Jeremaya 35 - Wëël Jwøk

Luum Pwöc Mana Caan Wuuö Jwøki Ki Køør Beeny Bëët Jø Dhi Øt Rëkap

¹ Man beeye dwør Wuuö Jwøk mana ö bääta, a na Jeremaya, yïth nïra beet Jeyöakëmmi o Jöcaya ni ena nyeny Juuda, ena köö,

² ni «Ci baŋ jø dhi øt Rëkap, ni cäänï ki geni, ni kälï geni yi Øt Wuuö Jwøk, ni kïthï geni yi thääŋ øtø aciel, ni mooyï geni ki køøŋø nee maathge.»

³ Køøre aani, Jaadhania o Jeremaya nyikwaar Kabadhiniya, ki nyïïmenni ki wääte bëët ki jø dhi øt Rëkap bëët akäla,

⁴ ni kïtha geni yi Øt Wuuö Jwøk, yi thääŋ øtø mar wäät nyikuŋ Jwøk ma Anan wär Igdaliya, ni beeye thääŋ øtø mana en buut thääŋ øt jøøa kwörge døøŋŋø, ni ødøgø ena maal bäät thääŋ øtø mar Maycëya o Calum ŋat wø koor dhi øt Jwøk.

⁵ Køøre dääe mo päŋ ki køøŋø, ka athööthe, acïba nyïm jø dhi øt Rëkap, ni kööa jïge, ni «Mädhu ki køøŋø nø.»

⁶ 'Ba gena köö, ni «Wa ba mädhö ki køøŋø, kiper kwarwa ma Jönadap o Rëkap waana köömme, ni kööe, ni ‹Uuni ki wäätu, käru mädhö ki køøŋø na bäre bäre;

⁷ ni uuni thuwø, käru gëëdö ki uudi, ni ba puru ki pwöth beel, ni bäŋe pwöth omøki jïïu; gïïögø kär dee gø jïïu na bäre bäre. 'Ba ki yïth nïr kwøw mou bëët, uuno bëëdö yïth oduŋkaare, nou ruuwu ki nïne mo thööth yi paano bëëdu yie ni uuna wëëlle.›

⁸ Køøre waani, dwør kwarwa ma Jönadap o Rëkap awïnywa, ni tïïcwa gïïa kööm waani ki geni bëët, ni wa kär mädhö ki køøŋø ki yïth nïr kwøw mowa bëët, ni beege waani ki määrwa ki wäätwa ki nyïïwa;

⁹ ni wa kär gëëdö ki uudi thuwø mo bëëtwa yïthge. Ni bëëtwa ni bäŋ pwöth omøki jïwa, ki pwöth beel, ki köödhi.

¹⁰ 'Ba waani, gïïa ö kwarwa ma Jönadap na kööm waani ki geni bëët awïnywa, ni tïïcwa geni ki køør mana caane, ni bëëtwa ni wa bëëdö yïth oduŋkaare keerge.

¹¹ 'Ba kanya ö Nabukedenecörri nyeny Babiløn na ö kuna tuk paac, waana köö, ni ‹Ööu, waa reŋŋø Jerucalem, kany poode ni jø leny mo Babiløn ki jø leny mo Aram poot kär pïï.› Køøre waana öö ni bëëtwa Jerucalem.»

¹² Køøre luum Wuuö Jwøk aö bäät Jeremaya, ni kööe,

¹³ ni «Luumma caan Wuuö Jwøki, Jwø Icriel, eni na wïth jammi bëët, beeye en: Ciï ni caanï gø jï jø wø bëëdö Jerucalem ki dï Juuda bäre, ni Wuuö Jwøk aköö, na ‹?Aŋø, luup 'moa ba wïnynyu nee pwöc kwanynyu?

¹⁴ 'Ba luup Jönadap o Rëkap na kööm wääte ki geni, nee geni ba mäthge ki køøŋø, agwøkge; ni ge kär mädhö ki køøŋø këël dïcäŋi en, kiper gïna ö kwarge na kööm geni ki gø atïïcge na kare. 'Ba aani, aana cäänö ki uuni kwöre mo thööth, 'ba uuni, mara käru wïnynyö.

¹⁵ Aani thuwø, jiya ma nyïïkuk Jwøk bëët ajääŋŋa baŋu kwöre mo thööth, ni kööa, ni «Ŋati man nø dïïu luu ree ni wec jöör bëëtö mare na raac, ni tïïyu tïïe moa beyø, ni ba cäädhu køør juu møøk nou lama geni; køøre u bëëdö yi ŋöömö mana cïba jïïu ki jï kwäyu.» 'Ba ïthu käru ciiø ki dwøra, ni mara käru wïnynyö.

¹⁶ Ka adïëri møn, nyïïkwaac Jönadap o Rëkap, luum kwarge mana kööm geni ki gø agwøkge, 'ba jøøi ii mara kärge wïnynyö.›

¹⁷ «Kiper manøgønø, luumma caan Wuuö Jwøki, Jwø Icriel, eni na wïth jammi bëët, beeye en: ‹Ka adïëri møn, a känna bäät jø wø bëëdö Jerucalem bëët ki dï Juuda bäre ki gïn mo leth, ni beeye gïna näk yaa nø caan ni 'käla bäätge, kiper aana cäänö ki geni, ni kärge mara wïnynyö, ni cwøla geni, ni kärge mara løø.› »

¹⁸ Køøre Jeremaya acäänö ki jø dhi øt Rëkap, ni kööe, ni «Luumma caan Wuuö Jwøki, Jwø Icriel, eni na wïth jammi bëët, beeye en: ‹Kiper mana wïnynyu gïna caan kwaru ma Jönadap, ni gwøgu gïïa kööm uuni ki geni bëët, ni tïïyu geni bëët na karge kaawat mana kööm uuni ki gø,

¹⁹ ka adïëri møn, luumma caan Wuuö Jwøki, Jwø Icriel, eni na wïth jammi bëët, beeye ni dhi øt Jönadap o Rëkap ba cänni na bäre ki dhaanhø mo tïnynya aani.› »