Galeecia 3 - Wëël Jwøk

Ciik Wala Ŋäädhe

¹ Wui, u na jø Galeecia ni bäŋ wïdhi en! ?Aŋa na maaŋ wïthu, u na Jecu Krictø anyooth nyïmmu bëët ni eno gur bäät jaadha no odëëdö?

² 'Ba wïnynyu mara, nou pëënynya ki gïrpiny aciel keere. ?Jwïëc Jwøk, jootu kaper tïïe moa en ri ciik Jwøk wala jootu kaper mana wïnynyu ni ŋääthu gø?

³ ?Aŋø, uuna tïmö ni uuna bøøre? ?U na nø tägö ki mo Jwïëc Jwøk, u doo cäŋ døø baŋ tïïe mo dëël?

⁴ ?Aŋø, gïïa thööth na kwøŋu jwør, jwørru ka jaak? Ki jïra, ni bäŋ dou jwørø jaak.

⁵ ?Eni ni wø cïp Jwïëc Jwøk jïïu, ni tïïc gïï mo døøŋŋø mo rëëma ec dïïu, wø tïïe ka køør tïïe moa en ri ciik Jwøk, wala tïïe kaper mana wïnynyu ni ŋääthu gø?

⁶ Këël Eeberam «Ena jïëy ki Jwøk ni ŋääth gø, ni jïëyi no obëënynyö ki køør ŋäädhe mare.»

⁷ ?Käru joodø? Jø wø näk jø ŋäädhe beege na wäät Eeberam.

⁸ 'Ba wëël Jwøk, na ŋäc gø cøøn dïkwøŋ ni juurre jïëc Jwøki jïëö ni marge beer ki køør ŋäädhe, luumma nyään na met akwøŋ køp jï Eeberam, ni kööe, ni «Beeye ïïni noo gwïëth wïth juurre bëët ki køørï.»

⁹ Kiper manøgønø, jø wø näk jø ŋäädhe ogwïëdhö ki Eeberam na aciel, ŋata kwøŋ ŋäädhö.

¹⁰ Kiper jiy bëët mo wø ŋääth tïïe moa en ri ciik Jwøk, acïëni ena bäätge. Kiper ogöörö, na «Acïëni oen bäät jiy bëët mo wø ba gwøk jammi bëët moa näk ogöör yi wëël ciik Jwøk, ki man tïïcge ge.»

¹¹ 'Ba kawaane ajoot, ni bäŋ dhaanhø mo doo jïëö ni mare beer nyïm Jwøk ki køør ciik Jwøk. 'Ba «Ŋat wø jïëc ki køør ŋäädhe, kwøw.»

¹² 'Ba ciik Jwøk ba en ri ŋäädhe. Kiper «Ŋat wø tïïc ge, okwøw ki køørge.»

¹³ 'Ba Krictø acïëni mana doo en bäätø kiper ciik Jwøk, awëënne, kiper mana tïme ni cien kaperø. Kiper ogöörö, na «Acïëni oen bäät jiy bëët mo wø 'näk no oŋaap bäät jaath.»

¹⁴ Ni beeye kiper nee gwïëth mana kwøŋ Eeberam gwïëth ki gø nee tïme ni ena bäät juurre ki ri Krictø Jecu, kiper nee Jwïëc Jwøk mana kwøŋ buuk nee joodø ki ri ŋäädhe.

Ciik Ki Luumma Buuk

¹⁵ 'Ba nyïïmera, nou cäänna ki luubö mo yaa päärö ki teeŋ gïn wø tïïc jiyi. Ni këël dwør dhaanhø mo othøw, bäŋ ŋat mo wiil gø, wala cäŋe ka meetø, ni näk mo onø caan.

¹⁶ 'Ba gïïa buuk, buuka jï Eeberam ki nyikwaare. Ni kär cwøl Wëël Jwøki ni «Nyïïkwaayï» ni kede ge thööth. 'Ba caana aciel keere, ni «Nyikwaarï,» ni beeye Krictø.

¹⁷ 'Ba tier mana caana beeye en, ni ciik Jwøk na cïp ki køør cwiiri ma dïpe aŋween ki pïëradäk, luumma kwøŋ Jwøki tuut bäŋ wø wiile, ni tïïc gïna buue ni bäŋ tiere.

¹⁸ 'Ba ni näk olaawi wø cïp ka køør ciik Jwøk, ba cïp ka køør gïna buuk këët. 'Ba acïp Jwøki jï Eeberam møn, ki køør buuk.

¹⁹ ?Aperŋø nø, ni dee ciik Jwøk? Ciik Jwøk acïp kiper luup moa dhal, këël kanya di nyikwaarø öö, ŋata buuk. 'Ba luummögø caana nyïïatwiet maalli ki dhi nyïjöö.

²⁰ 'Ba nyïjöö wø caatha luum acooŋe ariiø. 'Ba Jwøk beeye aciel.

Gïna Cïp Ciik Kipere

²¹ ?Aŋø, ciik Jwøk nø, atïmö ni män ki gïïa buuk Jwøki? Ba doo løny! Kiper onää da ciik Jwøk mo ocïbö mo maara cïpö ki kwøw, bëënynyö doo ena køør ciik Jwøk.

²² 'Ba Wëël Jwøk aköö, ni jiy bëët otwöc raayi, kiper nee luumma kwøŋ buuk ki køør ŋäädhe ki ri Jecu Krictø, nee tïme ni mëëga jø wø jïëy ni ŋääthge.

²³ 'Ba kanya poode ni ŋäädhe poot kär öö, ciik Jwøk ena bäätø, ni øøno maa ki teek, këël kanya di ŋäädhe nyoodhø yie.

²⁴ Kiper manøgønø, ciik Jwøk beeye dïkuri marø këël mana ö Krictø, kiper nee ø jïëc Jwøki ni marø beer ki ri ŋäädhe.

²⁵ 'Ba kawaane na nø ö ŋäädhe, ø ba en tier dïkuri këët.

²⁶ Kiper uuna wäät Jwøk bëët ki køør mana ŋääthu Krictø Jecu.

²⁷ 'Ba uuni bëët na lwøk na nyuudhi dëër Krictø, Krictø arøøu dëëtu.

²⁸ 'Ba kawaane bäŋ ŋat Juuth wala ŋat Gïrïïk këët, ni bäŋe laŋŋø wala ŋat mo bëëdö ka wïïe keere, ni bäŋe thwønh wala maath, kiper uuna tïmö ni uuna aciel dëër Krictø Jecu.

²⁹ 'Ba ni näk uuna mo Krictø, uuna nyïïkwaac Eeberam møn, ni uuna lwiidhi, kaawat mana kwøŋ buuk.