Jeremaya 4 - Wëël Jwøk

Cwödö Mana Ö Wuuö Jwøki Na Cwøl Jiy Nee Cwïnyge Løkge

¹ 'Ba Wuuö Jwøk aköö, ni «U na jø Icriel, ni näk mou manynya duuö, duu baŋa; ni raanynyu gïï wø lammu na näk ec raac ki ge, nou ba gaa wøk këët,

² ni kööŋŋu ki kööŋ ma adïëri ma kare mo thïïŋ, nou kööŋŋa ŋëëta, a na Wuuö Jwøk, Jwøa kwøw, wïth juurre rege ogwïëthge ki nyeŋŋa, ni putge jïëmö ki nyeŋŋa.»

³ 'Ba luubö mana caan Wuuö Jwøki jï jø wø bëëdö Jerucalem ki dï Juuda bäre beeye en, ena köö, ni «Døøyu bëëtö maru mo nyään, kaamar pwödhö ma akamma mo opuur dhaanhe, mo ba pïïth dï koodhi.

⁴ U na cwøw Jerucalem ki mo dï Juuda bäre, wëëgu cwïnynyu daŋ nou cïpa dëëtu jïra, a na Wuuö Jwøk, ni kälu dupa mana raac wøk cwïnynyu, kiper nee wëër mara na liel na wääŋö kaamar maac mo bäŋ ŋat lønye jïgø ki bïp ba käla bäätu kiper gïïa reyø na tïïyu.

Luum Räny Juuda Mana Caan Wuuö Jwøki

⁵ «Caannu yi Jerucalem, ni køpu gø dï ŋööm Juuda bäre, ni kööu, ni ‹Koothu tuŋi dï paac bäre.› Tïŋu döötu maal ni kööu, ni ‹Cooŋŋu rou kanya aciel nøø reŋŋø yïth päänye moa no ogeerø ni teek.›

⁶ Tïŋu ŋïï maal mo nyootha ciin Dhayan, ni manynyu kar gwøk røk, kär nou dwiil. Kiper a kännö ki gïn mo leth ki wï-piny, ni beeye ränynyö mo päl.

⁷ «Ŋat wø raany wïth juurre anø tïŋŋö, kaamar ŋuu mo ööa wøk ki ya abuŋŋö; ni eni tïŋŋi ka kar bëëtö mare kiper nee wï pou dïïre. Päänye mou ränynyö, ni dööŋge ni bäŋ jiy yïthge.

⁸ Kiper manøgønø, røøu keece dëëtu, ni jwöŋu ni gøøyu oduuru; kiper wëër mara, a na Wuuö Jwøk, ni wø liel kaamar maac kära paanyø bäätu.

⁹ 'Ba dïcäŋöce nyeya ki jø kööre bäätge opädhi, ni thäŋ yïth dïlämme, ni ö nyïïkuk Jwøki ni bwøk cwïnyge.» Luummögø caana Wuuö Jwøki.

¹⁰ Køøre aana köö, ni «Wui Kwäärö Wuuö Jwøk, ka adïëri møn, jøøi ii ki jø Jerucalem acøøgï, kiper mana kööï, no ‹U bëëdö ki bëët-mëër,› ka manø opëëllö oløny ni ena cwäkge.»

¹¹ 'Ba kar kaace ocaan Wuuö Jwøki jï jøøi ki jø Jerucalem, na «Ajäla mara ööa bäätu, u na jiya, kaamar jamø mo teek mo lïëth mo kwönni ka bäät thuuri moa leer na en dï tëën, mo ba caal jamø man wø kwør beel ki gø,

¹² 'ba beeye jamø mo käla baŋa mo teek mo kaala cer jamø manøgø. 'Ba ennø, aani, a caana luum ajäla manøgø jïïu.»

¹³ 'Ba ka adïëri møn, dëëc öö bäre kaamar pøøl mo mäännö, ni ö jïëth lenynyi moge mo wø tut okwëënyi ni öge kaamar atuunna; okwëënyi moge rïïŋö døc ni kaala olwiith. 'Ba otïmö ni raac jïïø, kiper beeye ränynyö marø.

¹⁴ Wui, u jø Jerucalem, pïnyu raay wøk cwïnynyu, kiper nou piem. ?A këël kany mo nyïëdi nø noo bëët acaare mou na reyø cwïnynyu?

¹⁵ Kiper da dwøl mo wïnyö ki Daan, ni wïnyö ki bäät Kïn Ipariem ni køpa gïr gïïo reyø moo ööi.

¹⁶ Ni kö Wuuö Jwøki, ni «Ennø, caannu jï wïth juurre, ni køpu gø dï Jerucalem, ni jøw mo tiega paac oööi ki paac mo kare bäär, ni kwöŋge bäät päänye mo Juuda.

¹⁷ Ni bëëtge ni Jerucalem ege ciel dïër kaawat man wø koor pwödhö, kiper mana gëëmge ki aani.» Luummögø caana Wuuö Jwøki.

¹⁸ 'Ba bëëtö maru ki tïïe mou beeye na käl gïïögø bäätu. Gïïo na leth yøø aöö ki køør rääö maru, ni jwørru ge ki yïth cwïnynyu.

¹⁹ Wui ayaŋ øøy! Wui ayaŋ øøy! Aŋø ni ö pänh cwïnynyi ni kaath cera en, ni tïm dëëra ni kwanynyi! Wenynya atïmö ni pärö døc, ni tïme ni ba løny ki man lïŋa; kiper dwør tuuŋ awïnynya ni beeye tuuŋ man wø kooth na mar leny.

²⁰ Gïï mo leth tïmö ni ööa bääte, ni ö pinynyi bäre ni ränynye. Kwör bëëte 'moø laar ka raanynyø, ni ö uudi 'moø ni ränyge ki nyi kany mo thiinh.

²¹ ?A këël kany mo nyïëdi nø noo bëëda naa neeta ŋïï mar leny, naa bëëdö naa wïnynya dwør tuuŋ?

²² 'Ba Wuuö Jwøk aköö, ni «Jiya bëëdö ni wïthge teek, ni ge bëëdö naa kucge, ni ge caala obwöre ma bøøre, ni wïthge bäŋ acaara. Nyeŋge reegø ka tïïc gïï mo reyø, 'ba tïïc gïn mo beer kucge.»

²³ Kanya raŋa bäät piny, ka adïëri møn, ajooda keda oränynyö ni bäŋ gïrpiny yie; ni raŋa maal, ni bäŋe tar mo yaa joodø.

²⁴ Kanya raŋa kïte, ka adïëri møn, gena jooda ni ge jäŋŋi, ni jooda thuuri bëët ni dëëtge kwanynyi.

²⁵ Kanya rääŋa, ka adïëri møn, bäŋ dhaanhø mo yaa joodø, ni jooda wec maal bëët no obwøk.

²⁶ Kanya rääŋa, ka adïëri møn, ŋöömma beer ni wø ciek ki cam mo päl ajooda no otïmö na dïtëën, ni jooda päänye moe bëët no onyaa piny ki køør wëër mar Wuuö Jwøk ni wø liel kaamar maac.

²⁷ Ni manøgø beeye luumma caan Wuuö Jwøki, na kööe, ni «Ŋöömö bäre oränynyi; 'ba ba raanynya bäre.

²⁸ Ki køør gïïögø bëët, piny bäre okïmmi, ni ö maalli ni tïme na muudhö, kiper ni caana gø en, yaa nø caar, ni cwïnya ba wara, naa ba døøa ŋääa ki man tïïa gø.»

²⁹ Ki køør dööt tiet okwëënyi ki tiet jø wø këëdi ka athëëre, jø päänye bëët bwøk; ni dønyge yïth abuŋŋe, ni kaange rege yïthakic kïte; ni wec päänye bëët, ni dööŋge ni bäŋ jiy mo bëëdö yïthge.

³⁰ ?A ïïni nø, ï na Jerucalem na no oränynyö, agïnaŋø noo tïïyï? Këël na røyï abïï kït, ni døøyï dëërï mo mïërö ki warkey, ni rwøthï buny nyeŋŋï, ï døøya dëërï mo mïërö ki jaak. Cwøw mo wø many ïïni, ïïna kwierge, ni tïmge ni ge manynya man 'näkge ïïni.

³¹ Da dwøl maa wïnynya mo keda dwør dhaagø mo ree da mäc lwaar, ki cooyø mo caala mar dhaagø mo lwaar ka kanynye, ni beeye Jerucalem na jwöŋö ni ŋëëte gäŋŋö, ni ceŋŋe ee thaaŋø, ni köö, «Wui, aano ränynyö; aana thøø ceŋ dïnäk jiy.»