc.

¹¹ 'Ba aani dëëra poot teek ni caala kanya ö Modhe na jääŋ aani kar kaaca; ni teek mar dëëra poot caala mana dïkwøŋ, ni løny jïra ki man cøøa baŋ leny; këël tïïe bëët mo wø tïïc løny jïra thuwø.

¹² 'Ba ennø, akwaya ïïni, nee mïëyö ni en bäät kïte yøø cïpï jïra. Ni beege mïëya cään Wuuö Jwøki kiperge kar kaaca. Kiper kar kaaca thuwø ŋäyï ni jø Anak bëëdö kaace, ni päänye moge døøŋŋø, ni ege geerø ni teek døc; 'ba yaa ŋäädhö ni Wuuö Jwøk oen buuta, nee tïme ni løny jïra ki man riema ge wøk, kaawat mana nø caani ya Wuuö Jwøki.»

¹³ Kanyøgønø, Jøcua Kalëp o Jöpöni agwïëdhe, ni cïp pääny Keeprön jïgø na ŋöömmo dööŋ jïre na kure.

¹⁴ Kiper manøgønø, pääny Keeprön aput tïmö ni beeye ŋöömma dööŋ jï Kalëp o Jöpöni, nyikwaar jø Kënec, këël dïcäŋi en, kiper eni jöör Wuuö Jwøk Jwø Icriel acaadhe ki cwïnye bäre.

¹⁵ 'Ba nyeŋ Keeprön mana dïkwøŋ beeye Kiriat-Arba; kiper ŋata cwøl na Arba, na caa pääny manøgø ree, beeye dhaanhø mo dwøŋŋa eni døc røk jø Anak kar kaaca. Køøre piny aput nikwöc, ni ö jiyi ni jwömge dëëtge ki leny.