Edhikiel 5 - Wëël Jwøk

¹ «'Ba ennø, ï na wär dhaanhø, lwötï ko opëëllö mo beth ni lielï jïëc tïïï ki jïëc wïïï ki gø kaawat man wø tïïc ŋat nyaar jïër. Køøre nø, jïër wär kïth bäät gïr røm ni pääŋŋï ge na kwöre adäk.

² 'Ba kanyo thum nïne yie mo ciel Jerucalem dïër, dää thäk jïër wär waaŋï dï pääny. Ni lwørï dää thäk møøk ni ŋørï ge ko opëëllö deŋ pääny bäre. Ni ö thäk dääge moa no odööŋ ni kerï ge yi jamø. 'Ba aani, køørge ŋwiea ŋwieø ko opëëllö.

³ 'Ba ïïni, wärï lwötï ki mo nøk røk moøgø ni twöï ge cer abïïnï.

⁴ Ni cäŋï lwötö ki mo nøk rege ni leeŋï ge yi maac ni waaŋï ge. Køøre nø, maac manøgø oput keethø dï Icriel bäre.»

⁵ 'Ba man bee gïna caan Kwäärö Wuuö Jwøki, ena köö, ni «Man bee Jerucalem, na tïïa ni ena dïër yïthakic wïth juurre, ni eno rum mïëri dïër.

⁶ 'Ba ki køør rääö mare, ciik 'moa ki gïïa köömma eni ki ge akwiere, ni kaala wïth juurre ki mïëri moa en deŋŋe. Eni ciik 'moa akwiere, ni käre cäädhö ki køør gïïa köömma eni ki ge.»

⁷ Kiper manøgønø, Kwäärö Wuuö Jwøk aköö, ni «Ï na Jerucalem, ïïna bëëdö niï tïïya okiera niï kaala wïth juurre moa en deŋŋï, ni kwierï gïïa köömma ïïni ki ge, ki ciik 'moa; këël ciik mo wïth juurre moa en deŋŋï ï kär jïëy ki geni.

⁸ «Kiper manøgønø, a na Kwäärö Wuuö Jwøk, luumma caana beeye en: Aani, a ööa maal bäätï, ï na Jerucalem, ni ö ajäla mara ni kïtha gø bäätï ni nëënö jï wïth juurre.

⁹ 'Ba kiper kït gïï wø lamï bëët na näk yia raac ki ge, gïn mo poot kära tïïö cøøn mo ba cäŋa tïïyö këët tïïa tïïö dëërï.

¹⁰ Kiper manøgønø, jøøa nyöödö ko obwöre, obwöre moge ocamge dïërï, ni ö obwöre ni camge jøøa nywøl ge thuwø. Ajäla mo leth okïtha bäätï, ni ö jiyi moï moo dööŋ ni kwøw ni keetha ge yïth tuk piny.»

¹¹ Kiper manøgønø, Kwäärö Wuuö Jwøk aköö, ni «Ka adïëri møn, kaawat man bëëda naa kwøw en, kiper mana päätï øtø mara na en kur keere ki kït gïï wø lamï na reyø døc, ki gïïa näk ec raac ki ge, aani ki dëëra raa paanya paanyø buutï, ni ba nyoodha bäth ec mara jïrï wala ki man wara cwïnya ki ïïni.

¹² Dää thäk jiy moï geno thøw dïërï ki täw mo raac ki käc, ni ö dää thäk jiyï møga ni näk geni ko opëëllö ŋää kiir marï, ni keetha dää thäk jiyï møga yïth tuk piny, ni puta køørge ŋwiec døc ko opëëllö.

¹³ «Køøre wëër mara ni wø liel kaamar maac nijook, ni ö wëërri mara ni døø piny ki geni, ni ö yia ni thume. 'Ba kanyo poot wëërri mara ni ena bäätge, oputge ŋäc ni beeye aani na Wuuö Jwøk na cäänö ki geni ni aano këëyö.

¹⁴ Uuni, u raanynya raanynyø ni putu tïmö ni uuna gïr ajøøŋ yïthakic wïth juurre moa en deŋŋu, ki mo wø pöödhi ki buutu.

¹⁵ 'Ba kanyo jääla uuni ki køør wëër mara ni wø liel kaamar maac, ki juuk mo teek, uuno tïmö na gïr ajøøŋ na gïr ajaany, na gïr ŋwøc, ni tïmu ni uuna gïn böö wïth juurre ki ge moa en deŋŋu. Luummögø caana aani, a na Wuuö Jwøk.

¹⁶ Aani, käc mo dwøŋ døc mo u thøw ki gø jääŋŋa jääŋŋö bäätu ni raany uuni. Käc tïïa tïïö nee puuthe bäätu, ni cuŋ jïëth caammi mou bëët.

¹⁷ Käc ki lääc paap moa reyø ojääŋŋa baŋu, ni putge uuni tïïc ni bäŋ obwöre jïïu. Täw ki køny remø piny ööa bäätu, ni käla thøw opëëllö bäätu. Luummögø caana aani, a na Wuuö Jwøk.»