Biblia Todo Logo
Bìoball air-loidhne

- Sanasan -

Jeremaya 31 - Wëël Jwøk


Luum Duun Jø Icriel Poge

1 Wuuö Jwøk aköö, ni «Yi kar kaace aano bëëdö ni aana Jwøk mar wïth tuŋi bëët mo jø Icriel, ni bëëtge ni gena jiya.»

2 Man beeye luumma caan Wuuö Jwøki, ena köö, ni «Jø Icriel moa bøth ni kwøw dhi tøŋ, gena jïtö ki køny baŋa dï paap, kanya cääthge ni ge manynya kar jwöm.»

3 Wuuö Jwøk ree anyoodhe jïge cøøn kany mo bäär, ni kööe, ni «Aana bëëdö naa mëër ki uuni ki mëër mo bäŋ cuŋŋe; kiper manøgønø, uuna nyïïa buuta ki køør mëër mara ni wø ba jøøl.

4 Wui, jø Icriel, u na caal nyakøø mo dëër dïcwøø poot kuue, aani, bëëtö maru cäŋa dwøk kare, ni døø kare møn. Ni cäŋu nyïïanëët mou kwanynyø, ni cou baŋ meeŋ ki jø wø miel ni yïthge met.

5 Uuno cäŋ pïïdhö ko omøki bäät thuuri mo Cameria; ni jøw pïïdhö, nyïï gïïa piithge ocamge.

6 Kiper da nïne mo öö, mo jø wø kurö bäät kït Ipariem, ge cwötö ni köge, ni ‹Ööø maal, ni cøø maal Dhayan baŋ Wuuö Jwøk, Jwøk marø.› »

7 Kiper man beeye mana caan Wuuö Jwøki, ena köö, ni «Wärru ni yïthu met ni döötu ena maal kiper nyïïkwaac Jeekap, ni kwöŋŋu ki met ec kiperge, ge na karge dwøŋ dï wïth juurre, ni køpu pwøc maru ni kwayu Jwøk, nou köö, ni ‹Wuuö Jwøk, piem jiyï ma jø Icriel moa näk odööŋ ni kwøw.›

8 Ka adïëri møn, a na Wuuö Jwøk, ge 'duua kany ki yi paana en jï løø wï-piny, ni lema geni yïth kwöra bäyö bäät piny bäre, ki jiy moa näk cööye ki moa näk ŋööte moa en dïge, ki mään moa näk yïthge da jiy, ki mään moa näk dëëtge da mäc lwaar bëët; ni duuge kany ni gena lwaak mo päl.

9 Geno duui ni ge jwöŋö, ni bwødha geni ni ge lämö; ni wëëga geni wääth ni ge lwøra lak näm, ki øtjöö mo thïïŋ mo bäŋ gïn mo cwanyge tietge ree; kiper beeye aani na wää jø Icrielli, geni na jø Ipariem na caal kanynya.

10 «U na wïth juurre, wïnynyu luum Wuuö Jwøk, ni caannu gø jï mïëri moa kwörge bäyö, ni kööu, ni ‹Eni na keeth jø Icriel, ge cäŋe ka cooŋŋø, ni gwøk geni kaawat man wø ö dïkwääyi wø gwøk pïïth dïëk moe.›

11 Kiper Wuuö Jwøk nyïïkwaac Jeekap wïïle wøk, ni piem geni cer ŋata näk teek mare opöödhö ni kaala geni.

12 Ni öge ni kwöŋge ki met ec bäät Kïn Dhayan, ni mïn yïthge ki gïïo beyø noo cïp Wuuö Jwøki jïge, ni beege beel, ki køøŋ nyïïomøki, ki maaw, ki nyïïdïëk ki nyïïrøøe. Ni ö bëëtö marge ni lødhe ni caala ajïniina mo di jøøyø ki pïï, ni bëëtge ni bäŋ öölö bäätge këët na bäre bäre.

13 Kar kaace, nyïïakuue yïthge omïnni ni mielge, ni mïn yïth wøpe ki jø døøŋŋø bëët, kiper kïmmö marge odøøya met ec, ni cøma cwïnyge, ni wëëga yïthge mïnnö na kar pänh cwïny.

14 Aani, dïlämme caama caamø døc ki cam mo päl, ni ö jiya ni jäŋge ki gïïo beyø noo cïba jïge.» Luummögø caana Wuuö Jwøki.

15 Man beeye mana caan Wuuö Jwøki, ena köö, ni «Da dwøl mo wïnyö yi Reema, ni jiy göö ko oduuru ni yïthge ege keeyø, ni beeye Reecal ni jwöŋi kiper obwöre moe, ni kweere ki man cïp cwïnye piny kiper obwöre moe, kiper na bäŋe nyilaal mo odööŋ.»

16 Man beeye mana caan Wuuö Jwøki, ena köö, ni «Weyu gøøc ko oduuru, ni pooyu pï nyeŋŋu, kiper öölö maru ba cam paapi; jø pou duuö ki yi ŋöömö mar nyïïmän.

17 Ni ö ŋäädhe maru ni thur kare yi nyïme, kiper jø pou oduu yi ŋöömö mana näk thööŋge.

18 «Ka adïëri møn, dööt jø Ipariem wïnyö jïra ni ge jwöŋö, ni ge köö, ni ‹Waana pwötï kaamar nyirøøa mo wïïe känni, ni wïnywa pwöc manøgø; duu waani baŋï, nee bëëtö marwa døø kare, kiper ï na Wuuö Jwøk, bee ï na Jwøk marwa.

19 Kiper ki køør mana gaawa wøk, rewa acäŋwa løgø; ki køør mana pwöny waani, kööthwa agøøcwa; nyeŋwa atïmö ni law ni lää wïthwa, kiper ajøøŋ mar gïïa tïïcwa dïkwøŋ ena bäätwa.› »

20 Wuuö Jwøk aköö, na «?Aŋø, Ipariem paa wääda mana pere leth jïra? ?Aŋø, eni paa nyilaal mana met yia ki gø? Ka adïëri møn, këël na bëëda naa cäänö dëëre ki gïï mo leth, eni poot lääŋŋa lääŋŋö. Kiper manøgønø, cwïnya ena baŋe; ka adïëri møn, mëër mara nyoodha nyoodhø jïre.» Luummögø caana Wuuö Jwøki.

21 «Wui Icriel, ï na caal nyakøø mo dëër dïcwøø poot kuue, Määny øtjöö marï ki nyuuthe; cööth piny ki jenni mo nyootha jöö; ni cïbï acaayï øtjööra kwøŋï cør yie. ööï ni duuï yïth päänye moï.

22 ?Wui, nyaara ma Icriel, ï ni cwïnyï ogaa wøk en, a këël kany mo nyïëdi nø noo bëëdï niï wïdö jaak? Kiper Wuuö Jwøk tïïö ki gïn mo nyään bäät piny, ni beeye ni dhaagø dïcwøø gwøe gwøø.»

23 Man beeye luumma caan Wuuö Jwøki, Jwø Icriel, eni na wïth jammi bëët, ena köö, ni «Kanyo dwøga bëëtö mar jiya kare, luummi en ocäŋge caannø yi ŋööm Juuda ki yïth päänye moe, ni köge, «ni ‹Ï na paac man wø joot adïëri yie, paana en bäät kïnna en kur keere, ïïno gwïëth Wuuö Jwøki.›

24 Jiy geno bëëdö na aciel Juuda ki yïth päänye moe bëët, këël ki jø puur ki jø wø kwaac dïëk.

25 Ni tïïa dëët jøøa näk oööl nee nigethïk, ni caama jøøa näk obup ni jäŋge.»

26 Kar kaagø aana päy, ni peera nyeŋŋa, ni bëëda ni yia met ki køør luubö mana jooda naa ena yïth niine.

27 Wuuö Jwøk aköö, ni «Ka adïëri møn, da nïne mo öö, mo dï ŋööm Icriel ki dï ŋööm Juuda jøra jørø ki kunhnhö mar dhaanhø ki kunhnhö mar lääy.

28 Kaa mana bëëda naa neeta geni ki man cööda geni wøk, ni nyaaa geni piny, ni raanynya geni, ni tïïa gïï mo leth dëëtge, aani, a na Wuuö Jwøk, ge cäŋa ka neetø, ni tïïa geni ni teek, ni këëlla tietge piny.

29 'Ba ki yïth nïröke jiy ba cäŋ köö këët, «ni ‹Wëëe acämö ki nyïïomøki mo wac, ni ö liiri mar lak ni pïïe baŋ obwöre.›

30 'Ba ŋati man nø otïmö ni thøw kaper raaye keere; ŋato cam nyïïjerø wac yøø, eni ki dëëre lage tïmö ni liir.»


Luum Luubö Mano Nyään Mano Tuut Wuuö Jwøki Ki Jiye

31 Wuuö Jwøk aköö, ni «Ka adïëri møn, da nïne mo öö, maa tudö ki luubö mo nyään ki jø Icriel ki jø Juuda,

32 mo ba caal luubö mana kwøŋa tuut ki kwäcge kanya maa ceŋge ni käla geni wøk ki Ijep, ni beeye luumma tuuda ki geni na dhalge, këël na bëëda jïge naa bëëdö kaamar dïcwøø ki cïïe.

33 'Ba luubö mano tuuda ki jø Icriel yïth nïröke beeye en: Aani, ciik 'moa okïtha wïthge, ni gööra geni yïth cwïnyge. Ni bëëda ni aana Jwøk marge, ni bëëtge ni gena jiya.

34 Ni këël doo bëëdö ni bäŋ ŋat pwöny watge ki coki, ni ‹Bëëdï niï ŋäya Wuuö Jwøk,› geno bëëdö naa ŋäcge bëët, ni tägi ka jiy moa kwörge therø këël jiy moa kwörge døøŋŋø; kiper gïïa bacge wiia wiiø, ni ba para wïïa ki raay moge këët.» Luummögø caana Wuuö Jwøki.

35 Man beeye luumma caan Wuuö Jwøki, eni na tïïc cäŋ nee rienye ki waŋcäŋ, na cïp dwääy ki ceer kwörge nee rienyge ki wäär, eni ni wø dhäy naama dwøŋ, ni bëët odhänynyi mare ni lwör, eni na näk nyeŋŋe beeye Wuuö Jwøk, Jwø wïth jammi bëët,

36 ena köö, ni «Ni näk mo cäŋ ki dwääy ki ceer tïïc mana cïba jïge ba tïïcge këët, kar kaace nyïïkwaac jø Icriel ge puta tïmö ni ge patha wï jur këët mana en cera.» Luummögø caana Wuuö Jwøki.

37 Man beeye luumma caan Wuuö Jwøki, ena köö, «Ni näk mo løny ki man røm cuŋ maal kuya, ni løny ki man joot tiet ŋøøm kuya ki gïïa en yie bëët, kar kaace, nyïïkwaac jø Icriel kwiera kwierø kiper gïïa reyø bëët na tïïcge.» Luummögø caana Wuuö Jwøki.

38 Wuuö Jwøk aköö, ni «Ka adïëri møn, da nïne mo öö, mo pääny Jerucalem cäŋ ka geerrø jï Wuuö Jwøk, ni tägi ka ri Øt Koor Mar Ananel këël mano këët dhi kiir mana cwøl ni Gøøt.

39 Ni ö keewi ni aae ni thïïŋ ni coonya ri thuur Garëp, ni cäŋ bännö ni pööth Göath.

40 Ni ö ya agäm-kïdi bäre kany wø leeŋ jiy yie moa no othøw, kany wø wet bur yie, ki pwöth bëët moa en deŋ waŋ Naam Kidaran løø paac jï løø kur tuul-cäŋ, këël mano pïïe kanya gun kiirri ki yie buut dhi kiir mana cwøl ni Dhi Kiir Okwëënyi, ni tïmge ni ge ena kur keerge jï Wuuö Jwøk. 'Ba päänyögø obëëdö ni ba daak ni ba nyaa piny këët na bäre bäre.»

© The Bible Society of Ethiopia 

Bible Society of Ethiopia
Lean sinn:



Sanasan