Ibaru 13 - Wëël Jwøk

Tïïe Mo Wø Met Yi Jwøki Ki Ge

¹ Bëëdu nou mëër ki dëëtu ki mëëc nyïïmëëe.

² Kär nou weya man pänhnhu jøw mo path, kiper jø møøk nyïïatwiet maal apänhge na enøgønø ni kucge.

³ Lääŋŋu jøøa no otwöö, kede u ena yi twöc ki geni. Ni lääŋŋu jø wø caanni, keda u di caannø thuwø.

⁴ Beerra man tïm nywömmi na gïn mo owøørø jï jiy bëët, ni ba wëëk kar joot dëël mar nywöm ränynyö. Kiper kääpe ki jø lugi, marge oŋøl Jwøki wøk.

⁵ Bëëdu ni dëëtu you gwøø ki mëëc jammi, ni uuno rømø ki mou na en jïïu. Kiper Jwøk aköö, ni «U ba leeŋa piny, ni ba wiia uuni.»

⁶ Kiper manøgønø, ø doo köö ni yøø ŋäädhö, ni «Wuuö Jwøk beeye dïkunyi mara, naa ba doo lwäyö. ?Aŋø, dhaanhø jaak, agïnaŋø noo tïïe dëëra?»

⁷ Lääŋŋu jøøa bwøth uuni, jøøa caan luum Jwøk jïïu. Caarru bëëtö marge këël aŋuunne, ni ŋwaallu ŋäädhe marge.

⁸ 'Ba Jecu Krictø poot na kare, ya awääre ki dïcäŋi, këël na bäre bäre.

⁹ Kär nou wëëga wïthu maaŋŋø ki pwöc ma teeŋi mo path. 'Ba gïna beerra eni beeye ki man wëëgø cwïnynyø tëënnö ki ri met yi Jwøk, ni patha kiper gwøk ciik mo caammi ni wø bäŋ gïn duuge jï jø wø caath køørge.

¹⁰ 'Ba jïïø da gïn wø cïp olämme bääte, mo jø wø tïïö yo oduŋkaara kär jïëö ki man camge gïno cïp bääte.

¹¹ Kiper dëët lääy mo wø remge kïth Kwääy Lammi Mana Dwøŋ yi kanya en kur keere na pere leth no okïdi kiper wëën raay, dëëtge wø waaŋŋa wøk ŋää kiir.

¹² Kaawat manøgø thuwø, Jecu gïï mo leth ajwøre wøk ŋää kiir, kiper nee jiy tïïe ni ena kur keerge na mo Jwøk ki køør remme kiree.

¹³ Kiper manøgønø, beerra man cøø baŋe ŋää kiir, ni ø di buuö kipere.

¹⁴ Kiper jïïø bäŋ pääny mo ruu kany, 'ba ø manynya pääny mano ööi.

¹⁵ Kiper manøgønø, beerra man cïpø ki pwøc na muuce cooth jï Jwøk ki ri Jecu, ni beege gïï wø ööi ki dhøgi mo wø jïëc nyeŋŋe.

¹⁶ Kär tïï gïïa beyø weyu, ki nywaak gïïa en jïïu. Kiper teeŋ muuce moøgø, Jwøk yie met ki geni.

¹⁷ Leŋŋu dööt jø wø bwøth uuni, ni jïëyu geni. Kiper ge koora jwïëyu, ni ŋäcge ni beege noo pëënynyi ki gïïa tïïcge. Beerra man wëëgu geni tïïc gïnögø ni yïthge met, ni cwïnyge ba peek. Kiper ni näk ma enøgønø tïmö ni bäŋ gïn mo beer mo kwanynyu.

¹⁸ Lämu kiperwa. 'Ba ŋäcwa ni cwïnywa leer, ni wa manynya man bëëtwa ki bëëtö mana näk adïëri ki yïth jammi bëët.

¹⁹ A kwaya uuni ki man lämu ki cwïnynyu bäre, kiper naa laara duu baŋu.

Määdhe Moa Näk Aŋuudi Ki Gwïëth

²⁰ 'Ba kawaane Jwøa näk Jwø bëët-mëër, ŋata duu Kwääyø ma Jecu wøk ki yi thøø, na näk dïkwääy dïëk mana dwøŋ, ki ri rem luumma tuut na näk bäŋ cuŋŋe,

²¹ uuno wëëk gïïa beyø bëët, kiper nee mana manynye tïïyu, ni tïïc gïï wø met yie ki ge yïth cwïnynyø, ki ri Jecu Krictø, ŋat wø en ajiemmi jïre këël na bäre bäre. Enøgønø.

²² 'Ba nyïïmera, a kwaya uuni ki man cegu ïthu ki luumma köömma uuni ki gø, kaawat mana göönna baŋu ki luubö mo ciek en.

²³ Beerra man ŋäyu gøøni ni cöögø ma Timöthi apät, ni uuno jootwa ki eni ni näk eni laara öö.

²⁴ Määthu jø wø bwøth uuni, ki jø Jwøk bëët. 'Ba uuna määth jøøa käl yi ŋööm Itali.

²⁵ Met ec bëëde bäätu bëët. Enøgønø.