Jeremaya 40 - Wëël JwøkKanya Ö Kwääc Jø Koorri Mar Jø Babiløn Na Pät Jeremaya 1 'Ba dwør Wuuö Jwøk abëëdö ni ööa bäät Jeremaya kanya nø ö Nabucaradanni kwääc jø koor na nø pät Jeremaya yi paac mana cwøl ni Reema. Kiper Nabucaradan Jeremaya akäle noo twöö ki tiimme ki jiy moa näk omaaø ki tøŋ Jerucalem ki dï Juuda bäre nee kïth Babiløn. 2 Kanyøgø eni na kwääc jø koor Jeremaya akäle ni kööe jïgø, ni «Wuuö Jwøk, Jwøk marï, gïn ni leth en acaane ni 'käle bäät paac man. 3 'Ba ennø, Wuuö Jwøk gïnögø akäl bäät paani en, ni tïïc gø kaawat mana caane. Gïn atägö dëëtu kiper mana tïïu ki raay dëër Wuuö Jwøk, ni käru dwøre wïnynyö. 4 'Ba dïcäŋi ennø, ka adïëri møn, aani, ï päda pädö yïth tiimme moø ni en ceŋŋï yøø. Ni näk miï jiera man ciï Babiløn ki aani, ø aay na aciel, ni gwøa ïïni; 'ba ni näk miï jiera man ba ciï Babiløn ki aani, løny ki man bëëdï. Neenï, yi paac man bäre løny ki man jierï kanya manynyï jaak; løny jïrï ki man ciï kanya näk wøp ni iï caarø ni beer ki jïrï.» 5 'Ba kanya poode ni Jeremaya poot kär døøk, Nabucaradan aköö, ni «Beerra man ciï baŋ Gedaliya wär Akikam nyikwaar Capan, ŋata røøny nyeny Babilønni bäät mïëri mo Juuda, ni bëëdï buute ki jiy na aciel. Wala ci kanya näk iï caarø ni beer ki jïrï ki man ciï yie.» Køøre eni na kwääc jø koor Jeremaya amooe ki caammi ki muuy, ni wec gø nee aae. 6 Køøre Jeremaya aci Micpa baŋ Gedaliya wär Akikam, ni bëëde buute ki jiy na aciel moa näk odööŋ paac. Kanya Ö Jø Juuda Moa Dööŋ Na Öge Baŋ Gedaliya 7 'Ba kwääri mo jø leny mo Juuda moa reŋ paap ki jø leny moge awïnyge ni Gedaliya wär Akikam anø røøny nyeny Babilønni bäät paac, ni nø tïïc gø ni cwøw ki mään ko obwöre ena cere, ni beege jiy moa can moa näk kär kïth Babiløn. 8 Køøre gena ö Micpa baŋ Gedaliya, ni beege Icmiel o Nethaniya, ki Jöanan ki Jönathan wäät Karëa, ki Ceraya o Tanumët, ki wäät Ëpay nyï Nethöpa, ki Jaadhania ŋat mo wänni beeye nyï Maika, ni ge ööi ka jø leny moge bëët. 9 Køøre Gedaliya wär Akikam o Capan akööŋ jï jøøgø ki jø leny moge, ni kööe, ni «Käru lwäyö ki man tïnynyu jø Babiløn. 'Ba bëëdu yi ŋöömö man, ni tïnynyu nyeny Babiløn; køøre bëëtö maru tïmö ni beer. 10 'Ba aani ki dëëra, a bëëdö kany Micpa, naa cuŋŋi kaperu nyïm jø Babiløn moo ö baŋø. 'Ba uuni, beerra man cou ni lemmu nyïïomøki ki teeŋ nyïïjenni møga, ki nyïïjenni mo wø wel na maaw, ni kïthu geni yïth dääe mou, ni bëëdu yïth mïëri moo pïïu piny yïthge.» 11 'Ba jø Juuth bëët moa en Möap ki moa en po jø Amön ki moa en Ëdöm ki moa en yïth mïëri møga bëët awïnyge thuwø ni nyeny Babiløn awëëö ki jiy møøk nee dööŋge yi Juuda, ni nø røøny Gedaliya wär Akikam o Capan bäät jøøgø. 12 Køøre jø Juuth bëët gena put duuö ki kwöra riem geni yïthge bëët, ni duuge Juuda ni öge Micpa baŋ Gedaliya, ni aacge ni lïmge ki nyïïomøki ki teeŋ nyïïjenni møga mo thööth døc. 13 'Ba Jöanan o Karëa ki kwääc jø leny bëët moa en paap gena ö Micpa baŋ Gedaliya, 14 ni köge jïre, na «?Aŋø, kuyï ni Baalic nyeny jø Amön Icmiel o Nethaniya ajääŋŋe baŋï niï nääe?» 'Ba Gedaliya wär Akikam marge käre ŋäädhö. 15 Køøre Jöanan o Karëa acäänö mëëth ki piny ki Gedaliya Micpa, ni kööe, ni «Beerra man cøøa nee Icmiel o Nethaniya nääa, ni bäŋ dhaanhø mo ŋäc gø. ?Aŋø, aperŋø noo 'näk ïïni jaak en, nee jø Juuth bëët moø ni rege ege cooŋ buutï yøø keethge, ni ö jø Juuda moøgø noo dööŋ yøø ni ränyge?» 16 'Ba Gedaliya wär Akikam aköö jï Jöanan o Karëa, ni «Kär gïnögø tïïyï, kiper gïna caanï kiper Icmiel paa kare.» |
© The Bible Society of Ethiopia
Bible Society of Ethiopia