Epeca 1 - Wëël Jwøk

Määdhe

¹ Aana Pøøl na nyïïatwiel mar Krictø Jecu ki køør mana many Jwøki. A määtha u na jø Jwøk ni wø ŋääth ki ri Krictø Jecu.

² Met ec bëëde bäätu, ki bëët-mëër man wø ööi ki baŋ Jwøk na näk Wääø ki Kwäärö ma Jecu Krictø.

Dwøk Met Ec Kiper Gwïëth Mar Jwøk

³ Pwøc en ri Jwøk na näk Wää Kwääyø ma Jecu Krictø, ŋata gwïëth øøni dëër Krictø, ki gwëëthe bëët mo Jwïëc Jwøk mo wø en maal,

⁴ kaawat mana ö eni ni jier øøni ni kïth øøni dëër Krictø kanya poot pinynyi ni kär cwääö, kiper nøø tïmø ni ø ena kur keerø na mo Jwøk ni bäŋ ajäla dëëtø nyïme.

⁵ Ni ø ee kwøŋ miek ki mëëye nøø tïmø ni øøna wääte ki køør Jecu Krictø kaawat mana manynye,

⁶ nee met yie na bäŋ teeŋe na cïbe jïïø ki bäth ec dëër Omëëye, nee pwøø.

⁷ Ni beeye ki køøre na wïïl øøni wøk ki køør remme, ni wec moa dhalø ki met yie na dwøŋ

⁸ na wëëk øøni ni päl ki ra acaaya dwøŋ, ki ŋäc tiet jammi.

⁹ 'Ba mana manynye na näk ee kwøŋ kan anyuth øøni, kaawat mana kwøŋ gø cooŋ ki cwïnye ni tïïe ka ri Krictø.

¹⁰ Ni manøgø ee cooŋø ki cwïnye nee tïïe kanyo ö kanya wäŋŋi noo thur kare, kiper nee jammi bëët dwal dëëre, mo maal ki mo piny.

^11-12 Ni beeye ki køøre na ö waani na kwøŋ Krictø ŋääth na miek na jier nee wa bëëtwa ni wa pwøya ajieme, keda mana many ŋat wø tïïc jammi bëët keda man wø näk ee cooŋø ki cwïnye.

¹³ Ni beeye ki køøre na ö uuni thuwø, u na wïny luumma näk adïëri, luumma nyään na met na jootu pïëm ree man piem uuni ki gø, ni jïëyu ni ŋääthu eni, ni mooc uuni ki ŋïï na näk Jwïëc Jwøk na en kur keere, na kwøŋ buuk.

¹⁴ Ni beeye kuri mar olaaw marø këël mano wïïl øøni wøk, ø na näk jiye, ni tïme ni ø pwøya ajieme.

Lam Mar Pøøl Kiper Jø Acooŋ Jwøk

¹⁵ Kiper manøgø nø, na wïnynya gøøni ni Kwäärö ma Jecu you ŋäädhö møn, nou mëër ki jø Jwøk bëët,

¹⁶ pwøc mara man pwøa Jwøk kiperu kära wiiø, naa lääŋŋa uuni ki yïth laam 'moa cooth,

¹⁷ nee Jwøk na näk Jwø Kwääyø ma Jecu Krictø, ni näk Uun ajiem, nee u mooe ki wïdhi mo leer, ki cwïny mou wëëge ka ŋäc eni,

¹⁸ ni jap nyeŋ mo cwïnynyu kiper nou tïmu nou ŋäya ŋäädhe mana en nyïm mana cwøl u kipere, ni ŋäyu dööŋ olaaw mare na näk ree da ajiem mo bäŋ teeŋe ni wø en jï jø Jwøk,

¹⁹ nou ŋäya teege ni wø dööŋŋe ba maar røm ni tïïe dëëtø, ø na näk ojïëy ni ŋäädhø, ki køør tïïc mana tïïe ki teege na dwøŋ døc,

²⁰ na nyoodhe dëër Krictø, kanya tïŋ gø maal ki yi thøø, ni wëëk gø pïïn bäät cwïïe maalø.

²¹ Ni dwøŋŋa eni dï moa näk ocuumö bëët, ki teeŋ teek bëët ki rööny, ni lïëŋŋa nyeŋŋe dï nyeŋ moa näk ocaa bëët, ni patha yi piny man keere, 'ba këël yi piny mano ööi thuwø.

²² Ni cïp jammi bëët cer gø, ni tïïc gø ni ena wïth jammi bëët kiper acooŋ Jwøk,

²³ na näk beeye dëëre, ni beeye ni wø wëëk gø thur kare, ni tïm jammi bëët ni thura karge ki køøre.