Jøcua 10 - Wëël Jwøk

Kanya Ö Jø Icrielli Na Böötge Jø Amör

¹ 'Ba na tïme na kaagø, awïny Adöni-Dhëdek nyeny Jerucalem ni Jøcua pääny Gaay ee nø mac ni raany gø na bäre bäre, ni tïïc teeŋ gïna tïïe dëër pääny Jerikö ki nyeya mare dëër pääny Gaay ki nyeya mare; ni wïny gø thuwø ni jø Gibien, na poge en buut jø Icriel, ajïëy ki man bëëtge ki bëët-mëër ki jø Icriel.

² 'Ba kanyøgønø, Adöni-Dhëdek ki jiye, gena lwäyö døc, kiper Gibien beeye pääny mo dwøŋ ni caala päänye moa en ceŋ nyeye kaagø, ni dwøŋŋa eni ki pääny Gaay; ni jø leny moa en yie bëët teek døc.

³ Kiper manøgønø, Adöni-Dhëdek nyeny Jerucalem ajäägö ki dwøl baŋ Owam nyeny Keeprön, ki Piram nyeny Jërmut, ki Japia nyeny Lakic, ki Dabëër nyeny Ëglön, ni kööe,

⁴ ni «Ööu baŋa ni kønynyu aani, nøø cøø baŋ jø Gibien nøø këëdø ki geni, kiper geni gena nø jïëy ki man bëëtge ki bëët-mëër ki Jøcua ki jø Icriel.»

⁵ Køøre nyeye mo jø Amör moøgø na abïïc yøø, ni beege nyeny Jerucalem, ki nyeny Keeprön, ki nyeny Jërmut, ki nyeny Lakic, ki nyeny Ëglön, geni bëët ki jø leny moge dëëtge adwalge ni öge ni tïïcge twïër marge buut Gibien nee këëtge ki ge.

⁶ Køøre jø Gibien ajääk baŋ Jøcua ki dwøl kanya näk jø Icriel twïër marge ege tïïö yie Gëlgela, ni köge, ni «Kär wa weyï jaak; køny waani, wa na laaŋe moï. Ennø laar rwänh baŋwa ni gwøgï jwïëy mowa ni kønyï wa, kiper nyeye mo jø Amör bëët na näk bëëdö mïëya en bäät kïte dëëtge adwalge nee këëtge ki waani.»

⁷ Ni ö Jøcua ni tïŋŋe Gëlgela, ni beeye eni ki jø leny bëët, ni jø leny moa näk teek marge okadhø nutö dïge thuwø.

⁸ Kanyøgønø, Wuuö Jwøk aköö jï Jøcua, ni «Kärï lwäyö ki geni, kiper geni ge yaa nø cïp cerï; 'ba bäŋ dhaanhø aciel dïge mo maara lønyø jïre ki man cuŋŋe nyïmï kanyo tïme na ri leny.»

⁹ 'Ba Jøcua atïŋŋö Gëlgela ni but ri wääth ni put pïï røk jø Amör ni cwöba rege.

¹⁰ Ni ö Wuuö Jwøki ni kier wïth jø Amör ni tïïc ge nee bwøkge nyïm jø Icriel, ni ö jø Icrielli ni böötge jø Amör døc Gibien, ni riemge geni ki jöör Bëëth-Örön ni ge iitha thuur, ni ŋwiecge køørge ni 'näkge geni këël mana pïïcge mïëri moa näk cøøri na Adhëka ki Mekëëda.

¹¹ 'Ba kanya rïïŋ jø Amörri ni ge ŋwieya jø Icriel, Wuuö Jwøk pey mo døøŋŋø døc mo caala kïte alëëŋe ki maal, ni leeŋ ge bäät jø Amör, ni tägi ka kanya løøcge piny ki Bëëth-Örön, këël mana pïïcge Adhëka, ni putge thøø; 'ba atïmö ni thöötha jiy moa thøw ki pey moøgø na näk caala kïte yøø, ki jiy moa 'näk jø Icrielli ko opëëlle.

¹² 'Ba ni poot na dïcäŋ mana ö Wuuö Jwøki na cïp jø Amör ceŋ jø Icriel, Jøcua acäänö ki Wuuö Jwøk, ni caan luup moi ii ki teek Jwøk ni nëënö jï jø Icriel, ni kööe, ni «Wui cäŋ, put bëëtö niï cuŋŋö bäät Gibien, 'ba ï na dwääy, put bëëtö niï cuŋŋö bäät goor Ayalön.»

¹³ Ni ö cäŋŋi ni put bëëtö kare ni cuŋŋö, ni ö dwääyi ni put ruuö kare thuwø, këël mana ö jø Icrielli ni putge wïth nyïïmänge dïïr. 'Ba luubö manøgø beeye luubö mana no ogöörö yi wëëlö mana cwøl ni Jacar. Kanyøgønø, cäŋ aput ruuö dhöör, ni put bëëtö ni kär laar pädhö ki kany mo yie caala dïcäŋ aciel bäre.

¹⁴ 'Ba bäŋ teeŋ dïcäŋ mo oruu mo caala manøgø dïkwøŋ, ni bäŋ teeŋ gïnögø mo otägö køøre këët, ki mana ö Wuuö Jwøki na wïny dwør dhaanhø; kiper beeye Wuuö Jwøk na këëdö kiper jø Icriel.

¹⁵ Køøre Jøcua ki jø Icriel bëët gena duu twïër kanya bëëtge yie Gëlgela.

Kanya Ö Jøcua Na Mak Nyeye Mo Jø Amör Moa Näk Abïïc

¹⁶ Kanyøgønø, nyeye moøgø na abïïc yøø geno nø reeŋø ni kange dëëtge yi øt kïdi mana en buut Mekëëda.

¹⁷ 'Ba acaan jï Jøcua, ni køp, ni «Nyeye moa näk abïïc be, ajoot ni dëëtge ege kanø yi øt kïdi mana en buut Mekëëda.»

¹⁸ 'Ba Jøcua aköö, ni «Lwötu ki kïte mo døøŋŋø ni ŋielu ge dhi øt kïdi manøgø, ni kwänyu ki jiy nee bëëtge kaagø ni ge koora nyeye moøgø.

¹⁹ 'Ba uuni ki dëëtu kiree käru bëëdö kaagø; cou ni läpu køør nyïïmännu, ni 'nägu moo maau waŋjöö na näk odööŋ cään. 'Ba ge kär weyu nee reŋge yïth päänye moge, kiper Wuuö Jwøk na näk Jwøu jøøgø ee nø cïp ceŋŋu.»

²⁰ 'Ba kanya tïme ni Jøcua ki jø Icriel jø Amör ege nø thöör ki 'näk, këël mana dïïrge wïthge, ni moa bøth dëëtge onø reŋ yïth päänye moa no ogeerø ni teek,

²¹ kanyøgønø, jiy bëët aput duu twïër baŋ Jøcua paana cwøl ni Mekëëda ni dëëtge jööt. 'Ba ki dëët wïth juurre moa en kaace, bäŋ dhaanhø aciel dïge mo dhee ee maar tuk ki jø Icriel.

²² Køøre Jøcua aköö, ni «Japu dhi øt kïdi nø, ni kälu nyeye moøgø na abïïc yøø wøk baŋa.»

²³ Ni ö jøøgø ni putge gïnögø tïïc, ni kälge nyeye moøgø na abïïc yøø wøk baŋe ki yi øt kïdi; ni nyeye moøgø beege nyeny Jerucalem, ki nyeny Keeprön, ki nyeny Jërmut, ki nyeny Lakic, ki nyeny Ëglön.

²⁴ 'Ba kanya nø ö jøøgø na kälge nyeye moøgø baŋ Jøcua, Jøcua jø leny mo jø Icriel bëët acwøle, ni kööe jï kwääc lwaae mo leny moa aay ki eni, ni «Nyänhnhu kany mo cään, ni këëllu othäc tietu ŋut nyeye moøgø.» Ni ö kwääc lwaae moøgø ni öge kany mo cään ni këëlge othäc tietge ŋut nyeye moøgø.

²⁵ Køøre Jøcua aköö jï kwääc lwaae moøgø, ni «Käru lwäyö, ni ba bwøk cwïnynyu. Magu rou ni bëëdu nou teek, kiper teeŋ gïnögø poot tïïc Wuuö Jwøki tïïö dëët nyïïmän mou bëët moo këëdu ki geni.»

²⁶ Køøre nø, Jøcua nyeye moøgø aput 'näk, ni lïër geni røk jenni abïïc; ni putge bëëtö ni geno lïërö këël mana tïm pinynyi na abøøya.

²⁷ 'Ba kanya päth cäŋŋi piny, Jøcua acïpö ki dwøl, ni cige ni kälge dëët jøøgø wøk ki røk jenni ni leeŋge ge yi øt kïdi mana ö nyeye moøgø na kange dëëtge yie, ni putge kïte mo døøŋŋø löör dhi øt kïdi manøgø; ni kïte moøgø poot nut këël dïcäŋi en.

Kanya Ö Jøcua Na Mac Mïëri Moa Thööth Møga

²⁸ 'Ba Jøcua pääny Mekëëda amaae ni poot na dïcäŋögø; ni 'näk nyeya mar gø ki jiy moa en yie bëët ko opëëllö, ni dïïr wïthge bëët, ni bäŋ dhaanhø mo ee wiiø ni kwøw. 'Ba Jøcua teeŋ gïna tïïe dëër nyeny Jerikö atïïe dëër nyeny Mekëëda thuwø.

²⁹ Køøre Jøcua ki jø Icriel bëët moa näk jø leny na cäädhö ki eni, gena pöödhö ki Mekëëda ni cige Libana, ni këëtge ki jø Libana.

³⁰ 'Ba Wuuö Jwøk pääny manøgø ki nyeya mare acïp ceŋ jø Icriel thuwø; ni ö Jøcua ni 'näk jiy bëët moa en yie ko opëëllö, ni bäŋ dhaanhø mo ee wiiø ni kwøw. 'Ba Jøcua teeŋ gïna tïïe dëër nyeny Jerikö atïïe dëër nyeny pääny manøgø.

³¹ 'Ba Jøcua ki jø Icriel bëët na cäädhö ki eni, gena pöödhö ki Libana ni cige Lakic, ni tïïcge twïër marge buute ni këëtge ki jø paanøgø.

³² Ni ö Wuuö Jwøki ni cïp pääny Lakic ceŋ jø Icriel; ni ö Jøcua ni mac Lakic ri riet nïne, ni 'näk jiy moa en yie bëët ko opëëllö, ni tïïc gïnögø ni caala teeŋ gïïa tïïe bëët dëër päänya cwøl ni Libana.

³³ Kanyøgønø, Oram nyeny Gëdher aöö nee jø Lakic kønye, ni ö Jøcua ni 'näk nyeny Gëdher ki jiye bëët këël mana tïme ni bäŋ dhaanhø aciel mo ee wiiø ni kwøw.

³⁴ 'Ba Jøcua ki jø Icriel moa näk jø leny na cäädhö ki eni, gena pöödhö ki Lakic ni cige Ëglön, ni tïïcge twïër marge buute ni këëtge ki jø paanøgø.

³⁵ Ni macge paanøgø ni poot na dïcäŋ manøgø, ni 'näkge jiy moa en yie ko opëëllö, ni ö Jøcua ni dïïr wïth jiy moa en yie bëët ni poot na dïcäŋ manøgø keere, ni tïïc gïnögø ni caala teeŋ gïïa tïïe bëët dëër päänya cwøl ni Lakic.

³⁶ Køøre Jøcua ki jø Icriel bëët moa näk jø leny na cäädhö ki eni thuur agamge ki Ëglön ni cige Keeprön, ni këëtge ki jø paanøgø.

³⁷ Ni macge paanøgø, ni 'näkge nyeya mar gø ki jiy bëët moa en yie ko opëëllö, këël jiy bëët moa en atude moa en deŋ paac manøgø. Ni ö Jøcua ni 'näk jiy bëët, ni bäŋ dhaanhø mo ee wiiø ni kwøw, ni tïïc gïnögø ni caala teeŋ gïïa tïïe bëët dëër päänya cwøl ni Ëglön. 'Ba Jøcua pääny manøgø aput raanynyø na bäre bäre ni dïïr wïth jiy bëët moa en yie.

³⁸ Køøre Jøcua ki jø Icriel bëët moa näk jø leny na cäädhö ki eni, gena duu paana cwøl ni Dabëër, ni këëtge ki jø paanøgø.

³⁹ Ni ö Jøcua ni mac paanøgø ki nyeya mare këël päänye moa en deŋŋe bëët; ni ö jø Icrielli ni 'näkge jiy bëët moa en mïëri moøgø ko opëëllö, ni dïïrge wïthge bëët. 'Ba Jøcua bäŋ dhaanhø mo ee wiiø ni kwøw. 'Ba teeŋ gïna tïïe dëër paana cwøl ni Keeprön ki paana cwøl ni Libana ki nyeye moge, atïïe dëër paana cwøl ni Dabëër ki nyeya mare thuwø.

⁴⁰ Kanyøgønø, Jøcua mïëri moa en yi ŋöömmögø bëët amaae, ni beege mïëri moa en bäät kïte, ki moa en kanya cwøl ni Nëgëp, ki mïëri moa en yi ŋöömma näk ree ee päärö, ki mïëri moa en deŋ kïte, ni put nyeye moge bëët 'näk. 'Ba Jøcua wïth jiy bëët adïïre, ni bäŋ dhaanhø mo ee wiiø ni kwøw, kaawat mana ö Wuuö Jwøki Jwø Icriel na kööm eni.

⁴¹ 'Ba Jøcua mïëri moøgø amaae ni tägi ka Kadëc-Bernia këël mana këët Geedha, ki mïëri bëët moa en Göcën këël mana këët Gibien.

⁴² Ni ö Jøcua ni put nyeye moøgø bëët ki mïëri moge mac yie aciel, kiper Wuuö Jwøk na näk Jwø Icriel beeye eni na këëdö kiper jø Icriel.

⁴³ Køøre Jøcua ki jø Icriel bëët moa näk jø leny na cäädhö ki eni gena duu twïër kanya bëëtge yie Gëlgela.