Jeremaya 51 - Wëël JwøkLuum Räny Babiløn 1 'Ba man beeye luumma caan Wuuö Jwøki, ena köö, ni «Ka adïëri møn, aani, jø wø räänyö yïthge otheŋa, ni öge kaamar atuunna ni raanyge Babiløn, po jø Kaldia. 2 Aani, jiy mo path ojääŋŋa Babiløn, nee jø Babiløn køølge wøk, ni raanyge ŋöömge. Geni, Babiløn otukge ki løøi ki løøi, kanyo tïme na cäŋ gïna leth na wäŋŋi kipere. 3 Jiye mo wø thöödhö ka athëëre wär riigu nee ba thööthge, nee abïïk nywïëny mo leny moge ba røøge dëëtge. Kär nou weya wøpe moe moa teek ki leny; dïïrru wïth jø leny moe bëët. 4 Geno nääŋŋi ni päänhge yi ŋööm Kaldia, ni cööp geni ki tøøŋi dï uutjïëthe moe. 5 Kiper jø Icriel ki jø Juuda kär kwier Jwøge ma Wuuö Jwøk, eni na wïth jammi bëët, këël na bëët ŋööm Babilønni man bëëtge yie en ni päŋ ki raay mo di temmø nyïm Jwø Icriel na en kur keere. 6 «U na jø Icriel, uuno reŋŋu wøk yi Babiløn, ni ŋati man nø gwøga jwïëye. Kär wïthu wëëgu dïdö ki køør ajäla mare, kiper manøgø beeye kar cuut kwör mar Wuuö Jwøk, gïïa bac jø Babilønni dwøge dëëtge. 7 Babiløn abëëdö ni ena cer Wuuö Jwøk kaamar ogubany warkey mar ajäla, na wëëk bäät piny bäre meerø. Eni, wïth juurre bëët mo bäät piny amaadhe ki køøŋ ogubanynyøgø ni meerge, ni putge bëëdö kaamar bøøre. 8 Ki nyi kany mo thiinh, Babiløn opädhi ni ränynye; uuni, uuno jwöŋu kipere! Ni kännu ki jaath kiper ŋwiili moe; kanymør ŋwiili moe caŋŋø. 9 «'Ba jiy okööi, na ‹Apäärø ki man kønyø Babiløn, 'ba ŋwiili moa pïï dëëre ba løny ki køny këët. Wiiø eni, ni ö ŋati man nø dïïø ni aa poge, kiper ajäla mar Babiløn dwøŋ døc noo këët maal, noo këët maal nyeŋ pøøl. 10 « ‹Anyooth Wuuö Jwøki ni bäŋ ajäla bäätø; ööu, waa døø pøø ma Dhayan ni caanø gïna tïïc Wuuö Jwøki, Jwøk marø.› 11 «Athëëre mou wär paagu, ni pääŋŋu yïth købe ki geni. Wuuö Jwøk yïth nyeye mo Mëdön anø theŋe, kiper acaara mare beeye ki man raany Babiløn. Kiper Wuuö Jwøk cudö ki kwör, ni beeye cuut kwör mar øtø mare. 12 ŋïï wär tïŋu maal nou tugu kiir Babiløn; koor wär tïïyu ni teek døc; ni cïïmmu jiy mo rääŋö, ni ö jiyi møøk ni møørge piny. Kiper Wuuö Jwøk acaara mare wëëge thur kare, ni beeye gïna näk ee nø ŋøl ni tïïe tïïö dëër Babiløn. 13 «Wui, Babiløn, ï na en bäät näm mo thööth, ï na näk jïrï da jap kwärö mo thööth, aŋuudi marï aöö, ni beeye cuŋ bëëtö marï. 14 Wuuö Jwøk, eni na wïth jammi bëët, ena nø kööŋ ŋëëte keere, ni ‹Ka adïëri møn, aani, jø leny mo thööth mo caala lwaa bäänyö ojääŋŋa bäätï, ni kwöŋge bäätï kanyo böötge ïïni.› » 15 Beeye Wuuö Jwøk na cwääc piny ki teek mare, ni tïïc gø ni teek ki køør leec wïc mare, ni peer maal ki køør acaara mare. 16 Kany wø tuk dhee, maal puta märö kaamar køth. Pøøl wø kööle köölö ki ya aŋuun piny, ni käl køth ni mal, ni wëëk jamø kwön wøk ki yïth kwöra kan geni yïthge. 17 'Ba jiy bëët bëëdö ni wïthge bäŋ acaare, ni bäŋ gïn ŋäcge. Rëëm warkie, wïthge olää juuwi moa thiiwge, kiper juu moa thiiwge beege jap cwøk jaak, ni rege bäŋ jwïëy. 18 Geno oballe jaak, ni gena gïï mo di päädö; kanyo tïme na cäŋ ajäla mana wäŋŋi kiperge, ge ränynyö. 19 'Ba eni na Jwø Jeekap ba caal gïïögø, kiper bee eni na tïïc jammi bëët, na cwääc jiye, ni beege thööge ma jø Icriel. Eni nyeŋŋe beeye Wuuö Jwøk, eni na wïth jammi bëët. 20 Wuuö Jwøk aköö, ni «Ï na Babiløn en, ïïna tïïa ni ïïna guduum mara na gïr leny mara; beeye ïïni na raanynya wïth juurre ki riï, ni beeye ïïni na raanynya akwöm mo nyeye ki riï. 21 Beeye ïïni na raanynya okwëënyi ki riï, ki jø wø cäädhi ki bäätge, ni beeye ïïni na raanynya jïëth leny mo wø tut okwëënyi ki riï, ki jø wø cäädhi ki yïthge. 22 Beeye ïïni na raanynya cwøw ki mään ki riï, ni beeye ïïni na raanynya jäle ko obwöre ki riï, ni beeye ïïni na raanynya wøpe ki nyïïakuue ki riï. 23 Beeye ïïni na raanynya dïkwääc dïëk ki riï, ki pïïth dïëk moge, ni beeye ïïni na raanynya jø puur ki riï, ki dhää puur moge, ni beeye ïïni na raanynya kwääri ki riï, ki jø kööre moge. 24 «'Ba a na Wuuö Jwøk, jø Babiløn, ni beege jø Kaldia, gïïa reyø na tïïcge dëëtu, u na jø Dhayan, 'dwøga dëëtge ni nëënö jïïu ki nyeŋŋu. 25 «Wui, Babiløn, ï na teek kaamar kïdi, na raany piny bäre; ka adïëri møn, a na Wuuö Jwøk, mara caana caanø dëërï, ni bëët cera ni ena dëërï, ni ŋïëla ï piny ki bäät kïdi, ni wëëga ï waaŋ ni tïmï na bur. 26 Kanyo ränynyï, bäŋ kïdi mo dööŋ mo jiy cäŋa gëëdö ki gø, kiper ï ränynyö na bäre bäre. Luummögø caana Wuuö Jwøki. 27 «Ŋïï mar leny wär tïŋu maal dï paac, ni koothu tuuŋ nee wïny wïth juurre; wïth juurre wär jiiŋŋu kiper leny nee Babiløn tukge, ni cwøllu akwöm mo nyeye ni beege Ararat ki Minni ka Ackena, nee këëtge ki Babiløn. Uuno röönyö ki kwääc leny mo këëdi ki Babiløn, ni kännu ko okwëënyi mo leny mo thööth mo caala lwaa bäänyö. 28 Wïth juurre wär jiiŋŋu kiper leny nee Babiløn tukge, ni beege nyeye mo jø Mëdön, ki kwääri ki jø kööre moge, ki mïëri bëët moa en tietge. 29 Piny otïmö ni kwanynyi ni jäŋŋi, kiper Wuuö Jwøk, gïna näk ee caarø ni tïïe tïïö dëër Babiløn bëëdö kare, ni beeye ki man raany ŋööm Babiløn, nee bäŋe jiy mo bëëdö yie. 30 Jø leny moa teek mo Babiløn leny owecge, ni bëëtge ni ge kaanna rege kwör gwøk røk moa teek; teek marge othum, ni tïmge kaamar mään; kwör bëëte moge onyep ki maac, ni ö dïdëëdi mo dhøk kiir mare ni tøyi. 31 ŋat wø rïïŋi nee gïna tägö købe, oreŋi ni caan gø jï ŋat ŋwïëy maya, ni ö nyïïatwielli ni reeŋe ni caan gø jï nyïïatwiel maya, nee lunyge caan jï nyeny Babiløn, ni ‹Pääny marï amak bäre. 32 Dhøk wäädhi mo wø kaath ki piny amak, ni nyepge luum man wø kan røk yie, ni bëët jø lenynyi ni cwïnyge böö.› 33 Kiper luumma caan Wuuö Jwøki, Jwø Icriel, eni na wïth jammi bëët, beeye en: Babiløn otïmö kaamar laara moo puuö; ki kany mo thiinh, eno kaa piny kaamar beel.» 34 Nabukedenecör nyeny Babiløn powa ma Jerucalem acame, ni raany gø; ni wec gø ni bäŋ gïn mo odööŋ yie, ni bëëde kaamar dak mo yie ŋaam. Jerucalem aløønye kaawat man wø tïïc nyäällö, ni pääŋ yie ki jap gø moa perge leth, ni gøøp yi gø døøc. 35 Jø powa ma Dhayan, ni beege jø Jerucalem, ge cäänö, ni «Beerra man ö gïna lethi na tïïc dëëtwa ni tïï dëër Babiløn, ni beerra man ö kwör remø marwa ni en bäätge, geni na jø Kaldia.» 36 Kiper manøgønø, luumma caan Wuuö Jwøki beeye en, ena köö, ni «Ka adïëri møn, aani, u cwaa cwaaø, ni coola kwör maru na kare. Aani, naam mar Babiløn otaala, ni bäŋe kany jïtge yie ki pïï. 37 Babiløn oränynyi ni needwöt, ni tïme na kar bëëtö mar othööe, na gïr abuua, ni tïm cwïny jiy ni böö ki gïno tägi dëëre, ni bäŋ jiy mo bëëdö yie. 38 Jø Babiløn olööri kaamar ŋuuwe, ni ŋärge kaamar nyïï ŋuuwe. 39 'Ba noo daatge cwïnyge kiper cam, ge nyöömma nyöömmö ki køøŋø, ni maadha geni ni meerge ni mïn yïthge, ni butge ki niine mo bäŋ cuŋŋe, ni geni ba päy këët. 40 Ge peea baŋ ŋaal kaamar nyïïdïëk, kaamar nyöök rööm ki nyöök atëëe.» Luummögø caana Wuuö Jwøki. 41 «Cëcak, ni beeye Babiløn, a teeŋ mäk mo nyïëdi nø noo maai ki gø ki tøŋ, paana pwøc pinynyi bäre! Na a teeŋ böö mo nyïëdi nø noo böö cwïny wïth juurre ki gø ki gïno tägi dëëre! 42 Jø leny öö bäät Babiløn kaamar naam mo kwödö døc, ni macge gø kaamar jwïëö. 43 Päänye moe otïmö ni cwïny jiy böö ki gïno tägi dëëtge, ni tïm ŋöömö mare na paap ma tëën, na ŋöömö mo bäŋ ŋat mo bëëdö yie, na kany mo bäŋ dhaanhø mo cør yie. 44 Ni jääla jwøge ma Bël Babiløn, ni tïïa eni nee gïïa løønye ŋöö wøk. Ni tïme ni bäŋ wïth juurre mo cøøa baŋe këët. Këëlla kiir Babiløn na teek døc opädhi. 45 «U na jiya, uuno aa wøk dï Babiløn, ni ŋati man nø gwøga jwïëye, ni ŋwieya wëër mar Wuuö Jwøk noo liel kaamar maac. 46 Uuni, kär cwïnynyu bwøk, ni ba lwäyu ka akøpi mo wø cari yi ŋöömmi en, ni beeye akøpi mo wø cari ni da gïn mo tägö yi cwiir man, ni cwiino ööi, poot da akøpi mo di carø. Ni ö ŋöömmi bäre ni jïte ko okiera, ni kwäärö man nø këëdö ki kwäärö maya. 47 «'Ba ka adïëri møn, da nïne mo öö, mo juu moa näk otieŋø Babiløn raanynya raanynyø, ni ö paaci bäre ni lää wïïe, ni bëët jiyi moo 'näk no opäänhnhö dïëre. 48 'Ba maal ki piny ki gïïa en yïthge bëët okwöŋŋi bäät Babiløn ni yïthge met; kiper jø aranya öö ki jï løø wï-piny ni tukge gø. Luummögø caana Wuuö Jwøki. 49 «Ka adïëri møn, Babiløn na 'näk jø bäät piny, oränynyi thuwø kiper jø Icriel moa nääe. 50 U na jiya, u na bøth dhi tøŋ, u aay! Kär nou bëëdö Babiløn! 'Ba bëëdu nou lääŋŋa aani na Wuuö Jwøk këël na enu kany mo bäär ki Jerucalem, ni bëëdu nou caara gïre. 51 «U wø köö, ni ‹Wïthwa alääö kiper ajøøŋ man wø wïnywa, ni tïm nyeŋwa ni law, kiper jiy mo path adøny kwöra en kur keerge yi Øt Wuuö Jwøk.› 52 «'Ba ka adïëri møn, da nïne mo öö, mo juu moa näk otieŋø Babiløn raanynya raanynyø, ni ö jiyi bëët moa näk dëëtge da ŋwiit tøŋ yi ŋöömö bäre ni bëëtge ni ge cooyø. 53 Kiir Babiløn, këël na bëëde no ogeerø no opïï maal kuya, ni tïïc kwör leny moe ni teek døc, jø wø räänyö ge poot jääŋŋa jääŋŋö ni cige baŋe.» Luummögø caana Wuuö Jwøki. 54 Oduuru owïnyi ki Babiløn, yi ŋööm Kaldia, ni beeye oduuc ränynyö mo dwøŋ døc. 55 Kiper Wuuö Jwøk räänyö ki Babiløn, ni ö dïlweelli mare ni neebäc; jø leny oööi kaamar naam mo kwödö døc, ni ge ööi ni döötge wïnyö kany mo bäär. 56 Kiper geni ni wø räänyö ööa kuna tukge Babiløn, ni ö jø lenynyi moe moa teek ni maai ki tøŋ, ni ö athëëre moge ni tøyi; kiper Wuuö Jwøk beeye Jwøk mo cudö ki kwöri, ni kwöri di coolø na kare. 57 Nyeya na näk nyeŋŋe beeye Wuuö Jwøk, eni na wïth jammi bëët, aköö, ni «Aani, jøøa kwörge døøŋŋø moe ki jøøa nyeŋge reegø moe omaadha ki køøŋø ni meerge, ni bee geni ki kwääri ki jø kööre ki jø leny moa teek, ni butge ki niine mo bäŋ cuŋŋe, ni geni ba päy këët.» 58 Luumma caan Wuuö Jwøki, eni na wïth jammi bëët, beeye en, ena köö, ni «Kiir Babiløn na näk odhïŋ onyaa piny na bäre, ni ö odhuule mo dhøk kiirri moe na bäyö ni nyebi ki maac. Ni ö öölö mar jiy ni cami ya paapi, ni ö öölö mar wïth juurre ni pwøyi ya maaci.» Kanya Ö Jeremaya Na Jääŋ Dwør Räny Babiløn Cer Ceraya 59 'Ba kanya ö Ceraya o Neriya nyikwaar Maciya na aacge ki Cëdëkiya nyeny Juuda ni ge cøøa Babiløn ri ŋweer cwiiri moa beet Cëdëkiya ni ena nyeya, nyikuŋ Jwøk ma Jeremaya acïpö ki dwøl jï Ceraya. Kar kaace Ceraya beeye nyikugö. 60 'Ba dwøl manøgø beeye luum gïïo leth bëët noo tägi dëër Babiløn na näk ogöör Jeremaya piny yi wëëlö, ni beege luupa gööre bëët kiper Babiløn. 61 Ni kö Jeremaya jï Ceraya, ni «Kanyo pïïyï Babiløn, luupi bëët ii wär kwaanï nyïm jiy nee wïnyge, 62 ni kööï, ni ‹Wui, Wuuö Jwøk, ïïna cäänö kiper paani en ni raanynyï raanynyø, ni tïme ni bäŋ gïn mo bëëdö yie, dhaanhø wala lääy, 'ba otïmö na paac mo oränynyö na bäre bäre.› 63 'Ba kanyo lønyï ki kwaan wëëlö nø, dëëre wär töönynyï ki kïdi, ni leeŋï gø dï Naam Upareeti, 64 ni kööï, ni ‹Babiløn odøny piny kaamar wëëlö manøgø na nilïŋ enø, ni ö eni ni ba duu maal këët, ki køør gïïo leth moo kïtha bääte.› » Man beeye aŋuun luup Jeremaya. |
© The Bible Society of Ethiopia
Bible Society of Ethiopia