Jeremaya 6 - Wëël Jwøk

Luum Räny Paac Mano Tägi

¹ «Wui, u na jø Benjamen, reŋŋu wøk ki dï Jerucalem, nou kwøwu! Koothu tuŋi Tëköa, ni tïŋu ŋïï maal yi Bëëth-Akarim, kiper gïn mo leth öö ki wï-piny, ni beeye ränynyö mo päl.

² Jerucalem ni wø bëëdö kaamar nyakøø mo mïërö, mo bëëdö ni jwøny, oraanynya.

³ Kwääc lwaae mo leny ki lwaae moge oööi kaamar dïkwääc dïëk mo käära pïïth dïëk, ni cielge Jerucalem dïër, ni gurge oduŋkaare moge piny lak gø bäre, ni cïïmge lwaae moge nee ŋati man nø tuge ki kare.

⁴ Ni köge, ni ‹Jiiŋŋø røø nøø këëdø ki paanøgø; öö maal ni tuuø paanøgø ki dhöör dïcäŋ.› 'Ba køøre ge köö, ni ‹Leny aränynyö, kiper cäŋ anø tïmö ni thiinh ni kwaara piny.

⁵ 'Ba ennø, öö maal ni tuuø paanøgø ki wäär, ni raanynyø kwör leny moe moa no ogeerø ni teek.› »

⁶ Kiper luumma caan Wuuö Jwøki, eni na wïth jammi bëët, beeye en, ena köö, ni «Ŋøtu jenni moa en lak Jerucalem na mo thør, ni thørru bäätge ki ŋøøm man eth bäät kiir ki gø. Pääny man beeye pääny mo di raanynyø, kiper jiy bëëdö ni di caannø dïëre bäre.

⁷ Jerucalem bëëdö ni gïï mo reyø nøøye nøøyø ki tïïc, kaawat man wø bëët iithi ni cwïër ki pïï cooth; ni caan jiy ka aranya joota yie, ni gïï wø nëëni jïra yie cooth beege täwe ki ŋwiili.

⁸ Ï na Jerucalem, ï köömmi; 'ba ni näk miï ba köömmi, ø pääö ki ïïni, ni tïïa ïïni na paac mo owii kur keere, na ŋöömö mo ba beet.»

⁹ Mana caan Wuuö Jwøki, eni na wïth jammi bëët, beeye en, ena köö, ni «Dëëci ööi ni lemge jø Icriel moa dööŋ, kaawat man wø lem nyïïomøki moa no obøth ki pøn; kaawat man wø ö dïpun nyïïomøki wø dat bäät bat jaath man nø.»

¹⁰ 'Ba aana köö, na «?Aŋa noo luumma noo köömma, nee luumma wïnynye? Ka adïëri møn, ïthge ege cïëgö, ni ba løny jïge ki man cekge ïthge. Ennø, luum Wuuö Jwøk atïmö ni jääla geni, ni tïm yïthge ni ba met ki gøøni.

¹¹ 'Ba aani, wëër mar Wuuö Jwøk na liel bäätge kaamar maac, atïmö ni dagø cwïnya thuwø, ni tïme ni ba løny ki kan.» Ni kö Wuuö Jwøki jïra, ni «Kïth wëër mara bäät obwöre moo en dï paac, ki bäät wøpe moo en wïth mäc. Dïcwøø ki cïïe karge riet omak ki tøŋ, ni käl jäle, këël jäle moa døøŋŋø døc thuwø.

¹² Uudi moge ki pwöth moge ki mään moge omëëk jø møøk, ni manøgø beeye ajäla mano käla bäätge ni wø bëëdö yi ŋöömmi en. Luummögø caana aani, a na Wuuö Jwøk.

¹³ Kiper ki mana täge ki jiy moa kwörge bäŋgø, këël mana pïïe ri jøøa kwörge døøŋŋø, ŋati man nø atïmö ni cwïnye päl ki jammi mo joot ki jïëth atade. Këël nyïïkuk Jwøk ki dïlämme bëët, ŋati man nø atïmö ni tïïya tïï cwøk.

¹⁴ Gïï wø raany paac ataakge na gïn mo jööt jaak, kaawat man wø taak ŋwellø dëër dhaanhø, ni ge wø köö, ni ‹Paac beer jaak,› këël na bëëde ni bëët paac raac.

¹⁵ ?Aŋø, wïthge alääö ki gïna tïïcge na raac eci ki gø? Jïre bäär, wïthge kär lääö na bäre, ni nyeŋge kär tïmö ni law. Kiper manøgønø, kanyo jääla geni, ge puta ränynyö, ni thøwge ki jiy na aciel.» Luummögø caana Wuuö Jwøki.

¹⁶ Luumma caan Wuuö Jwøki jï jiye beeye en, ena köö, ni «Cuŋŋu ya agääk jïëthe, ni raŋŋu gø døøc, ni pëënynyu uutjïëtha cääŋŋe, man näk mo jööra beer a mane, ni putu wääth ki yie; køøre uuno jïti ki jwömö ki yïth cwïnynyu. 'Ba uuna köö, ni ‹Jïwa bäyö, wa ba cäädhi ki yie.› »

¹⁷ Ni kö Wuuö Jwøki, ni «Aana cïpö ki dïkuye jïïu mo koora uuni, ni kööa, ni ‹Cegu ïthu kanyo koothge tuuŋ!› 'Ba uuna köö, ni ‹Jïwa bäyö, ïthwa ba cekwa.› »

¹⁸ Kiper manøgønø, Wuuö Jwøk aköö, ni «U na wïth juurre, cegu ïthu, ni ŋäyu gïno tägi dëët jiya.

¹⁹ Wui, ï na piny, wïny gïn: Ka adïëri møn, a känna bäät jøøi ii ki gïn mo leth, ni beeye gïno duu acaare moge na reyø, kiper ïthge kärge ciiø ki luup 'moa, ni kweerge ki ciik 'moa thuwø.

²⁰ ?U na jiya, aperŋø nø ni wø kännu baŋa ki dwøø man wø jïye ŋwääi ni met ki yi Cïïba en? ?Na aperŋø thuwø ni wø kännu baŋa ki luum wø maare ŋwääi ni met ki paac mo kare bäär en? Olämme mou mo wø waaŋ bäre a ba jïëy ki geni, ni yia ba mïnni thuwø ko olämme møøk mo wø cïpu.»

²¹ Kiper manøgønø, luumma caan Wuuö Jwøki beeye en, ena köö, ni «Ennø, nyïm jøøi ii okïtha ki gïï mo cwanynya tietge, ni ö wëëe ko obwöre, ki jø atut ki nyïïawäädi, ni cwanyge tietge dëët gïïögø, ni putge ränynyö.»

²² Luumma caan Wuuö Jwøki beeye en, ena köö, ni «Ka adïëri møn, da wï jur mo öö ki yi paana en wï-piny, ni beeye wï jur mo teek mo ööa maal mo käla paac mo bäär.

²³ 'Ba ceŋge da athëëre ki tøøŋi. Gena jiy mo näk marge raac døc, ni cwïnyge ba pädhi ki näk dhaanhø, ni döötge lwör ni caala pï naama dwøŋ. Ge cäädhi ka bäät okwëënyi, ni dëëtge ege täärö kiper leny, ni ge ööa kuna tukge uuni, u na jø Dhayan!»

²⁴ Waani gïna caan kiper jø leny moøgø awïnywa, ni ö bäätwa ni päthge, ni ö lwärri mo dwøŋ ni mak waani, ki rääm mo caala rääm dhaagø mo ree da mäc lwaar.

²⁵ Käru ci yïth pwöth, ni ba cäädhu uutjïëthe, kiper nyïïmän 'moø ceŋge da tøøŋi, ni lwär mo dwøŋ piny ee pääŋö bäre.

²⁶ Wui jø pøø, røøu keeca dëëtu, ni buugu dëëtu ki bur. Jwöŋu døc kaamar dhaanhø mo jwøga wääde ma aciel; jwöŋu ni cwïnynyu you keeyø døc, kiper ŋato raany øøni laara ö bäätø.

²⁷ Wuuö Jwøk aköö, ni «Ï na Jeremaya en, ïïna cïba dï jiya nee röökge raŋï kaamar ŋat wø päär nywïënyö ki maac, kiper nee jöör bëëtö marge ŋäyï.

²⁸ Geni, gena jø ageem moa no opöödhö døc, ni ge wø wïdö jaak ni ge waya nyeŋ jiy. Ge caala jwïël ki nywïëny mo wø wet ŋat wø leeny gwel-bïrö, ni gena jiy mo reyø bëët.

²⁹ Opïc thäth akwath døc, ni ö arecaaci ni leenyi ya maaci ni thume, ni këël na bëëde ni nywïënyö poot di nøøyø ki leeny jaak, gwel-bïrö dëëre käre pääö ki nywïënyö. 'Ba jiya thuwø bëëdö na enøgønø, kiper dïge da jiy mo reyø mo ba løny jïër wøk.

³⁰ 'Ba geno cwøl na gwel-bïrö mo okwierø, kiper gena nø kwiera, a na Wuuö Jwøk.»