Jeremaya 3 - Wëël Jwøk

Luum Ajäl Wuuö Jwøk Mana Jääl Jø Icriel Kiper Na Gaage Wøk

¹ 'Ba Wuuö Jwøk aköö, «?Ni näk mo dhaanhø cïïe ee kwierø, ni ö dhaaŋŋøgø ni aae, ni ci jï dhaanhø mør, dïcwøønnøgø doo cäŋa døø baŋ dhaaŋŋøgø? ?Aŋø, ŋöömmo tïïc teeŋ gïnögø yie ba raanynyi na bäre bäre? 'Ba ï na Icriel, ï bëëdö kaamar kääbi ni wø mëër ki cwøw mo thööth. ?A ennø, ï doo duua baŋa?

² Tïŋ wïïï maal, ni raŋï kwör lam moa en bäät thuuri moa leer yøøke. ?Aŋø, a kaa na kärï tïïö yie ki tïï käp? Ïïna bëëdö kaamar dhaagø mo opï piny thääŋ jöö ni koora cwøw, ni bëëdï kaamar ŋat paap mo omøør piny nee jiy twiere. Paac araanynyï ki køør käp ki rääö marï.

³ Kiper manøgø nø, køth amäni, ni bäŋe køth mo opädhö ki cwiir. 'Ba ï poot bëëdö kaamar dhaagø mo waŋe nëëni na waŋ kääbi, ni wïïï ba laay na bäre bäre.

⁴ ?'Ba ennø, a kärï cwølø na bëëde, ni kööï, na ‹?Awuuö, paa ï ni wø mëër ki aani ki mana täga thïnhö?

⁵ ?Aperŋø nø ni poot bëëdï niï wëëyö cooth, niï poot bëëdö ni ïïno gootø na bäre bäre?›? Neenï, këël na caanï luupögø, ï poot tïïö ki gïïa reyø mo wø løny jïrï jaak.»

⁶ 'Ba ki yïth nïra beet nyeya ma Jöcaya, Wuuö Jwøk acäänö ki aani, a na Jeremaya, ni kööe, ni «?Gïna tïïc Icrielli na caal dhaagø mo cwïnye ogaa wøk ajootï? Ena ci kwör lam moa en bäät thuuri moa bäyö ki tiet jenni moa no onigïït piny bëët, ni bëëde ni tïïya tïï käp kwöreke.

⁷ 'Ba aana cädö ni kanyo nø tïïc gïïögø bëët, eni duua baŋa na bëëde, 'ba eni kär duuö; ni ö bääyö mare ni jooti ya coki ma Juuda na raac.

⁸ 'Ba ki køør bëët käp mar Icriel, eni na caal dhaagø mo cwïnye ogaa wøk, ena riemma, kaawat man wø ö dhaanhe wø göön cïïe ki wëël apääk; 'ba ajooda ni coki ma Juuda na raac kär lwäyö, ni ö eni thuwø ni bëëde ni tïïya tïï käp.

⁹ 'Ba Icriel bääyö mare atïïe na gïn mo jööt ki jïre, ni put paac raanynyø ki køør mana tïïe, ni beeye gïn mo caala luk, kany wø wøør kïte ki jenni.

¹⁰ 'Ba këël na bëët coki ma Juuda na raac ni gïïögø bëët ŋääe, eni na Juuda kär duu baŋa ki cwïnye bäre, 'ba mare beeye cwøk keere.» Luummögø caana Wuuö Jwøki.

¹¹ 'Ba Wuuö Jwøk aköö jïra, ni «Theemma Icriel na caal dhaagø mo cwïnye ogaa wøk ki Juuda na raac.

¹² Ciï ni caanï dwøl man en ni nyïmï ii løø jï løø wï-piny, ni kööï ni Wuuö Jwøk aköö, «ni ‹Ï na Icriel na caal dhaagø mo cwïnye ogaa wøk en, duu baŋa. Ï ba raŋa ka agäät, kiper a na Wuuö Jwøk, a mëër ki ïïni, ni gootø mara ba ruu cwïnya na bäre bäre.

¹³ Mano tïïyï keere beeye ki man jïëyï raay moï, man näk mo ïïno gëëmö ki aani, a na Wuuö Jwøk, Jwøk marï, ki mana caathï køør juu moa path tiet jenni bëët moa no onigïït piny, ni dwøra kärï wïnynyö.› » Luummögø caana Wuuö Jwøki.

¹⁴ 'Ba Wuuö Jwøk aköö, ni «U na jiya na näk cwïnynyu ogaa wøk, duu baŋa, kiper beeye aani na kwäärö maru. Aani, a lwötö ki dhaanhø aciel yi pääny man nø, ni lwöta ki jiy ariiø yi tuuŋ man nø, ni käla u na jiera ni duua uuni yi pääny maru ma Dhayan.

¹⁵ Køøre uuno mooa ki dïkwääye mo cwïnyge ena køøra, ni bwøthge uuni ki leec wïc ki ŋäc tiet luup.»

¹⁶ 'Ba Wuuö Jwøk aköö, ni «Ki yïth nïröke, ni beeye kanyo nyaayu nou thöönhnhu dï paac, jiy bëëdö ni bäŋ gïn caange këët kiper acanduk man wø nyooth luumma tuut Wuuö Jwøki ki jiy; ni bäŋ gïn caarge kipere, ni ba lääŋge, ni kare ba läämi jïge, ni bäŋ teeŋ gø mo tïïcge këët.

¹⁷ 'Ba kar kaace Jerucalem ocwølge ni kar bëëtö mar Wuuö Jwøk, ni ö wïth juurre bëët ni cooŋge rege yie kiper nyeŋ Wuuö Jwøk. Ni ö geni na jø Icriel ni ba cääthge këët køør teek wïc marge mana ö ki køør rääö mana en cwïnyge.

¹⁸ 'Ba ki yïth nïröke jø Juuda odwäti ki jø Icriel, ni öge wøk na aciel ki yi ŋöömma en wï-piny, ni öge yi ŋöömma cïba jï kwäyu na man dööŋ jïge.

¹⁹ «'Ba a na Wuuö Jwøk, aana köö ni u daa tïïö ni uuna wääta na bëëde, ni mooa uuni ki ŋöömö mo beer, na mano dööŋ jïïu mo beer døc mo kaala mo wïth juurre bëët. Ni cäda naa dou cwølø ni aana wääu, nou ba gaa wøk ki man cäädhu køøra.

²⁰ 'Ba ka adïëri møn, kaawat man wø ö dhaage mo cwïnye ogaa wøk ki cwøre ni wec cwøre, uuni, u na jø Icriel, uuna bëëdö ni cwïnynyu ogaa wøk ki aani.» Luummögø caana Wuuö Jwøki.

²¹ Da dwøl mo wïnyö ki yïth kwör lam moa en bäät thuuri moa leer, ni beeye oduuru ki kwac mar jø Icriel, kiper bëëtö marge adøøcge mo ba thïïŋ, ni wïl wïthge ki Wuuö Jwøk, Jwøk marge.

²² 'Ba Wuuö Jwøk aköö, ni «U na jiya na näk cwïnynyu ogaa wøk, duu baŋa, uuno tïïa nee cwïnynyu ba gaage wøk këët.» Ni köge, ni «Ka adïëri møn, waani, wa duua baŋï, kiper beeye ïïni na Wuuö Jwøk, Jwøk marwa.

²³ Ka adïëri møn, wa cøøga rewa jaak ki mana tïïwa ki kwör lam bäät thuuri, ni 'näkwa rewa ki dïlweel bäät kïte. 'Ba ka adïëri møn, ï na Wuuö Jwøk, Jwøk marwa, beeye ïïni noo piem waani, wa jø Icriel.

²⁴ 'Ba ki mana täk paaci marwa cøøn, Baal, jwøk mo duua lään wïc, gïïa joot kwäcwa ki køør kwäk marge athööre, ni beege dïëk ki dhäk moge, këël wäätge ki nyïïge thuwø.

²⁵ 'Ba ennø, beerra man räpwa piny ki lään wïc marwa, ni ö lään wïci marwa ni pälle bäätwa, kiper waana bääyö dëërï, ï na Wuuö Jwøk, Jwøk marwa, ni beeye waani ki kwäcwa bëët, ki mana täk paaci marwa këël dïcäŋi en; ni bëëtwa ni dwørï ba wïnywa, ï na Wuuö Jwøk, Jwøk marwa.»