Jeremaya 36 - Wëël Jwøk

Luum Wëëlö Mana Kwaan Øt Wuuö Jwøk, Na Waaŋ Nyeya Ma Jeyöakëmmi

¹ 'Ba kanya tïme na ri ŋweer cwiiri moa beet Jeyöakëmmi o Jöcaya ni ena nyeny Juuda, dwør Wuuö Jwøk aö bäät Jeremaya ni kööe,

² ni «Lwötï ki warakata ni göörï luup yie bëët moa caana jïrï kiper jø Icriel ki jø Juuda, ki wïth juurre bëët, ki mana täge ki dïcäŋa kwøŋa cäänö ki ïïni, kanya bëët Jöcaya na nyeya, këël dïcäŋi en.

³ Kiper kanymør ni jø Juuda gïna leth na caara kiperge ni 'käla bäätge wïnyge wïnynyö, ni ö ŋati man nø dïge ni luu ree ni wec jöör bëëtö mare na raac; køøre nø, gïïa bacge ki raay moge wëënna wëënnö.»

⁴ Kanyøgø Jeremaya Baruk o Neriya acwøle, ni ö Baruki ni göör luup piny bëët yi warakata dhi Jeremaya, ni beege luup moa caan Wuuö Jwøki jï Jeremaya.

⁵ Køøre Jeremaya acäänö ki Baruk ni kööe, ni «Aano mänö, ni ba løny jïra ki man cøøa øt Wuuö Jwøk.

⁶ 'Ba ïïni, wärï ci øt Wuuö Jwøk kanyo tïme na cäŋ wödö ki cam, ni kwaanï luup mo Wuuö Jwøk jï jiy, moa caana jïrï na göörï piny yi wëëlö, ni kwaanï ni jø Juuda bëët nut moo ööi ki yïth mïëri moge.

⁷ Kanymør ni Wuuö Jwøk kwacge kwaaø, ni ö ŋati man nø dïge ni luu ree ni wec jöör bëëtö mare na raac; kiper wëër mar Wuuö Jwøk, ka ajäla mana caane dëët jøøi ii dwøŋ døc.»

⁸ Ni ö Baruki o Neriya ni tïïc gïnögø na kare ki køør moa caan nyikuŋ Jwøki ma Jeremaya bëët jïre, nee luup Wuuö Jwøk kwaane yi wëëlö yi øt Wuuö Jwøk.

⁹ 'Ba kanya tïme na bïï cwiiri moa beet Jeyöakëmmi o Jöcaya ni ena nyeny Juuda, ri dwää abïŋween, jiy bëët moa en Jerucalem, ki jiy bëët moa öö ki dï mïëri mo Juuda na ö Jerucalem, luum wödö ki cam mana näk ege gøø piny atïïcge nyïm Wuuö Jwøk.

¹⁰ Køøre Baruk luup mo Jeremaya akwaane yi wëëlö jï jiy bëët yi øt Wuuö Jwøk, yi thääŋ øtø mana näk mar Gemariya o Capan ŋat wø göör luup akwöma piny. Ni ødøgø ena yi kal mana en jï maal buut dhi kal mar øt Wuuö Jwøk mana cwøl ni Dhi Kal Mana Nyään.

¹¹ 'Ba kanya ö Mikaya o Gemariya o Capan na wïny luup bëët mo Wuuö Jwøk moa en yi wëëlö,

¹² ena put ci paan dwøŋ yi thääŋ øtø mar ŋat wø göör luup akwöma piny, ni jøøa kwörge døøŋŋø bëët opï piny kaace, ni beege Elicama, ŋat wø göör luup akwöma piny, ki Delaya o Cemaya, ki Elnathan wär Akbör, ki Gemariya o Capan, ki Cëdëkiya wär Ananiya, ki jøøa kwörge døøŋŋø møga bëët.

¹³ Ni ö Mikaya ni caan luup bëët jïge moa wïnynye dhi Baruk kanya ö Baruki na kwaan wëëlö jï jiy.

¹⁴ Køøre jøøa kwörge døøŋŋø bëët, Jïyudi o Nethaniya o Celemiya o Kuuci ajääŋge baŋ Baruk ni köge, ni «Wëëlö mana kwaanï luup yie jï jiy kwany cerï ni ööï ki gø.» Køøre Baruk o Neriya wëëlö aput kwany cere ni ci baŋge.

¹⁵ Ni köge jïre, ni «Beerra man pïï piny ni kwaanï wëëlö jïwa.» Køøre wëëlö akwaan Baruki jïge.

¹⁶ 'Ba kanya nø wïnyge luupögø bëët, gena cäänö yïthakicge keerge ni ge lwäär, ni köge jï Baruk, ni «Ka adïëri møn, waani, luupögø bëët caanwa caanø jï nyeya.»

¹⁷ Ni pëënyge Baruk ni köge, ni «?Luup moi bëët, iï göör piny nidïï? ?Agöörï ki køør mana caan Jeremaya ki dhee? Beerra man caanï gø jïwa.»

¹⁸ Ni kö Baruki jïge, ni «Luupögø bëët acaan Jeremaya jïra ki dhee, ni gööra geni piny yi wëëlö ki peen.»

¹⁹ Køøre jøøa kwörge døøŋŋø aköö jï Baruk, ni «Ïïni ki Jeremaya, cou ni kannu rou, ni bëëdu ni bäŋ dhaanhø mo ŋäc kanyo enu yie.»

²⁰ Køøre jøøa kwörge døøŋŋø gena aay ni cige cwöt baŋ nyeya, ni caange luupögø bëët jïre. 'Ba wëëlö ege nø kan yi thääŋ øtø mar Elicama ŋat wø göör luup akwöma piny.

²¹ Køøre nyeya, Jïyudi ajääŋŋe baŋ wëëlö nee käle. Ni ö Jïyudi ni käl wëëlö wøk ki yi thääŋ øtø mar Elicama ŋat wø göör luup akwöma piny. Ni ö Jïyudi ni kwaan wëëlö jï nyeya ki jï jøøa kwörge døøŋŋø bëët moa näk cuŋŋö buut nyeya.

²² Ni kar kaagø beeye dwää abïŋween, ni nyeya opï piny yi øtø man wø bëëde yie ka arïïa, ni maac bëëdö ni liel nyïme ya athaa.

²³ 'Ba kanya tïm Jïyudi ni tiel mo jïtö ka adäk wala aŋween thööre thöörö ki kwaan, nyeya tiel moøgø aput ŋul wøk ki caakïïn mar ŋat wø göör luup piny, ni leeŋ gø yi maac mana en ya athaa nyïme, këël mana ö wëëlö bäre ni thööri ya maaci mana en ya athaa.

²⁴ 'Ba nyeya ki jø kööre moe bëët moa wïny luupögø bëët ge kär lwäyö, na abïïe moge kärge jeeyø.

²⁵ Këël na bëëde ni Elnathan ki Delaya ki Gemariya ge kwaaya nyeya nee wëëlö ba waaŋe, eni marge käre wïnynyö.

²⁶ Køøre nyeya, o nyeya ma Jeramiel, ki Ceraya wär Adhiriel, ki Celemiya wär Abadël, aköömme nee cige baŋ Baruk ŋat wø göör luup piny, ki baŋ nyikuŋ Jwøk ma Jeremaya, kiper nee makge, 'ba Jeremaya ki Baruk geno nø kan Wuuö Jwøki.

²⁷ 'Ba kanya ö nyeya na nø waaŋ wëëlö mana en luupi yie moa göör Baruki piny dhi Jeremaya, dwør Wuuö Jwøk acäŋ ö bäät Jeremaya ni kööe,

²⁸ ni «Cäŋ kädö ki warakata mør, ni göörï luup piny bëët moa en yi wëëlö mana dïkwøŋ na waaŋ Jeyöakëmmi nyeny Juuda.

²⁹ 'Ba mano caanï kiper Jeyöakëm nyeny Juuda, wärï kööï ni mana caan Wuuö Jwøki beeye en: Ïïni, wëëlö man awaaŋï ni kööï, na ‹?Aperŋø na göörï gø ni nyeny Babiløn öö møn ni raany paac man ni tïïc gø ni bäŋ dhaanhø ki lääy mo bëëdö yie?›

³⁰ Kiper manøgønø, luumma caan Wuuö Jwøki kiper Jeyöakëm nyeny Juuda beeye en: Eni ba jïti ki ŋat mo läw bäät wäl Deebit; ni kanyo thøøe, rïŋ dëëre leeŋa wøk yi cäŋ ni bëëde yi köö ki dï wäär.

³¹ Aani, eni ki jø wø käl dëëre ki jø kööre moe jääla jäälö kiper raay moge, ni ö gïïa lethi bëët na caana kiperge ni kïtha geni bäätge, ki bäät jø wø bëëdö Jerucalem ki dï Juuda bäre, kiper mara kärge wïnynyö.»

³² Køøre Jeremaya akädö ki warakata mør, ni mëëk gø Baruk o Neriya ŋat wø göör luup piny. Ni ö Baruki ni göör luup piny yie dhi Jeremaya, ni beege luup bëët moa en yi wëëlö mana waaŋ Jeyöakëmmi nyeny Juuda. Ni ö luupi mo thööth mo röömi ki moa dïkwøŋ ni meedi bäätge.