Jeemeth 5 - Wëël Jwøk

Rääc Jøøa No Okwär

¹ 'Ba ööu nø, u no okwär, ni jwöŋu ni rëëdu kiper gïïo leth moo ö bäätu.

² Jap kwärö mou akwäk, ni ö abïïe mou ni cami ya alweele.

³ Ni ö warkie mou ki gwet-bïrö mou ni cami ya nyalli. 'Ba nyal marge otïmö na nyuudhi mo jääla uuni, ni waaŋ dëëtu keda maac. Uuna känö ki jammi kiper nïr cuŋ piny.

⁴ Neennu, gwet jøøa kac pwöth mou na møtu atïmö ni rëëdö. Ni ö oduuru mar jøøa kac caammi mou ni wïnye ïth Kwäärö Wuuö Jwøk, eni na wïth jammi bëët.

⁵ 'Ba uuna bëëdö yi kwär bäät piny ni yïthu met, ni mïn cwïnynyu ni jäŋŋu keda cäŋ twëër.

⁶ Ni jäällu ŋat mo mare beer ni 'nägu gø. 'Ba eni bäŋ wø pïëmö ki uuni.

Cïbu Cwïnynyu Piny Ri Jwør Gïï Mo Leth

⁷ Kiper manøgønø, nyïïmera, cïbu cwïnynyu piny, këël mano ö Kwäärö. 'Ba ŋääø, ni ŋat puur wø koora jap wø beyø ni wø ciek yi ŋöömö, ni cwïnye ee cïp piny ki gø, këël mano päth køth dhikøthi ki køth arïïa.

⁸ 'Ba uuni thuwø cïbu cwïnynyu piny, ni maau cwïnynyu kanya ciel, kiper ööny Kwäärö kare acäännö.

⁹ Käru dwaallø ki dëëtu keeru, nyïïmera, nou ba ŋøl wøk. Kiper neennu, dïŋut luup cuŋŋa dhøk uudi.

¹⁰ Nyïïmera, ni näk mou manynya neen jöör jwør gïï mo leth ni cwïny ocïp piny, raŋŋu bëët nyïïkuk Jwøk, jøøa cäänö ki nyeŋ Wuuö.

¹¹ 'Ba neennu, jø wø ba dääŋi wø cwølø cwølø ni yïthge met. 'Ba bëët Jööp na bëëde kare awïnynyu, ni neennu gïna tïïc Wuue kipere ya aŋuudi, kaawat mana bëët Wuuö ni yie bäth, ni cwïnye laar pädhö ki gïr dhaanhø.

¹² 'Ba nyïïmera, dï japøgø bëët, weyu kööŋ, ni bäŋe ŋat kööŋ ŋëët ŋøøm wala maalø, wala kööŋŋe møga mo wø kööŋö ki ge. 'Ba wär dwøl man wø caannu bëëde kare, nee maru jïëy, put bëëtö na jïëy, 'ba nee maru kweer, put bëëtö na kweer, kiper nee bäŋe ya ajäla mo ö bäätu.

Pwöc Kiper Lam

¹³ ?Da dhaanhø dïïu mo da gïn mo leth mo opïï dëëre? Wär läme. 'Ba ni näk da ŋat mo yie met, wär wäre ki dudi ni pwøya Jwøk.

¹⁴ ?Da dhaanhø mo tuu dïïu? Wär jaak acooŋ Jwøk cwøle, ni ö geni ni lämge bääte, ni wïïrge dëëre ki maaw ki nyeŋ Wuuö.

¹⁵ 'Ba lam ŋat mo cwïnye da ŋäädhe, dëër ŋata tuu owëëk jöönnö, ni ö Wuue ni tïŋ gø maal. 'Ba ni näk eno bääyö, raaye owec.

¹⁶ Kiper manøgønø, køpu raay mou yïthakiyu keeru, ni lämu kiperu keeru, kiper nee dëëtu wø jöönge. 'Ba lam ŋat mo beer jïre da teek mo dwøŋ døc ki man tïïc jammi ni cööpge karge.

¹⁷ 'Ba Ilaaja na bëëde, ena dhaanhø mo ocwääö kaamarø. 'Ba ena lämö ki cwïnye bäre nee køth ba pädhe. Ni bëët køthi ki cwiiri adäk ki dwäde abïciel ni kär pädhö bäät piny.

¹⁸ 'Ba køøre ena cäŋ lämö, ni ö maalli ni cïp køth, ni ö pinynyi ni ciek jape.

¹⁹ 'Ba nyïïmera, ni näk da dhaanhø dïïu mo gaa wøk ri jöör adïëri, ni duui ya ŋat mørri kare,

²⁰ wär ŋääe ni ŋat wø duu ŋat raay kare, ni mäna gø ki jööre na raac, piema jwïëc ŋatøca ki thøø, ni raay mo thööth ogëëŋe.