Jeremaya 34 - Wëël Jwøk

Luubö Mana Caan Wuuö Jwøki Mano Tägi Dëër Nyeya Ma Cëdëkiya

¹ 'Ba kanya bëët Nabukedenecörri nyeny Babiløn ki jø leny moe, ki jø leny mo käla tiet akwöm mo nyeye bëët mo bäät piny, ni beege wïth juurre bëët moa näk ee dïïmö, ni ge këëdö ki Jerucalem ki mïëri moa en deŋŋe, dwør Wuuö Jwøk aö bäät Jeremaya,

² ni kööm Jeremaya nee ci baŋ Cëdëkiya nyeny Juuda, ni caan gø jïre, ni «Luumma caan Wuuö Jwøki, Jwø Icriel, beeye en: ni ‹Ennø, pääny man 'cïba cer nyeny Babiløn, ni ööe ni waaŋ gø.

³ 'Ba ïïni, ï ba bøth cere, kiper ka adïëri møn, ï di maaø ki tøŋ, ni cïp ïïni cere. Ni jootï nyeny Babiløn, ni put nyeŋŋe kem dëërï, ni cääne ki ïïni nou neeta täärnyïmmu, ni putï ci Babiløn.›

⁴ « ‹'Ba ï na Cëdëkiya nyeny Juuda, wïny luum Wuuö Jwøk. Luumma caan Wuuö Jwøki kiperï beeye en, ena köö: Ï ba thøw ri leny,

⁵ 'ba ïïno thøw ki thøø mo beer jaak; ni waaŋ gïn wø jïye ŋwääi ni met kiperï ni jiemma ïïni kaawat mana wara waaŋi ni jiemma kwäyu ki gø, moa kwøŋ bëëdö na nyeye dïkwøŋ niï poodi, ni jwöŋ jiyi kiperï, ni köge, ni «Wui nyenywa öy!» kiper luummögø yaa nø caan.› Luummögø caana Wuuö Jwøki.»

⁶ 'Ba nyikuŋ Jwøk ma Jeremaya luupögø bëët acaane jï Cëdëkiya nyeny Juuda Jerucalem,

⁷ kanya bëët jø lenynyi mo nyeny Babiløn ni ge këëdö Jerucalem ki päänye bëët moa näk poot no odööŋ yi Juuda, ni beege Lakic ka Adhëka, kiper bee geni keerge moa näk odööŋ røk päänye bëët moa näk ogeerø ni teek yi Juuda.

⁸ 'Ba dwør Wuuö Jwøk aö bäät Jeremaya, ni kanyøgø nyeya ma Cëdëkiya onø tudö ki luubö ki jiy bëët moa en Jerucalem, nee luum jøøa biel dëëtge na laaŋe gøø piny nee ge pät yi bëët laŋ,

⁹ nee ŋati man nø laŋŋø mare ma dïcwøø ma ŋat Ibaru wala dhaagø ma nyi jø Ibaru, nee päde yi bëët laŋ, kiper nee bäŋe ŋat mo poot bëëdö ni coki ma ŋat Juuth ee døøc laŋŋø.

¹⁰ 'Ba jøøa kwörge døøŋŋø bëët ki jiy bëët moa tuut luummögø, gena jïëy nee ŋati man nø rege, laŋŋø mare ma dïcwøø wala dhaagø nee päde yi bëët laŋ, nee ba bëëtge na laaŋe moge këët. Ni manøgø beeye luubö mana jïëcge, ni pätge geni yi bëët laŋ.

¹¹ 'Ba køøre cään, acaare moge acäŋge wiillø, ni døøge baŋ laaŋe moa näk ege pädö yi bëët laŋ, ni kälge geni, ni cäŋge cwøw moøgø ki mään tïïyö na laaŋe moge.

¹² Køøre dwør Wuuö Jwøk mana ö bäät Jeremaya acaane, ni kööe,

¹³ ni «Luumma caan Wuuö Jwøki, Jwø Icriel, beeye en: Aana tudö ki luubö ki kwäyu, dïcäŋa käla geni wøk yie ki yi ŋööm Ijep, na näk po laŋ, ni kööa,

¹⁴ ni ‹Kany wø tïme na aŋuun bïriet cwiiri, ŋati man nø dïïu coki ma ŋat Ibaru mo dëëre ee biel baŋ gø, mo otïïö jïre ki cwiiri abïciel, dee wiiø nee aae.› 'Ba kwäyu, mara kärge wïnynyö, ni ïthge kärge ciiø ki mara.

¹⁵ 'Ba këël na bëëde na acaare mou you wiilø kany mo cään, ni tïïyu gïna beer ki jïra, ni ŋati man nø caana gïr pät wati yi bëët laŋ, ni luummögø tuutu nyïma yi øtø man ni wø cwøl ri nyeŋŋa en,

¹⁶ acaare mou acäŋu wiillø ni raanynyu nyeŋŋa, ki køør mana ö ŋati man nø dïïu ni døø baŋ laŋŋe mana näk dïcwøø ki mana näk dhaagø, ni beege jøøa pätu yi bëët laŋ na weyu nee aacge kaa mana manyge, ni cäŋu cwøw moøgø ki mään tïïyö na laaŋe mou.

¹⁷ «Kiper manøgønø, mana caan Wuuö Jwøki beeye en: Uuni, mara käru wïnynyö, këël na gøøu luum laaŋe piny, ni ŋati man nø coki ki wati dee wiiø ni pät gø yi bëët laŋ. 'Ba ennø, luubö mano gøøa piny kiperu beeye en: Uuni, u wiia wiiø nou thøwu ri leny, ki täw mo leth, ki käc. Ni tïïa uuni na jiy mo tiet akwöm mo nyeye mo bäät piny bëët yïthge thäŋŋö ki gïno tägi dëëtu. Luummögø caana aani, a na Wuuö Jwøk.

¹⁸ 'Ba aani, a tïïö ki gïn mo leth dëët jiy moa kaal gïna tuuda ki geni, na näk luumma tuutge nyïma kärge gwøø, ni beeye luumma tuutge kanya kakge nyirøøa ki dïëre ni pööthge ki dïëre ni ge laamma røkge;

¹⁹ ni beege jø Juuda moa kwörge døøŋŋø, ki jø Jerucalem moa kwörge døøŋŋø, ki jø kööre, ki dïlämme, ki jø paac bëët moa pöödhö ki dï nyirøøa mana kak ki dïëre.

²⁰ Aani, ge 'cïba ceŋ nyïïmän moge, jø wø many jwïëcge. Ni tïm rïŋ dëëtge na cam jï wec maal ki lääc paap.

²¹ «Ni ö Cëdëkiya nyeny Juuda ki jøøa kwörge døøŋŋø moe ni cïba geni ceŋ nyïïmän moge, jø wø many jwïëcge, ni cïba geni ceŋ jø leny mo nyeny Babiløn, jøøa daak rege buutu.

²² Ka adïëri møn, a na Wuuö Jwøk, ge köömma köömmö ni duua geni päänyi, ni këëtge ki päänyi ni macge gø ni waaŋge gø. Ni tïïa mïëri mo Juuda na kwör mo oränynyö mo bäŋ jiy mo bëëdö yïthge.»