Jeremaya 52 - Wëël Jwøk

Luum Räny Jerucalem

¹ 'Ba Cëdëkiya kanya tïme na nyeya, cwiic dööŋö moe pïërariiø kurciel, ni bëëde ni ena nyeya ki cwiiri apaar kurciel yi Jerucalem. 'Ba nyeŋ menni beeye Amutal nyi Jeremaya nyï Libana.

² 'Ba ena bëëdö ni tïïya gïï mo nëëni ni reyø ki jï Wuuö Jwøk, kaawat moa tïïc Jeyöakëmmi.

³ 'Ba ka adïëri møn, ki køør gïïa reyø moa tïïc jø wø bëëdö Jerucalem ki dï Juuda bäre, Wuuö Jwøk awëër ki geni ni riem geni wøk nyïme. 'Ba Cëdëkiya agëëmö ki nyeny Babiløn.

⁴ 'Ba kanya tïme na ri bïŋweer cwiiri moa beede ni ena nyeya, kanya tïm nïr dwää apaar na apaar, Nabukedenecör nyeny Babiløn ki jø leny moe bëët aö töök Jerucalem, ni tïïe ki twïër töök gø, ni tïïc kwör koor töök gø bäre.

⁵ Ni bëët päänynyi no ociel dïër këël mana këët ri cwiiri apaar kurciel moa beet Cëdëkiya ni ena nyeya.

⁶ 'Ba yi cwiinøgø, kanya tïm nïr dwää aŋweenni na abïŋween, käc atïmö ni dwøŋ døc yi pääny, ni tïme ni bäŋ cam jï jiy.

⁷ Køøre kiir mar pääny atuc jø Babilønni. Ni ö jø lenynyi bëët mo Juuda ni bwøkge ki wäär ni putge døny wøk ni ge cøra dhi kiir mana en yïthakic kiiri moa na ariiø na en buut ajïniin nyeya, këël na bëëde ni jø Babiløn pääny ege ciel dïër bäre; ni aacge ni ge coonya goor Jördan ni wø cwøl na Araaba.

⁸ 'Ba jø leny mo jø Babiløn aläp køør nyeya ma Cëdëkiya, ni maage gø pwöl Jerikö, ni keeth jø lenynyi moe bëët buute.

⁹ Køøre ena makge ni kälge eni Ribala päänya en yi ŋööm Amath, baŋ nyeny Babiløn, ni ö nyeny Babilønni ni ŋut bäät gø ki luubö.

¹⁰ Køøre nyeny Babiløn wäät Cëdëkiya anääe nyïm gø ni nëënö jïre, ni ö eni thuwø ni 'näk jøøa kwörge døøŋŋø bëët mo Juuda kaace Ribala.

¹¹ Køøre nyeny Babiløn nyeŋ Cëdëkiya atuunynye, ni twöc gø ko oguut jwëëlli, ni kïth gø Babiløn ni kïth gø øt twöc, ni bëëde kaace këël aŋuun thøø mare.

¹² 'Ba kanya tïme na ri cwiiri apaar ka abïŋween moa beet Nabukedenecörri ni ena nyeny Babiløn, kanya tïm nïr dwää abïïc na apaar, Nabucaradan kwääy jø koor, mo tïïö tier nyeny Babiløn, aö Jerucalem.

¹³ Ni waaŋ Øt Wuuö Jwøk ki paan dwøŋ mar nyeya, ki uudi moa en Jerucalem bëët, këël uudi moa døøŋŋø bëët awaaŋe thuwø.

¹⁴ Ni ö jø lenynyi bëët mo jø Babiløn moa käär kwääy jø koorri ni toorge kiir piny bäre mar Jerucalem.

¹⁵ Ni ö Nabucaradanni kwääy jø koor ni käl jø møøk moa can døc, ki jiy møøk moa dööŋ dï pääny, ki jiy moa cïp ceŋge jï nyeny Babiløn, ki rëëmme moa näk odööŋ, ni ge maae ka tøŋ.

¹⁶ 'Ba Nabucaradan kwääy jø koor, jiy møøk moa can døc na en yi ŋöömmögø awiie na jø piith omøki na jø puur pwöth.

¹⁷ 'Ba jammi moa näk tïïc ka nywïënyö ma jwïël na en yi øt Wuuö Jwøk, ni beege gïïa näk caala dïkweeye, ki jïëthe mo wø käär pïï ki geni, ki gïr pïï mana dwøŋ, atøc jø lenynyi mo Babiløn na thäŋi, ni kïthge nywïëny moøgø bëët na jwëëlli yøø Babiløn.

¹⁸ Ni kälge jammi møga moa näk tïïc ka nywïënyö ma jwïël, ni beege athääe, ka akaape, ki gïï wø 'näk mäc lambae ki geni, ki kuure, ka apät, ki jap paac møga bëët mo wø tïïö ki geni Øt Wuuö Jwøk.

¹⁹ 'Ba kwääy jø koor, jammi moa näk tïïc ka warkey mo tøŋ ki gwel-bïrö mo tøŋ 'akäle, ni beege cäänne, ka athääe mo wø käär mäc ki geni, ki kuure, ki dhiithe, ki gïï wø cïp lambae bäätge, ka apät, kö ogubääye mo wø thii køøŋø piny ki geni.

²⁰ 'Ba gïïa na ariiø na näk caala dïkweeye, ki gïr pïï mana dwøŋ, ki gïï ma apaar kurriiø mo otïïö na dhäk ma rwädhe mo tïïc ka jwïël, mo gïr pïï mana dwøŋ ocïp bäätge, ki jïëthe mo wø käär pïï ki geni moa tïïc nyeya ma Cølöman kiper Øt Wuuö Jwøk, peek nywïënyö mana näk jwïël mana tïïc geni bëët ki gø ba løny ki røm.

²¹ 'Ba gïïögø ni caal dïkweeye yøø, bär mar man nø beeye gööye apaar ka abära, ni mar dööŋ dëëre beeye gööye apaar kurriiø, no odhïŋ mare beeye lweedi aŋween, ni yie ŋaam.

²² 'Ba gïï mïërö mo tïïc ka nywïënyö ma jwïël moa kïth wïth gïïögø ni caal dïkweeye yøø, bär mar man nø beeye gööye abïïc. Ni dëëtge okïthö ki tiimme mo odwøø na jap mïërö, ni gïï mo caala nyïïadikwäle omun dëët gïï mïërö moøgø na jwëëlli yøø, no ocaanø ki deŋŋe bäre.

²³ 'Ba nyïïadikwäle moøgø moa näk nëënö bäät gïï mïërö man nø beege pïërabïŋween ka abïciel, 'ba kwään nyïïadikwäle bëët moa näk ocaanø bäät gïï mïërö man nø beege dïpa.

²⁴ 'Ba Nabucaradan kwääy jø koor, Ceraya na näk Kwääy Lam Mana Dwøŋ, ki Jepaniya dïlämi mana en køøre, ki jiy adäk moa koor dhi Øt Wuuö Jwøk amaae ki tøŋ.

²⁵ Ni ö eni ni mak ŋat köör aciel man wø raŋ jø leny, ki jiy abïriiø mo wø køny nyeya ka acaare moa joot yi pääny, ki ŋat wø gööt piny ki luup jï kwääy lwaa leny man wø kïth jiy yi dëëc paanøgø, ki jø paanøgø ma pïërabïciel moa joot yi päänyögø.

²⁶ Ni ö Nabucaradanni kwääy jø koor ni lwør jøøgø ni kïth geni Ribala baŋ nyeny Babiløn.

²⁷ Køøre nyeny Babiløn jøøgø anääe Ribala, päänya en yi ŋööm Amath. Manøgø beeye jöö mana ö jø Juuda ni käl ge yi ŋöömö marge ni ge mak ki tøŋ.

²⁸ 'Ba moi beege kwään jø Juuth moa mak Nabukedenecörri ki tøŋ: Jiy moa käle ri bïriet cwiiri moa beede ni ena nyeya beege kume adäk ki pïërariiø kurdäk.

²⁹ Ni jiy moa käle Jerucalem kanya tïm cwiic nyeci moe na apaar ka abära beege dïpe abära ki pïëradäk kurriiø.

³⁰ Ni kanya tïm cwiic nyeci moe na pïërariiø kurdäk, Nabucaradan kwääc jø koor akädö ki jø Juuth ma dïpe abïriiø ki pïëraŋween kurbïïc. 'Ba kwään jiy bëët moa käl beege kume aŋween ki dïpe abïciel.

Kanya Pät Jeyöakin Nyeny Juuda

³¹ 'Ba kanya tïm cwiiri na pïëradäk ka abïriiø moa mak Jöakin nyeny Juuda ki tøŋ yie na kïthi Babiløn, kanya tïm nïr dwää apaar kurriiø ni pïërariiø kurbïïc, Ëwil-Merödak nyeny Babiløn mëër mare anyoodhe jï Jöakin nyeny Juuda ni pät gø øt twöc. 'Ba gïnögø atïïe yi cwiina tïme yie ni ena nyeya.

³² Ni cääne ki luubö mo beer ki gø, ni tïïc wälu mare ni pöödha eni ki mo nyeye møga moa bëëdö ki eni Babiløn.

³³ 'Ba Jöakin abïïe moa en dëëre øt twöc awiile, ni bëëde ni cämö buut nyeya cooth ki yïth nïr kwøw moe bëët,

³⁴ ni bëët cammi mare mar yi cäŋ cooth ni cïpa nyeny Babiløn jïre ki yïth nïr kwøw moe bëët këël dïcäŋa thøøe yie.