Edhikiel 6 - Wëël Jwøk

Luum Ajäla Mano Jääl Jø Icriel Ki Gø Kiper Kït Gïï Wø Lamge

¹ 'Ba dwør Wuuö Jwøk aö bääta ni kööe jïra,

² ni «Wär dhaanhø, løø nyïmï baŋ kïte mo Icriel, ni cäännï geni,

³ ni kööï, ‹Wui, u na kïte mo Icriel, wïnynyu dwør Kwäärö Wuuö Jwøk! Luumma caan Kwäärö Wuuö Jwøki jïïu, u na kïte, ki thuuri, ka agäp-kïte, ki gøli, bee en, ena köö: Ni ka adïëri møn, aani ki dëëra, a ööa baŋu ko opëëllö, ni jääla uuni, ni raanynya kwör lam mou moa en bäät thuuri.

⁴ Kiper manøgønø, gïï wø cïp olämme mou bäätge oränynyi, ni ö gïï wø waaŋ jer wø jïcge ŋwääi ni met bäätge ni tøc geni. Aani, u nääa nääö deŋ kït gïï wø lammu.

⁵ Aani, rïŋ dëëtu moa no othøw, u na jø Icriel, peedha piny deŋ kït gïï wø lammu, ni kera cuu mou piny deŋ gïï wø cïp olämme mou bäätge.

⁶ Päänye moo bëëdu yïthge bëët oränynyi, ni ö kwör lam mou moa en bäät thuuri ni ränyge, kiper nee gïï wø cïp olämme mou bäätge nee ränyge ni tïmge ni bäŋgø; ni ö kït gïï wø lammu ni tøyi ni ränyge na bäre, ni ö gïï wø waaŋ gïï wø jïcge ŋwääi ni met bäätge moa näk mou ni ŋødi piny, ni ö jammi moa tïïyu ni putge tïmö ni bäŋgø.

⁷ Jiy mou othøw ni nigenaaŋ yïthakiyu, ni ö uuni ni putu gø ŋäc ni bee aani na Wuuö Jwøk.

⁸ « ‹'Ba aani, jiy møøk dëëtu owiia ni kwøw, kiper jiy møøk dëëtu geno bøth dho opëëllö, ni keethge dï wïth juurre ki yïth mïëri.

⁹ 'Ba jiy moo bøth, wïthge oparge ki aani kanyo enge yïthakic wïth juurre moa mak geni ki tøŋ. Geni wïthge oparge ki kanya bëëda ni cwïnya ege raanynyø ki køør mana bëëtge ni cwïnyge lääŋŋa käp, na pää geni ki aani, ki køør mana bëëtge ni nyeŋge ege peerø køør käp mana wara tïïcge ki kït gïï wø lamge. 'Ba geno männi ki dëëtge keerge ki køør japa reyø na bacge, ki japa näk yia raac ki ge bëët na tïïcge.

¹⁰ Køøre oŋäcge ni bee aani na Wuuö Jwøk, ni luup moa cara patha oballe jaak kanya kööa ni bäätge kïtha kïthö ki gïn mo leth.›

¹¹ «'Ba man beeye luumma caan Kwäärö Wuuö Jwøki, ena köö, ni ‹Paŋ ceŋŋï ni tietï gøyï gøyø ki piny niï jwöŋö ni «Wui, wui,» kiper japa reyø na raac eci ki ge na tïïc jø dhi øt Icrielli. Geni, geno 'näk ko opëëllö, ki käc, ki täw.

¹² Ŋato en kany mo bäär onäk täwi, ni ö ŋato kare cään ni nääi ko opëëllö, ni ö ŋato dööŋ dï pääny noo ciel dïër ni nägi ya käci. Kanyøgø nø, wëër mara owëëga thöör bäätge.

¹³ Køøre nø, oŋäcge ni bee aani na Wuuö Jwøk kanyo jootge jiy moge no othøw yïthakic kït gïï wø lamge, deŋ gïï wø cïp olämme moge bäätge, ki bäät thuuri moa bäyö, ki wïth kïte bëët, ki tiet jenni moa no onigïït piny, ki tiet jera teek bëët na bäyö, ni beege kwöra wara wääŋge yie ki jer wø jïcge ŋwääi ni met jï kït gïï wø lamge bëët.

¹⁴ Kanyøgø nø, cera orwiea ni jääla geni, ni wëëga ŋöömö marge ränynyö døc, ni dööŋe ni bäŋ gïrpiny yie ni kaala dïtëën mana cwøl ni Dïbila; køøre nø oŋäcge ni bee aani na Wuuö Jwøk.› »