Jeremaya 25 - Wëël Jwøk

Luum Ajäla Mano Tägi Dëët Jø Juuda Ki Jø Babiløn Ki Wïth Juurre Bëët

¹ 'Ba kanya tïme na ri ŋweer cwiiri moa beet Jeyöakëmmi o Jöcaya ni ena nyeny Juuda, yi cwiir mana dïkwøŋ na beet Nabukedenecörri ni ena nyeny Babiløn, dwør Wuuö Jwøk aö bääta, a na Jeremaya, kiper jø Juuda bëët;

² ni beeye dwøl mana caana, a na nyikuŋ Jwøk ma Jeremaya, jï jø wø bëëdö Jerucalem ki jø Juuda bëët, ni kööa,

³ ni «Ki yïth cwiiri moi na pïërariiø kurdäk ii, ki mana täge ki ra aŋuun cwiiri apaar kurdäk moa beet Jöcaya wär Amön ni ena nyeny Juuda, këël dïcäŋi en, dwør Wuuö Jwøk abëëdö ni öa bääta, ni cara gø jïïu cooth, 'ba dwøre käru wïnynyö.

⁴ «Ni ö Wuuö Jwøki ni bëëde ni jääŋŋa jiy moe ma nyïïkuk Jwøk baŋu cooth, 'ba dwøre käru wïnynyö ni ïthu käru ciiø.

⁵ Ni mana køpge beeye, ni ‹Løgu rou ennø, ni weyu uutjïëth raay mou ki tïïe mou na reyø; køøre u bëëdö yi ŋöömö man na cïp Wuuö Jwøki jïïu ki kwäyu na bäre bäre.

⁶ Ni ba cäädhu køør juu møøk nee geni tïnynyu ni wøørru geni. Ni ba tïïu ki juu møøk ki ceŋŋu nee cwïnya ba raanynyu; køøre a ba tïïö dëëtu ki gïn mo leth.›

⁷ «'Ba luumma käru wïnynyö, a na Wuuö Jwøk, ni putu cwïnya raanynyø ki køør juu moa tïïyu ki ceŋŋu, nou käla gïï mo leth bäätu.»

⁸ Kiper manøgønø, luumma caan Wuuö Jwøki, eni na wïth jammi bëët, beeye en, ena köö, ni «Kiper mana käru luupa wïnynyö,

⁹ ka adïëri møn, a na Wuuö Jwøk, a jääga baŋ jø tiet mïëri bëët moa en jï løø wï-piny, ki baŋ Nabukedenecör nyeny Babiløn, eni na en cera, ni käla geni nee këëtge yi ŋöömmi en ki jiy mo wø bëëdö yie, këël ki wïth juurre mo wø kïïö ki ŋöömmi en. Ni puta geni raanynyø na bäre bäre, ni tïïa geni ni cwïny jiy böö ki gïno tägi dëëtge, na gïr abuua, ni päthge yi ränynyö mo bäŋ cuŋŋe.

¹⁰ Aani, dïlweel mar met ec, ki dwør met ec, ki kanynyø mar nywöm, ki dwør leek, ki maac mo liel raanynya raanynyø.

¹¹ Ni ö ŋöömmi en bäre ni ränynye, ni tïme na ŋöömö mo cwïny jiy böö ki gïno tägi dëëre; ni ö wïth juurre moøgø ni tïnyge nyeny Babiløn ki cwiiri ma pïërabïriiø.

¹² «'Ba kanyo thum cwiiri moøgø na pïërabïriiø yøø, a na Wuuö Jwøk, nyeny Babiløn, ki jiye bëët, ki ŋöömme ma Kaldia bäre jääla jäälö kiper bääyö marge, ni tïïa paac nee bëëde no oränynyö na bäre bäre.

¹³ Ni ö luup moa cara bëët kiper ŋöömmögø ni käla ge bääte, ni beege luup moa no ogöör piny yi wëëlli en na car Jeremaya dëët wïth juurre bëët.

¹⁴ Ni ö wïth juurre mo thööth ki nyeye mo døøŋŋø ni tïïcge jø Babiløn na laaŋe; ni coola pïïn gïïa reyø dëëtge na tïïcge, ni beege gïïa reyø na tïïcge ki ceŋge.»

¹⁵ Man beeye luumma caan Wuuö Jwøki jïra, eni na Jwø Icriel, ena köö, ni «Lwør athöönh ajäla man ni yie da køøŋø ni en cera en, ni nyootha wëër mara, ni cïpï gø jï wïth juurre moo jääŋŋa ïïni baŋge bëët nee maathge.

¹⁶ 'Ba kanyo maathge gø, ge bøømmø ni tïmge na bøøre ki køør mäny mano jääŋŋa baŋge.»

¹⁷ Kanyøgø athöönh ajäla aputa lwør cer Wuuö Jwøk, ni cïba gø jï wïth juurre bëët moa ö Wuuö Jwøki ni jääŋ aani baŋge nee maa dëëtge ki man maathge gø,

¹⁸ ni beege jø wø bëëdö Jerucalem ki yïth päänye mo Juuda, ki nyeye moge ki jøøa kwörge døøŋŋø moge, nee putge ränynyö, ni tïmge ni cwïny jiy böö ki gïno tägi dëëtge, na gïr abuua, na gïr acïëni, kaawat man bëëde yïth nïne moi ii.

¹⁹ 'Ba jø møøk moo maath gø beege Peerø nyeny Ijep, ki jø kööre moe, ki jøøa kwörge døøŋŋø moe, ki jiye bëët,

²⁰ ki wïth juurre ma teeŋi moa en kaace; ki nyeye bëët mo wø bëëdö yi ŋööm Uc; ki nyeye bëët mo wø bëëdö yïth mïëc jø Pilitin, ni mïëyögø beege Ackelön, ki Geedha, ka Akarön, ka Acdöt ki jøøa no odööŋ yie na kwøw;

²¹ ki jø Ëdöm, ki jø Möap, ki jø Amön;

²² ki nyeye bëët mo Tayar, ki nyeye bëët mo Caydan; ki nyeye mo wø bëëdö løøga bäät naama dwøŋ;

²³ ki jø Didan, ki jø Tëma, ki jø Buc, ki jø wø køc jïëc wïthge;

²⁴ ki nyeye bëët mo jø Arabe; ki nyeye bëët mo wïth juurre ma teeŋi mo wø bëëdö dï tëën;

²⁵ ki nyeye bëët mo jø Dhimri; ki nyeye bëët mo jø Ilam; ki nyeye bëët mo jø Mëdön;

²⁶ ki nyeye bëët mo wø bëëdö jï løø wï-piny, moa kwörge cärö ki moa kwörge bäyö, ni man nø mätha køør maya; ki tiet mïëri moa en bäät piny bëët na nut bäät piny bäre. Køøre kanyo nø mäth jøøgø bëët, nyeny Cëcak omäthi nø na aŋuudi.

²⁷ Ni kö Wuuö Jwøki jïra, ni «Caanï jïge, ni ‹Luumma caan Wuuö Jwøki, Jwø Icriel, eni na wïth jammi bëët, beeye en: Mäthu ni meerru, ni ŋwøgu, ni päänhnhu, ni ba duu maal këët, ki køør mäny mano jääŋŋa baŋu.›

²⁸ 'Ba ni näk mo ge kweer ki man lwørge athöönh ajäla mara cerï nee maathge, wär caanï jïge, ni ‹Luumma caan Wuuö Jwøki, eni na wïth jammi bëët, beeye en: «Uuni, mäthu kiree!

²⁹ Kiper ennø, aana nø tägö ki man jääŋŋa gïn mo leth bäät pääny mana näk cwøla ri nyeŋŋa. ?A uuni, uuno bøthu nidïï nø nou ba jääla? Uuni, u ba bøth ka ajäla. Kiper mäny 'käla bäät jiy bëët mo wø bëëdö bäät piny.» Luummögø caana Wuuö Jwøki, eni na wïth jammi bëët.›

³⁰ «'Ba ï na Jeremaya en, luupi bëët ii wär køpï ni caanï geni dëëtge, ni kööï jïge, «ni ‹Wuuö Jwøk omäri ni eni ena maal, ni nyootha wëër mare, ni dwøre ee tïŋ maal ni eni ena kar bëëtö mare na en kur keere; ni märe døc bäät jiye. Ni ö eni ni tïŋ dwøre maal bäät jø wø bëëdö bäät piny bëët, ni dwøre ena maal kaamar dööt jø wø cwöth nyïïomøki ki tietge.

³¹ Dïŋaŋ okëët ya aŋuun piny bäre, kiper Wuuö Jwøk jïre da løøk ki wïth juurre bëët. eni mar jiy bëët ŋøle ŋølø, ni cïp jøøa reyø dho opëëllö. Luummögø caana Wuuö Jwøki.› »

³² Man beeye mana caan Wuuö Jwøki, eni na wïth jammi bëët, ena köö, ni «Ennø, gïï mo leth onyaay, ni tägi ka baŋ wï jur man nø, ni pïïe baŋ wï jur man nø. Mäny mo teek oööi kaamar atuunna, ni tägi ka ya aŋuun piny.»

³³ Kar kanyøgø jiy moo 'näk ri leny ki køør wëër mar Wuuö Jwøk, rïŋ dëëtge, bäät piny opääŋge bäre, ni tägi ka ya aŋuun piny këël aŋuunne maya. Bäŋ ŋat mo jwöŋi kiperge, ni bäŋ ŋat mo cooŋ rïŋ dëëtge kanya ciel, ni bäŋ ŋat mo koony geni; 'ba rïŋ dëëtge otïmö kaamar wär mo oker piny.

³⁴ U na dïkwääye, jwöŋu ni kïmmu; u na jøøa kwörge døøŋŋø, buugu dëëtu ki bur; kiper cäŋ man ŋaal u yie aöö, ni ö uuni ni päänhnhu ni petu kaamar dak mo pere leth mo reep.

³⁵ Dïkwääye bäŋ kany mo reŋge yie nee bøthge, ni bäŋ kany mo päär jøøa kwörge døøŋŋø wøk ki yie.

³⁶ Wui, dïkwääye, gööu ko oduuru, ni ö dïbwöthe mo wø bwøth pïïth ni jwöŋge ni döötge ena maal, kiper Wuuö Jwøk räänyö ki kar bëëtö marge.

³⁷ Mïëri moa bëët jiyi yïthge ni yïthge met onikïïl ki køør wëër mar Wuuö Jwøk noo liel kaamar maac.

³⁸ Wuuö Jwøk otïŋŋi ki kar bëëtö mare kaamar ŋuu mo ö wøk ki ya abuŋŋö, ni ö mïëri moge ni tïmge ni cwïny jiy böö ki gïno tägi dëëtge, ki køør jøw caan geni ko opëëllö, ki køør wëër mar Wuuö Jwøk noo liel kaamar maac.