Jeremaya 29 - Wëël Jwøk

Luum Weeli Moa Jääŋ Jeremaya Babiløn Baŋ Jøøa Mak Ki Tøŋ

¹ 'Ba nyikuŋ Jwøk ma Jeremaya agöödö ki wëëlö Jerucalem, ni jääŋ gø baŋ jø døøŋŋø moa näk odööŋ ni kwøw ri moa mak ki tøŋ, ki baŋ dïlämme, ki nyïïkuk Jwøk, ki jiy bëët moa mak Nabukedenecörri ki tøŋ Jerucalem ni kïth geni Babiløn.

² Wëëlö manøgø ajääŋŋe ni nyeya ma Jekönaya ki menni ma gwanynyø onø mak ki tøŋ Jerucalem ni nø kïth geni Babiløn, ni bee geni ki jø kööre ki jøøa kwörge døøŋŋø mo wø bëëdö Jerucalem ki dï Juuda bäre, ki rëëmme.

³ Wëëlö manøgø acïp Jeremaya cer Elaca o Capan ki cer Gemariya o Kilkiya, jøøa jääŋ Cëdëkiya nyeny Juuda Babiløn baŋ Nabukedenecör nyeny Babiløn. 'Ba luubö mana en yi wëëlö ogöörö na ennø:

⁴ Man beeye luumma caan Wuuö Jwøki, Jwø Icriel, eni na wïth jammi bëët, jï jøøa riem Wuuö Jwøki wøk, na mak ki tøŋ Jerucalem na kïth Babiløn:

⁵ ni «Gëëdu ki uudi ni bëëdu yïthge, ni puru ki pwöth ni cammu gïï wø ciek yïthge.

⁶ Ni nyöömu ki mään, ni nyöötu ki wäätu ki nyïïu; ni nyöömmu wäätu ki mään, ni wëëgu nyïïu nywøm, nee ge nyöötge ki wäätge ki nyïïge; ni tïmu nou thööth, ni kwäännu ba døø piny.

⁷ Ni bëëdu nou manynya bëët-mëër yi pääny mana riema u yie nou mak ki tøŋ; ni lämu jï Wuuö Jwøk kiper bëët päänyögø, kiper bëët-mëër mano en yie oen jïïu thuwø.»

⁸ Kiper luumma caan Wuuö Jwøki, Jwø Icriel, eni na wïth jammi bëët, beeye en, ena köö, ni «Uuni, nyïïkuk Jwøk mou moø ni en dïïu yøø ka ajuuk mou käru cøøkge, ni kär nou wïnynya lääk moge moa met yïthu ki ge nee ge läkge ki ge,

⁹ kiper luup tööt køpge ka nyeŋŋa jïïu; geni, ge ba jääŋŋa aani.» Luummögø caana Wuuö Jwøki.

¹⁰ 'Ba luumma caan Wuuö Jwøki beeye en, ena köö, ni «Kanyo thum cwiiri ma pïërabïriiø kiper Babiløn, aani, u lïïma lïïmö, ni ö luumma caana jïïu na beer ni wëëga gø thur kare, ni beeye ki man duua uuni kany paana kwøŋu bëëdö yie.

¹¹ Kiper a na Wuuö Jwøk, acaare moa näk yaa nø caar kiperu ŋääa, ni beege acaare mo duunnö ki bëët mëër jïïu, ni patha acaare mo duunnö ki ränynyö dëëtu, 'ba beeye acaare mo wëëga ŋäädhe maru thur kare yi nyïme.

¹² 'Ba nyeŋŋa ocøøru, ni ööu ni kwayu aani ki lam, ni ööa ni wïnynya maru.

¹³ Aano manynyu ni jootu aani, kanyo näk maa manynyu manynyø ki cwïnynyu bäre.

¹⁴ Aano jootu møn, a na Wuuö Jwøk, ni duua uuni wøk ki yi bëët laŋ, ni lema uuni yïth mïëc wïth juurre bëët kwöra riema u yïthge bëët, ni duua uuni paana riema u wøk yie nou mak ki tøŋ.» Luummögø caana Wuuö Jwøki.

¹⁵ Uuna köö, ni «Wuuö Jwøk waana mooe ki nyïïkuk Jwøk Babiløn kany.»

¹⁶ 'Ba ennø, wïnynyu luumma caan Wuuö Jwøki kiper nyeya mana läw bäät wäl Deebit, ki jiy bëët mo wø bëëdö pääny Jerucalem kany, ni beege tuuŋu moa näk kär kälö ki uuni kanya mak uuni ki tøŋ.

¹⁷ Luumma caan Wuuö Jwøki, eni na wïth jammi bëët, beeye en, ena köö, ni «Ennø, leny ki käc ki täw mo leth jääŋŋa jääŋŋö bäätge, ni wëëga geni ränynyö kaamar nyïïolämmi mo odheeth mo ba løny ki cam kiper mana näk mo geno kwäk.

¹⁸ Ni løpa køørge ki tøŋ ki käc ki täw mo leth, ni tïïa geni nee akwöm mo nyeye bëët mo bäät piny yïthge thäŋge ki gïïo tägi dëëtge, ni tïïa geni na gïr acïëni, ni cwïny jiy böö ki gïno tägi dëëtge, na gïr abuua, ni ge di jøøŋŋø yïth mïëc wïth juurre bëët kwöro riema geni yïthge.

¹⁹ Kiper geni, luup 'moa, a na Wuuö Jwøk, kärge wïnynyö, ni beege luup moa cara jïge cooth ki dhøk jiya ma nyïïkuk Jwøk. Ni uuni thuwø, u na mak ki tøŋ, dwøra käru wïnynyö.

²⁰ «'Ba ennø, u bëët, u na riema wøk Jerucalem nou mak ka tøŋ, ni kïth u Babiløn, wïnynyu dwøra, a na Wuuö Jwøk.

²¹ Luumma caan Wuuö Jwøki, Jwø Icriel, eni na wïth jammi bëët, kiper Akap o Kölaya ki Cëdëkiya o Maycëya, jøøa køp luup tööt jïïu ki nyeŋŋa, beeye en: Ka adïëri møn, aani, ge 'cïba cer Nabukedenecör nyeny Babiløn, ni ö eni ni 'näk geni ni nëënö jïïu ki nyeŋŋu.

²² Ki køør mano tägi dëët jøøgø, jø Juuda bëët moa näk omaaø ki tøŋ na kïth Babiløn, geno bëëdö ni ge cïënö ni ge köö, ni ‹Wuuö Jwøk ïïno raanynye kaamar Cëdëkiya ka Akap na waaŋ nyeny Babilønni ki maac,›

²³ kiper mana tïïge ki gïï mo määnö dï Icriel; gena kännö ki luui ki määr nyïïawäätge, ni cäänge ki luup tööt ki nyeŋŋa, mo ge kära köömmö ki geni; 'ba aani, gïïögø ŋääa, kiper ge nëënö jïra.» Luummögø caana Wuuö Jwøki.

Luum Wëëlö Mana Göör Cemaya

^24-25 Wuuö Jwøk, Jwø Icriel, eni na wïth jammi bëët, dwøl acaane jïra nee jääŋŋa baŋ Cemaya nyï Nëyëlam, kiper mana jääge ki weeli ki nyeŋŋe baŋ jøøa en Jerucalem bëët ki baŋ dïlämi ma Jepaniya o Maycëya, ki baŋ dïlämme bëët, ni kööe,

²⁶ ni «Ï na Jepaniya en, Wuuö Jwøk ïïna røønye na dïlämi kar dïlämi ma Jööda, kiper niï tïmï ni ïïna ŋat wø raŋ Øt Wuuö Jwøk, nee dhaanhø ma bøøl mo døøya ree nyikuŋ Jwøk nee tiete rwaagï yïth orøge, ni twöyï cwaage ko oguudi.

²⁷ ?'Ba ennø, aperŋø nø na ba joogï Jeremaya nyï Anathöth ni køp luup jïïu enø?

²⁸ Kiper ena jääk baŋwa ki dwøl Babiløn, ni kööe, ni ‹Bëët laŋ maru känna wøk ki kany mo bäär; beerra man gëëdu ki uudi ni bëëdu yïthge, ni piithu pwöth, ni cammu gïï wø ciek yïthge.› »

²⁹ 'Ba dïlämi ma Jepaniya wëëlö manøgø akwaane jï nyikuŋ Jwøk ma Jeremaya.

³⁰ Ni ö dwør Wuuö Jwøki ni put ö bäät Jeremaya, ni kööe,

³¹ ni «Jääk Babiløn baŋ jøøa näk omaaø ki tøŋ bëët, ni kööï, ni ‹Luumma caan Wuuö Jwøki kiper Cemaya nyï Nëyëlam beeye en: Cemaya luup akøbe jïïu këël na bëëde ni eni kära jääŋŋö, ni tïïc uuni nou ŋäätha luup tööt.

³² Kiper manøgønø, mana ŋøla, a na Wuuö Jwøk, beeye ni Cemaya nyï Nëyëlam ki nyïïkwaaye bëët ge jääla jäälö; eni bäŋ nyikwaare mo bëëdö ni kwøw dï jiy moi, ni eni gïïö beyø noo tïïa kiper jiya ba neene ki waŋe, kiper jiy apwönynye nee gëëmge ki Wuuö Jwøk.› Luummögø caana Wuuö Jwøki.»