Jeemeth 1 - Wëël Jwøk

Määdhe

¹ Aana Jeemeth na laŋ Jwøk ki Kwäärö ma Jecu Krictø. A määtha uuni na tuŋi apaar kurriiø, u no okeethø dï piny.

Ŋäädhe Ni Bäŋ Ataa

² Nyïïmera, yïthu mïnge ki teeŋ gïïo ni leth yøø bëët kany wø pïïcge dëëtu.

³ Kiper ŋäyu ni pääny ŋäädhe maru beeye wø käl tëënnö.

⁴ 'Ba wëëgu tëënnö thur kare, kiper nou thuru karu na bäre bäre, ni bäŋ gïn mo läämö.

⁵ 'Ba ni näk da ŋat mo leec wïc mare orëëm dïïu, Jwøk wär pëënynye, ŋat wø cïpi jï jiy bëët ki cwïnye bäre ni ba pëëö, 'ba omëëk eni.

⁶ 'Ba wär pëëe ni ee ŋäädhö, ni bäŋ ataa, kiper ŋat wø tääö caala athaŋ naama dwøŋ ni wø jøøc jame jaak.

^7-8 'Ba teeŋ ŋat ma enøgønø mo cwïnye da luup ariiø ni wø dääŋi ki yi bëëtö mare bäre, kär nee caara gø ni da gïn mo joode joodø baŋ Wuuö.

⁹ 'Ba cöögö mo can beerra man mïn yie ni näk mo di røønyø,

¹⁰ ni ö ŋata näk okwär ni mïn yie ni näk mo ocännö, kiper eni ränynyö kaamar wï luum mo oŋøøk ni wø ränynyi.

¹¹ Kiper cäŋ wø tuulö ki kwaaye ni taal luum. Ni päth wïïe piny, ni räny beenynye. Kaawat manøgø thuwø, ŋat mo okwär ocänni ni eni ena bäät tïïc mare.

Luum Jïëny Gïï Mo Leth

¹² Meta yi ŋat wø jïëny päänynyö, kiper kany wø bööt päänynyö, eno jïti ka adun kwøw mana näk obuuk Jwøki jï jø wø mëër ki eni.

¹³ Kär dee ŋat köö kany wø päänynyi, na «A päänynya Jwøki.» Kiper ba maar lønyø ki man pääny Jwøk ki raay, ni eni ki dëëre bäŋ ŋat mo päänynye.

¹⁴ 'Ba ŋati man nø wø päänynyi kaper gïn wø nieŋ køør gø, kany wø pari ya cwïnye ni cøøra gø.

¹⁵ Køøre gïn wø nieŋ ri gø, wø jïtö ki nyey ni nywøl raay. 'Ba kany wø døøŋ raayi, wø käla thøø.

¹⁶ Käru cøøgi, nyïïmera, u na mëëra ki uuni.

¹⁷ 'Ba muuce bëët moa näk othur karge wø ööi ki maal ni öge piny ki baŋ Wuuö na näk wää tarri ni wø ba dak, ni ba caal tïpö ni wø dääŋi.

¹⁸ Ni beeye ki køør mana manynye ki wïïe keere na cwääc øøni ki køør luum adïëri nøø tïmø ni ø caala thwöth beel ri moa cwääe.

Jø Wø Wïny Luum Jwøk Ni Tïïcge Gø

¹⁹ 'Ba ŋäyu gïn, nyïïmera, u na mëëra ki uuni. Beerra man ö ŋati man nø ni laar luubö wïnynyö, ni ba laar cäännö, ni ba laar wëër.

²⁰ Kiper wëëc dhaanhø bäŋ wø wëëk beeny Jwøk thur kare.

²¹ Kiper manøgøøni, weyu gïïa reyø bëët ki gïïa näk patha karge bëët, ni jïëyu ki luumma piith cwïnynyu nou mwöl, na näk løny jïre ki man piem jwïëyu.

²² 'Ba bëëdu ni uuna jø wø tïïc luum Jwøk, ni ba tïmu nou wïnynya luubö keere nou cøøga dëëtu.

²³ Kiper ni näk da ŋat mo wïnynya luum Jwøk jaak, ni ba tïïc gø, eni caala dhaanhø mo raŋŋa ree ki räŋi.

²⁴ Kiper dëëre wø raŋŋe raŋŋø ni aae ki wääthe ni put wïïe wïlö ki kïte.

²⁵ 'Ba ŋat wø raŋ ciik Jwøk na näk kare døøc, na näk beeye jöör pät jiy, ni put bëëtö ri gø ni ena ŋat tïïc man wø tïïc gø, ni ba tïme na ŋat wø wïny luubö jaak ni wø wïïe wïl, teeŋ ŋatøgøøni ogwïëth kiper mana tïïe.

²⁶ 'Ba ni näk da ŋat mo dëëre ee caarø ni ena ŋat Jwøk, ni leebe käre gwøø, eni cøøga ree keere, ni lam mare bäŋ tiere.

²⁷ 'Ba lam mana näk adïëri na näk bäŋ gïn mo raac dëëre nyïm Jwøk na näk Wuuö, beeye ki man gwøk obwöre moa näk kïïe ki määr thuunhnhi ri gïï wø leth wø pïï dëëtge, ki man ö dhaanhe ni män ree ki raac piny.