Biblia Todo Logo
Bìoball air-loidhne

- Sanasan -

Jeremaya 10 - Wëël Jwøk


Luum Juu Mo Oballe Mo Ba Pääri Ki Wuuö Jwøk

1 Wui, u na jø Icriel, wïnynyu dwøl man caan Wuuö Jwøki jïïu en.

2 Luumma caan Wuuö Jwøki beeye en, ena köö, ni «Kär bëët wïth juurre kwanynyu, ni ba lwäyu ki ŋïïce mo wø tägi maal, këël na bëët wïth juurre ni lwäär ki geni.

3 Kiper gïï wø lam juurre ki køør kööŋŋe moge beege oballe jaak. Kiper geni jaath wø ŋøtge ŋødø paap, ni tieŋi ya rëëmme ki kweey dïnöök.

4 Ni ŋwagi ya jiyi ni mïërö ki warkey ki gwel-bïrö, ni gurge gø piny ki mucumääre nee tïme ni ba nëëŋŋi.

5 Juu moge beege jenni mo otieŋø ni goori, ni ge ba løny ki luubö. Ge di käärö, kiper ge ba løny ki wääth. Käru lwäyö ki geni, kiper ba løny jïge ki man tïïcge gïn mo raac dëëtu, ni ba løny jïge ki man tïïcge gïn mo beer.»

6 Wui Wuuö Jwøk, bäŋ Jwøk mo caala ïïni; dwøŋŋa ïïni, ni teek marï dwøŋ døc, ni nyeŋŋï owïnyö.

7 ?Wui, ï na nyeny wïth juurre bëët, aŋa ni ba lwäyi ki ïïni? Ka adïëri møn, ïïno rømø ki man lwäär ïïni! Kiper ki røk jiy bëët moa wïthge leer dï wïth juurre, këël ki moa en dï mïëri moge bëët moa døøŋŋø, bäŋ dhaanhø aciel mo caal ïïni.

8 Geni bëët wïthge bäŋ acaara ni gena bøøre, ni dïpööye moge beege juu ma jenni na gïï mo oballe jaak.

9 Dëët juu moge wø kïthge kïthö ki gwel-bïrö mo othäädhö mo käli ki Tarcëc, ki warkey mo käli ki yo Upath, ni kïtha rëëm nywïënynyi ki rëëm warkie. Dëët juu moøgø orunynyö ka abïïe mo rege da kït mo mïërö, mo tïïya jøøa nyeŋge reegø ki cwääc abïïe.

10 'Ba Wuuö Jwøk beeye Jwøk mana näk adïëri; ena Jwøa kwøw, ni eni bëëdö na nyeya na bäre bäre. Piny wø tïmö ni kwanynyi kany wø wëëre, ni wëër mare bäŋ wø løny ki jïëny jï wïth juurre.

11 'Ba uuni, u na jø Icriel, caannu jïge na ennø nø, ni «Juu moa näk maal ki piny ba cwääya geni, ge ränynyö bäät piny bäre.»

12 'Ba beeye Wuuö Jwøk na cwääc piny ki teek mare, ni tïïc gø ni teek ki køør leec wïc mare, ni peer maal ki køør acaara mare.

13 Kany wø tuk dhee, maal puta märö kaamar køth. Pøøl wø kööle köölö ki ya aŋuun piny, ni käl køth ni mal, ni wëëk jamø kwön wøk ki yïth kwöra kan ge yïthge.

14 'Ba jiy bëët bëëdö ni wïthge bäŋ acaara, ni bäŋ gïn ŋäcge. Rëëm warkie, wïthge olää juuwi moa thiiwge, kiper juu moa thiiwge beege jap cwøk jaak, ni rege bäŋ jwïëy.

15 Geno oballe jaak, ni gena gïï mo di päädö; kanyo tïme na cäŋ ajäla mana wäŋŋi kiperge, ge ränynyö.

16 'Ba eni na Jwø Jeekap ba caal gïïögø, kiper bee eni na tïïc jammi bëët, ni cwääc jiye ni beege thööge ma jø Icriel. Eni nyeŋŋe beeye Wuuö Jwøk, eni na wïth jammi bëët.


Luum Ööny Jø Leny Kuna Raanyge Paac

17 U ni bëëdö kany mo ociel dïër en, cooŋŋu japu kanya ciel nou aayu!

18 Kiper luumma caan Wuuö Jwøki beeye en, ena köö, «Ka adïëri møn, beeye kar kany keetha jiy yie ennø, mo wø bëëdö yi ŋöömmi, ni kïtha bäätge ki gïï mo leth mo bäŋ ŋat mo bøth ki gø.»

19 Wui, atïmö ni leth jïra kiper ŋwiili moa jwøra! Atwøt 'moa bëëdö ni ba caŋŋi. Køøre aana köö, ni «Ka adïëri møn, täw man apïï dëëra, 'ba käära käärö jaak.»

20 Powa ma Jerucalem oränynyi kaamar oduŋkaara mo opädhö, mo thøøli moe ocöötö bëët; ni ö jø powa ni aacge yie, ni ge ba joot këët. Bäŋ dhaanhø mo powa cäŋe dwøk kare, ni bäŋe ŋat mo geer gø.

21 Kiper dïbwöthe atïmö ni wïthge bäŋ acaara, ni Wuuö Jwøk ba pëënyge. Kiper manøgønø, bëëtö marge kär bëënynyö, ni ö jiyi moge bëët ni keethge.

22 Wïnynyu dwøri na pïï en; ennø, tiet dëëci wïnyö ni dïmmi ni öö ki wï-piny, nee päänye mo Juuda raanyge ni tïmge na kwör bëëte jï othööe.


Lam Mar Jeremaya

23 Wui Wuuö Jwøk, ŋääa ni bëët dhaanhø ba en cere keere, ni patha dhaanhø ki dëëre ni wø neet kwör wø caadhe.

24 Wui Wuuö Jwøk, pwöny aani ka ajäla mana näk kare, mo ree bäŋ wëër, naa ba ränynya.

25 Kïth wëër marï bäät wïth juurre moa näk ï kucge, ni beege jiy moa näk nyeŋŋï ba cøørge, kiper geni, wa jø po Jeekap, waana thöörge; waana thöörge møn, ni raanyge kar bëëtö marwa.

© The Bible Society of Ethiopia 

Bible Society of Ethiopia
Lean sinn:



Sanasan