Jeemeth 4 - Wëël Jwøk

Nyawat Piny

¹ ?Agïnaŋø ni wø käl lenye ki wëëye dïïu? ?Aŋø, patha gïïa reyø ni wø nieŋ cwïnynyu køørge ni wø këëdi yïth cwïnynyu?

² Gïrpiny wø manynyu manynyø, 'ba noo ba jootu gø, u nägö. Ni parru gïrpiny, 'ba noo ba ci jïïu, u wëër ni këëdu. Ni ba ci jïïu kaper na käru pëëö.

³ 'Ba u wø pëëö møn, ni ba mëëgi uuni, kiper u pëëö ka pïëc mo patha kare, nou manynya gïïa reyø wø nieŋ cwïnynyu køørge nee yïthu mïnge.

⁴ ?Nyie, u ni wø kwier luum Jwøk en, kuyu ni ŋat wø näk nyïïawäädi ki piny, mare män ki Jwøk? Kiper manøgønø, ŋat wø many piny nee tïme na nyawatge, wø tïïya ree ni ena nyimän Jwøk.

⁵ Wala you caarø ni gïn wø caan Wëël Jwøki oballe jaak, ni wø köö, ni «Jwøk cwïnye lääŋŋa jwïëy mana tïïe nee bëëde dëëtø.»

⁶ 'Ba eni wø cïpö ki met ec mo päl. Ni beeye ni wø caan, ni «Jwøk män ka jø atöör, 'ba met ec wø wëëge jøøa mwöl.»

⁷ Kiper manøgønø, cïpu dëëtu jï Jwøk. Ni cuŋŋu karu ni kwierru anägö, 'ba eno reŋi dïïu.

⁸ Nyiigu buut Jwøk, 'ba eno nyänh buutu. Lwøgu ceŋŋu, u na jø raay, ni døøyu cwïnynyu mo leer, u ni luup oriewi cwïnynyu en.

⁹ Beerra man kïmmu, ni päth cwïnynyu, ni jwöŋu. Døøyu ŋeethø maru pänh cwïny, ni døøyu met ec maru kïmmö.

¹⁰ Døøyu dëëtu mo mwöl nyïm Wuuö, 'ba uuno røønye.

Pwöc Kiper Man Ba Ŋøl Wat Wøk

¹¹ Nyïïmera, käru cäänö ki raay dëëtu keeru. Kiper ŋat wø cäänö ki raay dëër coki, wala ŋøla coki wøk, ŋatøgø caana raay ri ciik Jwøk, ni ŋøla ciik Jwøk wøk. 'Ba ni näk ciik Jwøk iï ŋøl wøk, ï patha ŋat wø gwøk ciik Jwøk, 'ba ïïna tïmö ni ïïna dïŋut luup.

¹² Kiper ŋata cïp ciik Jwøk nut ni beeye dïŋut luup, ni beeye eni ni løny jïre ki man piem jiy wala ki man raany geni. ?'Ba ïïna ŋa, ni ŋølï wadu wøk?

Gïno Tägi Diøø Kuyu

¹³ 'Ba ööu nø, u jø wø köö, ni «Dïcäŋi wala diøø wa cøøa paani nø ni ciwa paani nø, nee wa bëëtwa ki cwiir kaace, nee wa gädhwa ni jïtwa ki jammi,»

¹⁴ ni gïno tägi diøø kuyu. ?Kwøw maru agïnaŋø? Kiper u caala rwöc ni wø nëëni ki kany mo thiinh ni laar rwäänyö.

¹⁵ 'Ba mana dou caanø, beeye ni «Noo kö Wuue, wa kwøw, ni tïïwa gïn wala manece.»

¹⁶ 'Ba maru atïmö na atöör ni bäŋ gïn mo ŋäyu. 'Ba teeŋ atöör manøgø bäre raac.

¹⁷ 'Ba ŋat wø ŋäc gïn mo beer mo dee tïïö, ni ba tïïc gø, atïmö na bääyö jï ŋatøgø.