Jeremaya 16 - Wëël Jwøk

Luum Gïï Mo Leth Moo Tägi Dëët Jø Icriel Kiper Raay Moge

¹ Man beeye dwør Wuuö Jwøk mana caane jïra, a na Jeremaya, ena köö,

² ni «Kärï nyöömmö ki dhaagø na bäre bäre, ni ba nyöötï ko obwöre ma cwøw ki mään paani en.

³ Kiper mana ŋøla, a na Wuuö Jwøk, kiper obwöc cwøw ko obwöc mään mo wø nyøølli yi ŋöömmi en, ki mëëkge ki wëëkge ni wø nywøl geni, beeye en:

⁴ Geni, ge thøw ki täwe mo leth døc, ni bäŋe jiy mo jwøk geni këël mo koony geni. Dëëtge tïmö kaamar wär mo oker piny. Geno 'näk käci, ni 'näk geni ri leny, ni tïm dëëtge na cam jï wec maal ki lääc paap.

⁵ «Kiper luumma caan Wuuö Jwøki beeye en: Kärï døny yi øtø mo yie da jwøk thøø; kärï ci kuna kïmmi ki geni, ni ba ciï kuna cømï cwïnyge, kiper a na Wuuö Jwøk, mëër mara ni wø ba jøøl, ki met ec mara, ki bëët-mëër yaa paanyø bäätge.

⁶ Jiy moa kwörge døøŋŋø ki moa kwörge bäŋgø ge thøøa yi ŋöömmi en, ni ge ba koony, ni bäŋ jiy mo jwøk geni, ni bäŋ ŋat mo tïïc dëëre ki gïn mo leth kiperge, ni bäŋ ŋat mo gwäära wïïe wøk.

⁷ Ni bäŋ ŋat mo cïpi ki cam jï jø wø kïmmi ni cøma cwïnyge kiper thøø, ni bäŋ gïn mo di maadhø mo cïbe cïbö jïge ni cøma cwïnyge, ge na wëëkge ki mëëkge thøw.

⁸ «Ïïni thuwø, kärï døny yi øtø mo yie da ajwöma ki man pïï piny ki geni, niï cämï ni mädhï ki geni na aciel.

⁹ Kiper mana ŋøl Wuuö Jwøki, Jwø Icriel, eni na wïth jammi bëët, beeye en: Dïlweel mar met ec, ki dwør met ec, ki kanynyø mar nywöm, oraanynya ni nëënö jïïu yïth nïne moo beetu.

¹⁰ «'Ba kanyo caanï luupi ii jï jøøi, noo pëënyge ïïni, na ‹?Aŋø, aperŋø na ö Wuuö Jwøki na caan gïïögø ni døøŋŋø ni leth yøø ni tägö dëëtwa en? ?Agïnaŋø na baacwa, na agïnaŋø na raac na tïïcwa dëër Wuuö Jwøk, Jwøk marø?›

¹¹ køøre oløgï jïge ni Wuuö Jwøk aköö, ni ‹Beeye kiper mana ö kwäyu na wecge aani, ni caathge køør juu møøk, ni tïnyge geni ni wøørge geni; ni wecge aani møn, ni kärge ciik 'moa gwøø.

¹² 'Ba uuni thuwø, uuna tïïö ki gïï mo reyø døc mo kaala moa tïïc kwäyu, kiper ŋati man nø dïïu bëëdö ni caatha køør teek wïc mare na öö ki køør rääö mana en cwïnye, ni mara ba wïnynyu.

¹³ 'Ba ennø, u riema wøk yi ŋöömö man, ni cou yi ŋöömö mør mo kuyu, mo kuc kwäyu thuwø, ni tïmu nou tïnynya juu møøk ki cääŋŋe ki wärre kaace; kiper bäŋ met ec mo nyoodha jïïu.›

¹⁴ «Kiper manøgønø, luumma caan Wuuö Jwøki beeye en: Da nïne mo öö, mo jøw ba kööŋ këët, ni ‹Ŋëët Wuuö Jwøk, Jwøa kwøw, na käl jø Icriel wøk ki Ijep.›

¹⁵ 'Ba geno kööŋ, ni ‹Ŋëët Wuuö Jwøk, Jwøa kwøw, na käl jø Icriel wøk ki paana en jï løø wï-piny, ki yïth mïëri bëët moa riem geni yïthge,› kiper ge duua yi ŋöömö marge na cïba jï kwäcge.

¹⁶ «Ennø, a na Wuuö Jwøk, a jääga baŋ jø maay mo thööth, ni maacge jiya kaawat man wø maac rec. Køøre a jääga baŋ jø dwaar mo thööth, ni dwarge jiya bäät kïte ki bäät thuuri ki kwöra näk gøøde yïth kïte.

¹⁷ Kiper aani, waŋa bëëdö ni neeta uutjïëth bëëtö moge bëët, ni patha okanø ki jïra, ni raay moge kär rwäänyö jïra.

¹⁸ Aani, pïïn raay moa tïïcge ki gïïa bacge coola coolø dëëtge na kwöre ariiø, kiper ŋöömma araanyge, ni pääŋge gø ki juu moge na reyø døc na näk dëëtge bäŋ jwïëy, gïïa näk yia raac ki ge døc.»

¹⁹ Wui Wuuö Jwøk, ï na teek mara, ï na kar gwøk røk jïra, na kar kan røk kany wø pïïc gïï mo lethi bääta, wïth juurre öa baŋï ki kwör mo bäyö, ni köge, ni «Kwäcwa bäŋ Jwøk jïge, 'ba beege juu mo oballe jaak mo bäŋ gïn duuge.»

²⁰ ?Aŋø, løny jï dhaanhø ki man tïny dëëre ki juu? 'Ba këël dee tïïö, ge patha juu ma adïëri.

²¹ Ni kö Wuuö Jwøki, ni «Kiper manøgønø, yie man teek mara otïïa nee ŋäcge, ni nyoodha teek bada jïge nee ŋäcge. Køøre nø, nyeŋŋa putge ka ŋäc ni beeye aani na Wuuö Jwøk.»