Epeca 3 - Wëël Jwøk

Pøøl Awëëk Tïny Juurre Ki Luumma Nyään Na Met

¹ Ni beeye na ööa, a na Pøøl, na tööny Krictø Jecu kiperu, u na juurre.

² Ni yaa caarø ni tïï met yi Jwøk na wëëk aani kiperu you wïnynyö,

³ kaawat mana wëëk aani ŋäc gïna näk tiere okwøŋ kan ki køør mana nyuthi aani, keda mana gööra gø ni ciek en.

⁴ Kiper kanyo kwaannu gïn, nee mana ŋääa kiper gïna näk tiere okwøŋ kan mar Krictø nee ŋäyu,

⁵ gïna näk kär kwøŋ wëëk ŋäc jï jiy yïth beenhnhe moa cääŋŋe, keda mana nyoodhi ennø jï nyïïatwiete na en kur keerge ki nyïïkuk Jwøk ki køør Jwïëc Jwøk.

⁶ Ni beeye ni juurre atïmö na lwiidhi ki jø Jwøk na aciel, ni gena dëël aciel, ni karge dagø ri buuk mana buuk ki ri Krictø Jecu ki køør luumma nyään na met.

⁷ 'Ba aani, aana wëëk tïny luummögø ki køør met yi Jwøk na cïbe jïra, na wëëk a ka køør teege ni wø tïïö.

⁸ 'Ba aani, këël na thiinh kara døc dï jø Jwøk bëët, met ec manøgø awëëk aani, nee gïr kwär mar Krictø na näk bäŋ teeŋe køba jï juurre,

⁹ nee jiy bëët wëëga neen tïï gïna näk tiere okwøŋ Jwøki kan cwïnye cøøn, eni na cwääc jammi bëët,

¹⁰ nee leec wï Jwøk na päl wëëk ŋäc ennø ki køør acooŋ Jwøk jï moa näk ocuumö maalø ki moa jïge da teek maalø.

¹¹ Ni beeye gïna näk ee kwøŋ cooŋ ki cwïnye cøøn kanya poot pinynyi, ni beeye na wëëk thur kare ennø ki ri Krictø Jecu na näk Kwääyø,

¹² eni na mooc cwïnynyø ki cer ki man ŋääø gø ni jïïø da jöö man cøø nyïm Jwøk ki køør mana ŋäädhø eni.

¹³ Kiper manøgønø, a kwaya uuni, kär cwïnynyu wëëgu pädhö ki gïr gïï ni leth ni jwøra kiperu en. Kiper ge kännö ka ajiem jïïu.

Pøøl Lämö Kiper Jø Jwøk Nee Mëëc Krictø Ŋäcge

¹⁴ Kiper manøgønø, cøŋŋa wø këëlla piny nyïm Wuuö,

¹⁵ eni na ö nyeŋ tuŋi bëët moa en maal ki moa en piny na caai ree,

¹⁶ naa lämö nee u wëëk tëënnö ki teek mano ööi ki køør Jwïëye ki yïth cwïnynyu, keda mana päl ajieme,

¹⁷ nee Krictø bëëde cwïnynyu ki køør ŋäädhe, nou cuŋŋu nou teek ri mëër,

¹⁸ nee lønye jïïu ki jø Jwøk bëët na aciel ki man ŋäyu bäc mëëyögø, ki päl yie, ki bäye man ci maal, ki bäye man ci piny,

¹⁹ nee mëëc Krictø putu ŋäc, mëëya näk ba løny ki man ŋääi bäre, nee cwïnynyu pääŋe ki beeny Jwøk bäre.

²⁰ Pwøc en jïre, eni ni wø løny jïre ki man tïïc gïï mo kaala gïï wø pëënynyø wala gïï wø caarø, ki køør teege ni wø tïïö cwïnynyø.

²¹ Ajiem en jïre ki ya acooŋ Jwøk ki ri Krictø Jecu ki yïth beenhnhe bëët këël na bäre bäre. Enøgønø.