Jeremaya 44 - Wëël Jwøk

Luum Gïïa Leth Na Caan Wuuö Jwøki Ni Tägö Dëët Jø Juuda Moa Ci Ijep

¹ 'Ba dwøl man aö bäät Jeremaya kiper jø Juuth bëët moa bëëdö Ijep, na bëëdö Migdöl ki Thapinac ki Mempic ki thääŋ ŋööm Ijep ma Patröc, ni kööe,

² ni «Luumma caan Wuuö Jwøki, Jwø Icriel, eni na wïth jammi bëët, beeye en: Uuni, gïïa leth bëët na kïtha bäät Jerucalem ki bäät mïëri bëët mo Juuda ajootu, ni dïcäŋi ennø ge bëëdö ni geno ränynyö ni bäŋ jiy mo bëëdö yïthge,

³ kiper gïïa reyø na tïïc jiyi ni raanyge cwïnya ki køør mana bëëtge ni ge cïpö ko olämme mo wø waaŋ jï juu møøk ni ge tïnynya geni, ni beege juu mo kucge dïkwøŋ, ni uuni ki kwäyu juugögø kuyu thuwø.

⁴ 'Ba aana bëëdö ni jiya ma nyïïkuk Jwøk bëët jääŋŋa jääŋŋö baŋu cooth, naa köö, ni ‹Gïn ni raac yia ki gø døc enø, na mäna ki gø, kär tïïyu.›

⁵ 'Ba geni, mara kärge wïnynyö, ni yïthge kärge ciiø ki mara, ki man luuge rege ni wecge gïïa reyø na tïïcge, ni beeye ki man ba cïpge ko olämme jï juu møøk.

⁶ Kiper manøgønø, räny cwïny mara ki wëër mara ni wø wääŋö kaamar maac akïtha bäät Jerucalem ki bäät päänye mo Juuda, ni putge niruuth ni ränyge kaawat man bëëde dïcäŋi en.

⁷ «'Ba ennø, luumma caan Wuuö Jwøki, Jwø Icriel, eni na wïth jammi bëët, beeye en: ?Aŋø, aperŋø nø ni tïïyu gïn ni raac en, nou käla gïn mo leth bäätu keeru, nou thööra cwøw Juuda, ki mään, ko obwöre, ki moa en kööthi, ni tïme ni bäŋ dhaanhø mo weyu mo dööŋ dïïu en?

⁸ ?Aperŋø na raanynyu cwïnya ki køør gïïa tïïyu ki ceŋŋu en, ni cïpu ko olämme mo wø waaŋ jï juu moa path Ijep, paana ööu yie kiper bëëtö? Manøgø, u thööra rou, nou tïmu ni uuna gïr acïëni, na gïr ajøøŋ dï wïth juurre bëët mo bäät piny.

⁹ ?Aŋø, wïthu awïl ki gïïa reyø na tïïc kwäyu, ki gïïa reyø na tïïc nyeye mo Juuda ki määrge, ki gïïa reyø na tïïyu ki määru dï Jerucalem ki dï Juuda bäre?

¹⁰ 'Ba cwïnyge kär maar pädhö kiper gïna tïïcge, këël dïcäŋi en, ni ge kär lwäyö, ni ge kär cäädhö køør ciik 'moa ki gïïa cema na cïba jïïu ki jï kwäyu.

¹¹ «Kiper manøgønø, luumma caan Wuuö Jwøki, Jwø Icriel, eni na wïth jammi bëët, beeye en: Ka adïëri møn, wïïa këëla rou ni tïïa dëëtu ki gïn mo leth naa thööra jø Juuda bëët.

¹² Aani, jø Juuda moa dööŋ thööra thöörö møn, moa näk wïthge ege këël ri ööny Ijep nee bëëtge yie, ni thumge Ijep bëët ki thøø, ni ge 'näk ko opëëllö ni thøwge ki käc. Ki mano täge ki jiy moa kwörge bäŋgø këël mano pïïe ri jøøa kwörge døøŋŋø, geno 'näk ko opëëllö, ni thøwge ki käc, ni tïmge na gïr acïëni, ni cwïny jiy böö ki gïno tägi dëëtge, ni tïmge na gïr ajøøŋ, na gïr abuua.

¹³ Ni jääla jøw bëëdö Ijep kaawat mana jääla jø Jerucalem, ni 'näk geni ko opëëllö, ni thøwge ki käc ki täw mo leth.

¹⁴ 'Ba ki røk jø Juuda moa dööŋ na aay nee bëëtge Ijep, bäŋgø mo bøth, ni bäŋgø mo dööŋ ni kwøw mo døøa yi ŋööm Juuda mana manyge ki cwïnyge ni ge døøa yie nee bëëtge yie. Geni, bäŋgø mo døøk, 'ba beege mo nøk keerge noo døøk.»

¹⁵ 'Ba cwøw bëët moa ŋäc gø ni määrge ocïpö ko olämme jï juu møøk, ki mään bëët moa näk cuŋŋö kaace na näk rege ege cooŋ kanya ciel ni ge thööth, ki jiy bëët moa näk bëëdö Patröc thääŋ ŋööm Ijep, marge aløkge jï Jeremaya ni köge,

¹⁶ ni «Luubö mana caanï enø jïwa ki nyeŋ Wuuö Jwøk ba wïnywa.

¹⁷ 'Ba ka adïëri møn, waani, gïna nø ö wøk ki dhøkwa tïïcwa tïïö, ni beeye ki man cïpwa ko olämme jï jwøa cwøl ni Gwanynyø Mar Maal, ni kunywa piny ki køøŋø jïre, ni caala mana wara tïïcwa, ki mana wara tïïc kwäcwa ki nyeye mowa ki jøøa kwörge døøŋŋø mowa dï Jerucalem ki yïth päänye mo Juuda bëët; ni kar kaace jïwa da cam mo päl, ni bëëtö marwa beer, ni bäŋ gïn mo raac mo otägö dëëtwa.

¹⁸ 'Ba ki mana cuŋwa ni wa ba cïpi ko olämme jï Gwanynyø Mar Maal, ni wa ba kuny piny ki køøŋø jïre, waana put tïmö ni wa can ki jammi bëët, ni putwa thumö ko opëëllö ni thøwa ki käc.»

¹⁹ Køøre mään ajutö, na «?Aŋø, kanya bëëtwa ni wa cïpö ko olämme jï Gwanynyø Mar Maal, ni kunywa piny ki køøŋø jïre, ni tïïwa ki muunni ni caala kït dëëre, kuc cwøwi mowa?»

²⁰ 'Ba Jeremaya luummögø adwøk baŋ jiy bëët moa dwök baŋe ki luubö, ni beege cwøw ki mään bëët, ni kööe,

²¹ na «?Aŋø, Wuuö Jwøk kär bëëdö ni caara gïru kanya bëëdu nou cïpö ko olämme jï juu møøk dï Jerucalem ki yïth päänye mo Juuda bëët? ?Aŋø, patha uuni ki dëëtu, ki kwäyu, ki nyeye mou, ki jøøa kwörge døøŋŋø mou, ki jø paac bëët na tïïc gïïögø?

²² Kiper manøgønø, atïmö ni ba løny jï Wuuö Jwøk këët ki man jïëny gïïa reyø na tïïyu na näk ec raac ki geni døc; ni beeye na räny paaci maru, ni tïme na gïn mo cwïny jiy böö ki gïna tägö dëëre, na gïr acïëni, ni bäŋ dhaanhø mo bëëdö yie kaawat man bëëde dïcäŋi en.

²³ Gïn ni leth en atägö dëëtu kaawat man bëëde dïcäŋi en kiper mana cïpu ko olämme jï juu møøk, ni tïïu ki raay dëër Wuuö Jwøk, ni käru dwøre wïnynyö, ni käru cäädhö ki jöör ciik moe ki gïïa ceme ki pwöc moe.»

²⁴ Køøre Jeremaya aköö jï jiy bëët, ki mään bëët, ni «U na jø Juuda bëët, u ni en Ijep en, wïnynyu dwør Wuuö Jwøk.

²⁵ Luumma caan Wuuö Jwøki, Jwø Icriel, eni na wïth jammi bëët, beeye en: Uuni ki määru, gïna caannu ki dhøgu awëëgu thur kare ki køør mana tïïyu gø ki ceŋŋu, ni beeye luubö mana caannu na kööu, ni ‹Ka adïëri møn, waani, gïna kööŋwa kipere tïïcwa tïïö, ni beeye ki man cïpwa ko olämme jï Gwanynyø Mar Maal ni kunywa piny ki køøŋø jïre.› 'Ba putu tïïc nø, nou wëëga kööŋ maru thur kare.

²⁶ «'Ba u na jø Juuda bëët, u ni bëëdö Ijep en, wïnynyu dwør Wuuö Jwøk. Wuuö Jwøk aköö, ni ‹Ennø, aana kööŋ ŋëët nyeŋŋa na dwøŋ nee bäŋe dhaanhø mo nyeŋŋa cura dhee këët røk jø Juuda bëët moi ni en Ijep ii, ni mare kööŋ ri nyeŋŋa, ni «Ŋëët Wuuö Jwøk, Jwøa kwøw.»

²⁷ Ennø, waŋa yaa këël rege nee gïn mo leth kïtha bäätge ni patha gïn mo beer, ni ö jø Juuda bëët moi ni en Ijep ii ni thøwge ko opëëllö ki käc, këël mano thumge bëët.

²⁸ 'Ba mo nøk keerge moo bøth dho opëëllö, geno aa wøk ki yi ŋööm Ijep ni døøge yi ŋööm Juuda. Køøre jø Juuda bëët moo dööŋ moa ö Ijep baŋ bëëtö, kar kaace oŋäcge ki man näk mo thura luumma kare wala marge.

²⁹ « ‹A na Wuuö Jwøk, a cïpö jïïu ki ŋïï mo nyootha gø nou jääla jäälö kany, nee ŋäyu ni luup moa caana dëëtu kännö ki gïn mo leth bäätu møn.

³⁰ Ka adïëri møn, a na Wuuö Jwøk, Peerø-Öpira nyeny Ijep 'cïba ceŋ nyïïmän moe, jø wø many jwïëye, kaawat mana cïba Cëdëkiya nyeny Juuda cer nyimän mare ma Nabukedenecör nyeny Babiløn, ŋata many jwïëc gø.› »