Jepaniya 2 - Wëël Jwøk

Luum Duun Baŋ Wuuö Jwøk

¹ Wui, u na wï jur mo wïthu ba laay en, cooŋŋu dëëtu kanya ciel,

² kanyo poode nou poot kär jwieø wøk kaamar lethø, kanyo poot wëëc Wuuö Jwøk ni wø liel kaamar maac ni poot kär ö bäätu, kanyo poot cäŋ wëëc Wuuö Jwøk ni poot kär ö bäätu.

³ Manynyu Wuuö Jwøk, u na mwöl bëët bäät piny, ni wø gwøk ciik Wuuö Jwøk. Manynyu bëënynyö, ni manynyu bëët mööl; kanymør u gwøe gwøø cäŋ wëër mare.

Luum Ajäla Mano Jääl Nyïïmän Jø Juuda Ki Gø

⁴ Geedha odööŋ ni bäŋ jiy yie, ni ö Ackelön ni dööŋe no oränynyö. Jø Acdöt geno laar käl ki dhöör cäŋ, ni ö jø Akarön ni rïëm geni wøk ki yi pääny marge.

⁵ Wui jø Kelita, otïmö ni leth jïïu, u ni wø bëëdö bäät naama dwøŋ. Wui, u ni en yi ŋööm Keenan, ni beeye ŋööm jø Pilitin, dwør Wuuö Jwøk jääla uuni. Eni u raanynye raanynyø, ni tïme ni bäŋ dhaanhø mo dööŋ mo beet ŋöömmögø.

⁶ 'Ba ŋöömö maru man wø en bäät naama dwøŋ oput tïmö na kar kwaath, na kar bëëtö jï dïkwääye na kar rïïö jï rööm.

⁷ Ni put ŋöömmögø tïmö na mar jø dhi øt Juuda moa no odööŋ ni kwøw, ni tïme ni dïëk moge kwaacge yie. 'Ba wø tïme na abøøya, geno wäro ci yïth uut jø Ackelön kuna butge yïthge; kiper geno gwøk Wuuö Jwøki, Jwøk marge; ni ö eni na Wuuö Jwøk ni cäŋ bëëtö marge dwøk kare.

⁸ Wuuö Jwøk aköö, ni «Aani, ajaany mar jø Möap, ka ajøøŋ mar jø Amön mana tïïcge dëët jiya, ki luupa reyø na carge dëër ŋöömö mar jiya, awïnynya.»

⁹ Kiper manøgønø, Wuuö Jwøk, Jwø Icriel, eni na wïth jammi bëët, aköö, ni «Ka adïëri møn, kaa man bëëda naa kwøw en, jø Möap, poge tïmö kaamar Cødam, ni ö jø Amönni ni tïm poge kaamar Gømöra; ni ö luummi mo raac ni put tuuö yïth ŋøøpge, ni tïm ŋøømmi moge na buri mo acäbö, ni put ŋöömö ränynyö na bäre bäre. Jiy 'moa moa dööŋ ni kwøw, jap jøøgø otwierge, ni putge bëëtö yi ŋöömö mar jøøgø ni tïme na marge.»

¹⁰ Manøgø otïmö na gïno cool dëëtge na kar atöör marge, kiper gena jädö ni buuge jic Wuuö Jwøk, eni na wïth jammi bëët.

¹¹ 'Ba Wuuö Jwøk oput tïmö na gïr lwär jïge kanyo ö Wuuö Jwøki noo raany juu bëët moa en yi ŋöömge. 'Ba wïth juurre bëët moa en bäät naama dwøŋ cøŋge okëëlge piny nyïm Wuuö Jwøk ni wøørge gø, ni ŋati man nø ena yi ŋööm poge.

¹² Wui, u thuwø, u na jø Kuuc, u di nääö ko opëëllö mar Wuuö Jwøk.

¹³ 'Ba Wuuö Jwøk cere orwiee thuwø bäät wï-piny ni jääl gø, ni raany Aciria, ni wëëk pääny Nineba ränynyö ni dööŋe ni bäŋ gïrpiny yie, ni put gø wëëk talø kaamar dïtëën.

¹⁴ 'Ba oput tïmö na kar rïc jï pïïth dïëk ki pïïth dhäk, na kany bëët wïth lääy ma teeŋi yie. Tule ki teeŋ wec wäär møga bëët geno noor wïth were mo uudi moe. Weny otïmö ni ge jwöŋi ka dhøk awëërnyeŋŋi mo uudi moe, ni dhøk uudi moe bëëdö no otøyø piny jaak, ni gute mo uudi nëënö wøk jaak.

¹⁵ Manøgø beeye gïno tägi dëër pääny mo ogwøø ni teek, mo töödö ni cäänö ki cwïnye, ni «Bee aani keera, ni bäŋ pääny mo kaal aani këët.» Raŋŋu ränynyö mano ränynye ki gø mø, Tïmö na kar rïïö jï lääy! Jiy bëët moo pöödhi ki deŋŋe, obuuge, ni ŋeethge bäät gø, ni gwaŋge gø.