Galeecia 2 - Wëël Jwøk

Pøøl Ajïëc Nyïïatwieli Møga

¹ 'Ba na tïme na køør cwiiri apaar kurŋween, aana cäŋ døø yi Jerucalem, ki Barnaba, ni aacwa ki Tayta na aciel.

² Naa cii kaper na nyoothi ya Jwøki jïra, ni peedha luumma nyään na met nyïmge ni wø køba cooth dï juurre. 'Ba mara caana jï jøøa døøŋŋø kur keerwa naa ba tïma kaamar ŋat mo rïïŋö jaak, wala ŋat mo reeŋø ni ŋwiec mare bäŋ tiere.

³ 'Ba Tayta na bëëdö buuta, këël na näk ŋat Gïrïïk, kär maa ki teek nee daŋ.

⁴ 'Ba luummögø täga baŋ nyïïmëëe moa näk patha adïëri na duny ya acooŋa ki waŋjöö mør mo kuc, ni ge raŋa pät marwa na en ri Krictø Jecu, nee wa cäŋge dwøk yi twöc.

⁵ 'Ba wa kär jïëy ki luumge, këël kany mo thiinh, kiper nee luumma nyään na met na näk adïëri, nee put bëëtö kare kiperu.

⁶ 'Ba jøøa wäŋŋi ni døøŋŋø kwörge yøø, a caana gø jïïu, ni jøøgø bäŋ gïn mo ege nyoodhø jïra. Nee kwörge døøŋŋø wala therø bäŋ gïrge ki jïra. Kiper Jwøk luumme aciel kiper jiy bëët.

⁷ 'Ba ajootge møn, ni luumma nyään na met owëëk aani kiper jøøa näk patha odaŋø, kaawat mana wëëk luumma nyään na met Piter kiper jøøa näk odaŋø.

⁸ Kiper eni na tïïö dëër Piter nee tïme na nyïïatwiel ki man ci baŋ jøøa näk odaŋø, atïïö dëëra thuwø kiper juurre.

⁹ 'Ba na ŋäcge met yi Jwøk mana wëëk aani, Jeemeth ki Ciipa, ki Jøøn, jøøa wäŋŋi ni døøŋŋø kwörge, ceŋwa amakge ki Barnaba ni ge nyootha dwätö jïwa, ni wa doo cøøa baŋ juurre, ni cige baŋ jøøa näk odaŋø.

¹⁰ 'Ba beeye luubö aciel keere na caange jïwa, ni lääŋwa jøøa can. Ni beeye mana manynya ki cwïnya, nee tïïa.

Pøøl Piter Ajooe Antïëk

¹¹ 'Ba na ö Ciipa yi Antïëk, ena jääla nyïme, kiper eno bääyö.

¹² Kiper dïkwøŋ kanya poode ni bäŋ jiy mo oöö ki baŋ Jeemeth, eni wø cämö ki juurre. 'Ba na ö jøøgø, ena døø cään, ni pääe ki ge, kiper mana lwääre ki jøøa no odwätö ri luum daŋ.

¹³ Ni ö jø Juuthi møga ni cige ya atade manøgø ki eni ciel. Këël Barnaba akïthge ra atatge.

¹⁴ 'Ba na jooda geni ni ge ba cäädhi ki køør luubö mana näk adïëri na en ri luumma nyään na met, acaana jï Ciipa nyïmge bëët, ni kööa, na «Aŋø, ni näk ïïna ŋat Juuth mo bëëdö kaamar jur, niï ba bëëdö kaamar jø Juuth, juurre a diï gø maaø ki teek nidïï nee bëëtge kaamar jø Juuth?»

Jø Juuth Ki Juurre Ge Køny Ka Ri Ŋäädhe

¹⁵ 'Ba këël waani ki dëëtwa na näk onywølø na jø Juuth, ni patha juurre ni wø cwøl na jø raay,

¹⁶ ŋäcwa ni dhaanhø ba jïëc Jwøki ni mare beer ki køør tïïe moa en ri ciik Jwøk, 'ba beeye ki køør ŋäädhe ni en ri Jecu Krictø. Këël waani, waana jïëy ni ŋääthwa Krictø Jecu, kiper nee wa jïëc ni marwa beer ki køør ŋäädhe ni en ri Krictø, ni paa ki køør tïïe moa en ri ciik Jwøk. Kiper bäŋ dhaanhø mo jïëc ni mare beer ki køør tïïe moa en ri ciik Jwøk.

¹⁷ 'Ba ni näk waani ki dëëtwa, waano cwølø ni waana jø raay kany bëëtwa en ni wa manynya gø nee wa jïëc ni marwa beer ki ri Krictø, a Krictø nø, atïmö ni beeye ŋata käl raay? Ba doo løny!

¹⁸ 'Ba ni näk maa dwøga gïïa kwøŋa kwier karge, a nyootha raa møn, ni aana ŋat wø dhal ciik Jwøk.

¹⁹ 'Ba ki køør ciik Jwøk beeye na thøøa, ni tïma naa ba en tiet ciik Jwøk, kiper naa kwøa jï Jwøk.

²⁰ 'Ba aana gur bäät jaadha no odëëdö ki Krictø na aciel. Ni patha aani ni kwøw en, 'ba beeye Krictø ni bëëdö ni kwøw dëëra en. Ni bëëtö man bëëda ki gø kawaane ki dëël man en, a bëëdö ka ri ŋäädhe na en ri O Jwøk, ŋata mëër ki aani, ni cïp ree kipera.

²¹ Naa ba tïïc met yi Jwøk ni bäŋ tiere. 'Ba ni näk ciik Jwøk beeye wø jïëc dhaanhø ni mare beer ki køøre, nyootha gø ni Krictø athuunh jaak.