Jeremaya 5 - Wëël Jwøk

Luum Ajäla Mana Caan Kiper Raay Mo Jø Jerucalem

¹ 'Ba Wuuö Jwøk aköö, ni «U na jø Jerucalem, jøøyu dï pääny maru bäre; ni neetu bëët jiy moe døøc nee jootu, ni manynyu kwör acooŋe moe. Ni näk mou jïtö ki dhaanhø mo tïïö na kare, ni manynya adïëri, aani Jerucalem wëënna wëënnö ki køøre.

² 'Ba këël jø Jerucalem doo kööŋ ni köge, ‹Ŋëët Wuuö Jwøk, Jwøa kwøw,› ka adïëri møn, kööŋ marge poot na tööt jaak.»

³ Wui, ï na Wuuö Jwøk, ï manynya gïn ma adïëri. Ïïna tïïö ki gïï mo leth dëëtge, 'ba kärge lääŋŋö; gena thöörï, 'ba gena dhäthö ki man tiirge rege. Cwïnyge atïïcge ni teek ni kaala kïdi, ni kweerge ki man løkge cwïnyge.

⁴ Køøre aana köö, ni «Moi beege jiy mo can jaak mo wïthge bäŋ acaara, kiper geni, jöör Wuuö Jwøk, Jwøk marge, ki ciik moe kucge.

⁵ Aani, a cøøa baŋ jøøa kwörge døøŋŋø, ni cääna ki geni, kiper geni, jöör Wuuö Jwøk, Jwøk marge, ki ciik moe ŋäcge.» 'Ba geni thuwø, gena kweer ki man bëënge Wuuö Jwøk, ni kweerge ki man jïëcge pwöc moe.

⁶ Kiper manøgønø, geno näk ŋuuwi mo ööi ki yi lul, ni ö orudö mo ööi ki dï paap ni cam geni. Kwac obëëdö ni kurö dhøk kiiri mo päänye moge, ni ŋato ö wøk jaak pute ka jeeyø na thäŋi; kiper raay moge atïmö ni thööth, ni gïïa gaage wøk ki ge thööth døc.

⁷ 'Ba Wuuö Jwøk aköö, ni «?Ï na Jerucalem, ïïno wëënna gø nidïï nø? Jiy moï aana wecge, ni kööŋge røk juu mo patha adïëri. Kanya nø caama geni ni jäŋge, rege agwaarge uut kääpe, ni känge ki lugi.

⁸ Ŋati man nø atïmö ni manynya køør cï wati, kaamar thwønh okweeny mo dëëre da tïk mo rïïŋö køør maath.

⁹ ?Aŋø, ge ba jääla gø nidïï kiper teeŋ gïïögø? ?Aŋø, gïnögø ba coola gø nidïï dëër paac mo temma teeŋ gïïögø?» Luummögø caana Wuuö Jwøki.

¹⁰ Ni kö Wuuö Jwøki, ni «Cou yi pwöth omøki, ni beeye po jø Juuda, ni raanynyu gø, 'ba kär raanynyu bäre. Jäu bäätge wøk, kiper ge patha 'moa, a na Wuuö Jwøk;

¹¹ kiper jø Icriel ki jø Juuda gena tïïö ki gïï mo reyø døc dëëra.

¹² Geni, a na Wuuö Jwøk, aana taakge, ni köge, ni ‹Wuuö Jwøk bäŋ gïn mo tïïe; bäŋ gïn mo raac mo ö bäätø, ni leny ki käc bäŋgø mo pïï dëëtø.

¹³ Luup nyïïkuk Jwøk caala jamø jaak, ni luup mo wø køpge ba käl baŋ Wuuö Jwøk. Ni gïn wø caange døøa wïthge keerge.› »

¹⁴ Kiper manøgønø, mana ŋøl Wuuö Jwøki, eni na wïth jammi bëët, beeye en, ena köö, ni «Kiper mana caange luummögø, ennø, ï na Jeremaya en, luupa moo caanï otïïa ni liel kaamar maac dhiï, ni tïïa jøøi ii kaamar jenni, ni ö maaci ni thöör geni.»

¹⁵ Ni cäŋ Wuuö Jwøki köö, ni «Ennø, u na jø Icriel, jiy mo käla paac mo bäär okäla baŋu ki man tukge uuni, ni beege jiy mo teek mo paac marge käla cøøn, mo dhøk marge kuyu, ni gïn wø caange ba wïnynyu.

¹⁶ Geni, gena jiy mo 'näk jiy ka athëëre ŋäcge; ni gena jiy mo teek ki leny døc.

¹⁷ Beel ki caammi mou otwierge ni thöörge geni; wäätu ki nyïïu onäkge ni thöörge geni; dïëk mou ki dhäk mou oŋaalge ni thöörge geni; omøki mou ko olämmi mou oraanyge ni thöörge geni; ni raanyge päänye mou moa no ogeerø ni teek ni wø ŋääthu yøø.

¹⁸ «'Ba kar kaace, a na Wuuö Jwøk, u ba raanynya bëët.

¹⁹ 'Ba kanyo kö jø pou, na ‹?Aperŋø na ö Wuuö Jwøki, Jwøk marø, ni tïïc gïïo ni leth bëët yøø dëëtø?›, ï na Jeremaya en, wärï kööï jïge ni Wuuö Jwøk aköö, ni ‹Kaawat mana weyu aani ni tïnynyu juu moa path yi ŋöömö maru, jiy mo path otïnynyu thuwø yi ŋöömö mo patha maru.› »

²⁰ Ni kö Wuuö Jwøki, ni «Caannu gïn en jï nyïïkwaac Jeekap, ni køpu yi Juuda, ni kööu,

²¹ ni ‹Wïnynyu gïn, u na bøøre na wïthu bäŋ acaara, u na jïïu da nyeŋŋi, 'ba u ba nëënö; u na jïïu da ïdhi, 'ba u ba wïnyö.

²² ?Aŋø, u ba lwäär ki aani? ?Aŋø, dëëtu ba kwanynyi nyïma? Aani, akwöö atïïa na keew mar naama dwøŋ, ni tïm akwöö na gëëŋi na bäre bäre, ni ba løny ki man kaali ya naammi. Këël athaga doo kwödö døc, keew manøgø ba dee raanynyø, ni këël doo öö ni lwör, ba løny ki man pääre ki bäät gø.

²³ 'Ba uuni, wïthu teek ni cwïnynyu da ageem; uuna gaa wøk jööra ni weyu aani.

²⁴ Uuni, u ba köö ki cwïnynyu, ni «Beerra man lwäärø ki Wuuö Jwøk, Jwøk marø, eni ni wø cïp køth mar arïïa ki mar dhi køth kany wø näk ma kare; ni bee eni ni wø gwøk nïne mo dwät kac kiperø.»

²⁵ 'Ba bääyö maru kar gïïögø adøøc mo bäär, ni ö raayi mou ni mänge gïna beer ki uuni.

²⁶ Kiper jiy mo reyø dage yïthakiyu, u na jiya; ge wø kurö kaawat man wø ö dïcek wenynyi ni koorge abëëbe moge. Abëëbe moge wø cekge ciiø, ni ge maaŋŋa jiy.

²⁷ Uudi moge päŋ ki jammi moa jootge ki køør cwøk, kaamar oröögö mo päŋ ki weny. Kiper manøgø nø, gena kwär ni tïm kwörge ni døøŋŋø.

²⁸ Geno lør ni dëëtge pulli, ni geno pöödhö ki tïïc gïïa reyø. Luum kïïc bäŋ wø ŋølge na adïëri, nee bëëtö mare tïme na wøp, ni ge ba pïëmö kiper adïëri mar jøøa can.

²⁹ ?Aŋø, ge ba jääla gø nidïï kiper teeŋ gïïögø? ?Aŋø, gïnögø ba coola gø nidïï dëër paac mo temma teeŋ gïïögø?› » Luummögø caana Wuuö Jwøki.

³⁰ Ni kö Wuuö Jwøki, ni «Gïn mo thäŋa ec mo duunnö ki lwär onø tägö yi ŋöömmi en.

³¹ Nyïïkuk Jwøk atïmö ni køpa luup ki wïthge, ni beege luup tööt, ni ö dïlämme ni bwøthge jiy ki wïthge keerge; ni tïm yïth jiya ni met ka teeŋ gïï mo caala moøgø. ?'Ba u na jiya, agïnaŋø noo tägi dëëtu kanyo tïme na aŋuun japøgø?