Jeremaya 30 - Wëël Jwøk

Luum Gïïo Tïïc Wuuö Jwøki Ni Dwøga Bëët Jiye Kare

¹ Man beeye dwør Wuuö Jwøk, Jwø Icriel, mana caane jï Jeremaya, ena köö,

² ni «Luup moa caana jïrï bëët göör piny yi wëëlö;

³ kiper ka adïëri møn, da nïne mo öö, mo jiya ma jø Icriel ki jiya ma jø Juuda ge duua ka wøk ki yi bëët laŋ, ni duua geni yi ŋöömö mana cïba jï kwäcge, ni bëëde na marge. Luummögø caana Wuuö Jwøki.»

⁴ 'Ba moi beege luup moa caan Wuuö Jwøki kiper jø Icriel ki jø Juuda, ena köö,

⁵ ni «Luumma caan Wuuö Jwøki beeye en: Da dööt jiy mo wïnyö, mo dëëtge kwanynyi ki lwär mo dwøŋ, ni bäŋ bëët-mëër poge.

⁶ Pëënynyu dëëtu mø, ni raŋŋu gø døøc, nee da dïcwøø mo olwaar ki nyilaal. ?A ennø, aperŋø ni jooda cwøw bëët ni ŋati man nø piere ee maa ki ceŋŋe kaamar dhaagø mo ogøøc mäc lwaarri en? ?Na aperŋø ni nëën täärnyïm ŋati man nø no oniduk ki lwär en?

⁷ Wui! Dïcäŋo täk gïïögø yie otïmö na cäŋ mo raac døc, mo bäŋ cäŋ mo pääri ki gø; ni beeye cäŋo pïïc gïï mo lethi yie dëët nyïïkwaac Jeekap, 'ba geno piem yïth gïïögø.

⁸ «'Ba Wuuö Jwøk, eni na wïth jammi bëët, aköö, ni ‹Kanyo tïme na dïcäŋöce, teek dïïm mana en bäätge na caal jaath puur man wø twöö ŋut rwaath raanynya raanynyø, ni päda geni, ni bëëtge ni ge patha laaŋe këët jï jiy mo path.

⁹ 'Ba geno bëëdö ni ge tïnynya aani, a na Wuuö Jwøk, Jwøk marge, ki nyeya marge ma Deebit, ŋato thïïŋa jïge.

¹⁰ « ‹Wui, jø Icriel, u na nyïïkwaac dhaanhnha ma Jeekap, « ‹käru lwäyö, ni ba bwøk cwïnynyu; kiper ka adïëri møn, a na Wuuö Jwøk, uuni ki jøw käl dëëtu, u piema piemø paanøgø ni kare bäär ki pou enø, na kïth uuni yie ki tøŋ. Ni ööu, u na nyïïkwaac Jeekap, ni duu pou ni bëëdu mëëth ni uuno nikwak, ni bäŋ ŋat mo wëëk uuni lwär.

¹¹ Kiper a na Wuuö Jwøk, a ena buutu naa peemma uuni. Aani, tiet mïëc wïth juurre bëët moa keetha uuni yïthge, raanynya raanynyø na bäre. 'Ba uuni, u ba raanynya bäre. U pwönynya pwönynyö ka ajäla mana näk kare, nou ba wiia ka ajäla.›

¹² «Luumma caan Wuuö Jwøki beeye en, ena köö, ni ‹Bëëtö maru na raac atïmö kaamar ŋwellø mo ba caŋŋi, ni bëëdö kaamar atwøda mo raac døc.

¹³ Bäŋ ŋat mo køny uuni ki rääö maru, ni bäŋ gïn mo dwøk bëëtö maru kare, ni bäŋ køny mo joot kiperu.

¹⁴ Wïth juurre moa mëërru ki geni na dwätu ki geni bëët wïthge awïl ki uuni; ni ge ba many uuni këët; kiper dëëtu amooa ki gïï mo leth mo caala man wø tïïc nyïïmänni, ni jääla uuni kaawat man wø tïïc ŋat mo cwïnye ba pädhi ki tïïc gïn mo leth. Gïnögø atïïa dëëtu kiper bääyö maru dwøŋ døc, ni raay mou thööth døc.

¹⁵ ?Aperŋø nø ni kwöŋŋu kiper gïïo ni leth yøø ni caal atwøda mo raac enø, mo rääm mare ba døø piny? Gïnögø atïïa dëëtu kiper bääyö maru dwøŋ døc, ni raay mou thööth døc.

¹⁶ « ‹'Ba jøw raany uuni bëët di raanynyø, ni ö nyïïmännu bëët ni maai ki tøŋ; ni ö jøw käl japu ki teek ni käl japge thuwø, ni ö jøw twier uuni bëët ni wëëga geni twier.

¹⁷ 'Ba a na Wuuö Jwøk, a caana gø ni bëëtö maru na raac dwøga kare ni beer, ni beeye bëëtö maru ni caal atwøda, kiper uuna cwøl jiyi ni u ege jarø jaak, ni köge, ni «Jø Dhayan, bäŋ ŋat many geni.» ›

¹⁸ «Luumma caan Wuuö Jwøki beeye en, ena köö, ni ‹Ka adïëri møn, mïëc jiya ma nyïïkwaac Jeekap 'dwøga kwörge, ni nyoodha mëër mara jïge kwör bëëte moge. Jerucalem cäŋ ka geer wïïe mana no oränynyö, ni ö paan dwøŋŋi ni cäŋi dwøk kare mana dïkwøŋ.

¹⁹ Ni ö dudi mo dwøk met ec ki dwør meeŋ ni wïny ge yïthge. Ni meeda geni ni thööth, ni kwäänge ba døø piny; ni wëëga geni wøør, ni ba bëëtge na jiy mo bäŋ karge.

²⁰ Nyïïkwaac Jeekap obëëdö ki bëëtö mo caala mana dïkwøŋ, ni tïmge na lwaak mo tietge yaa këël piny nyïma; ni jääla jø wø caan geni bëët.

²¹ Dïbwödhi marge otïmö na ŋat mo ena rege, ni beeye kwäärö mo käla dëëtge. eno nyïïa buuta, ni ö baŋa. ?Kiper aŋa ni løny jïre keere ki man ö baŋa, a na Wuuö Jwøk?

²² Uuni, u bëëdö ni uuna jiya, ni bëëda ni aana Jwøk maru.› »

²³ 'Ba ka adïëri møn, wëër mar Wuuö Jwøk öa bäät jøøa reyø kaamar atuunna, ni beeye atuunna mo teek døc mo raanynya geni.

²⁴ Wuuö Jwøk ba døø ŋääe ki wëër mare ni wø liel kaamar maac, këël mano tïïc mana en cwïnye ni wëëk gø thur kare. 'Ba kanyo täk gïïögø yie ya aŋuun nïne, tiere ojootu na kare.