Jeremaya 47 - Wëël Jwøk

Luum Räny Jø Pilitin Mana Caan Wuuö Jwøki Ni Tägö

¹ 'Ba man beeye dwør Wuuö Jwøk mana ö bäät nyikuŋ Jwøk ma Jeremaya kiper jø Pilitin, kanya poot Geedha ni kär nyak Peerø.

² Luumma caan Wuuö Jwøki beeye en: ni «Ka adïëri møn, jø leny ööi ki jï løø wï-piny, ni piny ege baabø kaamar jwïëö; ni macge paac bäre, ki japa en yie bëët, këël päänye ki jiy mo wø bëëdö yïthge. Jø paanøgø ogöö ko oduuru, ni ö jiyi bëët ni jwöŋge.

³ 'Ba ki køør dööt tiet okwëënyi mo nyïïmän moo rïŋŋi, ki dööt jïëth leny mo wø tut okwëënyi, ki dööt tiet jïëth leny moøgø moo wïnyi, wëëe ba lwïthi køørge baŋ nyïïge, kiper geni bäätge opädhi.

⁴ Gïï ii otägi yi cäŋ mano ööi ni raanynya jø Pilitin, ni raanynya jøøa bøth ri leny moa doo køny jø Tayar ki jø Caydan. Kiper a na Wuuö Jwøk, jø Pilitin raanynya raanynyø, ni beege jøøa dööŋ røk nyïïkwaac jiy moa öö ki ya acuul Kaptör.

⁵ Geedha odööŋ ni leer kaamar ŋat mo wïïe otal, ni ö jø Ackelönni ni dït wïthge. ?Wui, u na näk odööŋ ni wø bëëdö yi ŋöömma näk ree ee päärö mar jø Pilitin, a këël kany mo nyïëdi nø noo bëëdu nou kïmmö ni dëëtu ŋaru ŋarø ki gïï mo beth?

⁶ «Uuno jwöŋi ni kööu, ni ‹?Wui, opëël Wuuö Jwøk, a këël kany mo nyïëdi nø noo jwömï riï ki 'näk? Døø yi køp marï! Ni jwömï riï ki 'näk ni bëëdï niï lïŋö.›

⁷ ?'Ba opëëllö olïŋe nidïï, ni eni yaa nø köömmö, a na Wuuö Jwøk, ki man raany jø Ackelön ki jø tiet mïëri moa bëëdö bäät naama dwøŋ?»