Jøcua 11 - Wëël Jwøk

Kanya Ö Jøcua Na Bööt Jabin Nyeny Adhör Ki Nyeye Møga

¹ 'Ba kanya ö Jabin nyeny Adhör na wïny gïïa tïïc jø Icrielli, ena jääk baŋ Jöbap nyeny Madön, ki nyeny Cimrön, ki nyeny Akcap,

² ni jääk baŋ nyeye moa näk bëëdö mïëya en bäät kïte na en jï kuna en wï-piny, ki moa en mïëya en yi goor Jördan ni wø cwøl na Araaba na en jï løø tier-piny ki Puur Kinërët, ki moa en ŋöömma näk ree ee päärö, ki moa en mïëya en bäät kïnna cwøl ni Dör na en jï løø kur pänh-cäŋ;

³ ni jääk baŋ jø Keenan thuwø na en jï løø kur tuul-cäŋ ki moa en jï løø kur pänh-cäŋ, ki jø Amör ki jø Këth ki jø Përec ki jø Jeebuc na näk bëëdö mïëya en bäät kïte, ki jø Ëwi na näk bëëdö tier kïnna cwøl ni Armön yi kanya cwøl ni Micpa.

⁴ Ni ö nyeye moøgø wøk, ni beege geni ki jø leny moge bëët, ni ge thööth døc ni caala nyeŋ akwöny deŋ naama dwøŋ, ni jïge doo okwëënyi ki jïëthe mo wø tut okwëënyi mo thööth døc.

⁵ Køøre nyeye moøgø bëët rege adwalge, ni öge ni tïïcge twïër marge na aciel buut puura cwøl ni Marön, nee këëtge ki jø Icriel.

⁶ 'Ba Wuuö Jwøk aköö jï Jøcua, ni «Kär niï lwäyö ki jøøgø, kiper diøø kar kany nø, geni bëët ge cïba cïbö nee ge 'näk jø Icrielli; 'ba ïïni ojwönyi mo okwëënyi moge ŋøørï ŋøørø, ni ö jïëthe moge mo wø tut okwëënyi ni waaŋï geni ki maac.»

⁷ Køøre Jøcua ki jø leny bëët mo jø Icriel na cäädhö ki eni, gena pïï dëët jøøgø ni cwöba rege kanya enge yie buut puur Marön, ni ö jø Icrielli ni putge jøøgø tuk.

⁸ 'Ba Wuuö Jwøk jøøgø aput cïp ceŋ jø Icriel, ni ö jø Icrielli ni putge jøøgø böötö, ni riemge ge këël mana pïïcge pääny mana dwøŋ na cwøl ni Caydan, ni pïïc møga Micerepöth-Mayim, ni pïïc møga goor Micpa na en jï løø kur tuul-cäŋ; ni putge jøøgø 'näk këël mana tïme ni bäŋ dhaanhø aciel mo ege wiiø ni kwøw.

⁹ Ni ö Jøcua ni ŋøør ojwönyi mo okwëënyi, ni ö jïëthe moge mo wø tut okwëënyi ni waaŋ geni ki maac; ni tïïe na kare kaawat mana caani ya Wuuö Jwøki jïre.

¹⁰ 'Ba kar kaaca Jøcua ree aløøe ni duu ŋääe ni mac päänya cwøl na Adhör, ni 'näk nyeya mar paanøgø ko opëëllö; kiper Adhör beeye pääny mo dwøŋŋa eni dïkwøŋ røk päänye bëët moa bëët nyeye yïthge kaagø.

¹¹ Ni ö jø Icrielli ni 'näkge jiy bëët moa en yi päänyögø ko opëëllö, ni putge wïth jøøgø dïïr na bäre bäre; 'ba bäŋ dhaanhø mo owiiø ni kwøw. Ni ö Jøcua ni nyep päänya cwøl na Adhör ki maac.

¹² 'Ba Jøcua päänye mo nyeye moøgø bëët aput mac, ni mak nyeye moge bëët, ni put geni 'näk ko opëëllö, ni dïïr wïthge na bäre bäre, kaawat mana ö Modhe na näk dhaanh Wuuö Jwøk na kööm eni.

¹³ 'Ba jø Icriel bäŋ paac mør mo ege waaŋø këët røk mïëya en bäät thuuri kaagø; 'ba beeye Adhör keere na waaŋ Jøcua.

¹⁴ 'Ba jø Icriel gïïa twierge mïëri moøgø bëët, këël lääc paac, akälge na moge; 'ba geni jiy bëët anäkge ko opëëllö, këël mana dïïrge wïthge, ni bäŋ dhaanhø aciel mo ege wiiø ni kwøw.

¹⁵ 'Ba kaawat mana ö Wuuö Jwøki na kööm dhaanhnhe ma Modhe, ni ö Modhe ni kööm Jøcua, eni na Jøcua enø, gïïögø bëët aput tïïc na karge, ni bäŋ gïn mo ee wiiø ni käre tïïö røk gïïa ö Wuuö Jwøki na kööm Modhe ki ge.

Kwöra Mac Jøcua Ri Leny

¹⁶ Kanyøgønø, Jøcua ŋöömmögø bäre aput mac; ni beege mïëya en bäät kïte na en jï løø tier-piny, ki mïëya en Nëgëp bëët, ki ŋööm Göcën bäre, ki mïëya en ŋöömma näk ree ee päärö, ki goor Jördan ni wø cwøl na Araaba, ki mïëya en bäät kïte na en jï løø wï-piny, ki ŋöömma en buute na näk ree ee päärö.

¹⁷ 'Ba ŋöömö manøgø tägi ka ri Kïn Alak, na en buut Cëër, këël mana këët Baal-Gaat na en goor Libaanø tier Kïn Armön. Ni ö Jøcua ni mak nyeye mo mïëri moøgø bëët ni 'näk geni.

¹⁸ 'Ba Jøcua akän wøk ki kany mo bäär ni këëdö ki nyeye moøgø bëët.

¹⁹ 'Ba kar kaaca bäŋ paac mo ojïëy ki man bëëtge ki bëët-mëër ki jø Icriel, 'ba beege jø Ëwi moa bëëdö Gibien keerge. Ni ö jø Icrielli ni putge mïëri moøgø bëët mac ri leny.

²⁰ 'Ba beeye Wuuö Jwøk na tïïc cwïny jøøgø ni teek, nee öge baŋ leny ki jø Icriel, nee wïthge put dïïr na bäre bäre ni bäŋ bäth ec mo onyoodhø jïge; 'ba wïthge aput dïïr, kaawat mana ö Wuuö Jwøki na kööm Modhe.

²¹ 'Ba kar kaaca Jøcua acøø ni 'näk jø Anak na bëëdö mïëya en bäät kïte, ni beege mïëri moa näk cøøri ni Keeprön, ki Dabëër, ka Anap, këël mïëri bëët moa en bäät kïte moa en buut piny man ki maya. Jøøgø wïthge aput Jøcua dïïr na bäre bäre ni raany mïëri moge,

²² këël mana tïme ni bäŋ jø Anak mo odööŋ ni kwøw yi ŋööm jø Icriel; 'ba beege mo nøk keerge na dööŋ Geedha, ki Gëth, ka Acdöt.

²³ Kanyøgønø, Jøcua ŋöömö bäre aput mac, ki køør mana caan Wuuö Jwøki jï Modhe; ni ö Jøcua ni cïp ŋöömö jï jø Icriel na ŋöömmo dööŋ jïge, ni pääŋ gø jïge ki køør wïth tuŋi moge. Køøre piny aput nikwöc, ni ö jiyi ni jwömge dëëtge ki leny.