Edhikiel 47 - Wëël Jwøk

Luum Naam Mana Cööt Ki Tier Øt Jwøk

¹ Køøre nyïïatwiel maal aana cäŋ dwøk dhi Øt Jwøk, ni jïta ki pïï mo kwönna wøk ki tier dhi øtø mar Øt Jwøk, ni kwöta jï løø kur tuul-cäŋ; kiper Øt Jwøk nyïme ena jï løø kur tuul-cäŋ. 'Ba pïï kwönni ka jï løø bäät cwïïc mar Øt Jwøk, ni beeye ki jï løø tier-piny ki gïn wø cïp olämme bääte.

² Køøre eni aana duu wøk ki dhi kal mana en jï løø wï-piny, ni käl aani ki töök kal wøk ki jï løø dhi kal mar wøk mana en jï løø kur tuul-cäŋ, ni puta pïï joot ni kwönnö ki jï løø tier-piny.

³ 'Ba kanya ö ŋatøgø na aa jï løø kur tuul-cäŋ ni käära thøør røm ki cere, ena rummö ki gööye ma kuma bäät ageel naamøgø; køøre aana wëëk ŋøl naam kany mo päŋ mare ena käät-oguudi.

⁴ Køøre ena cäŋ rummö ki gööye møøk ma kuma bäät ageel naamøgø, ni cäŋ aani wëëk ŋutö ki kany mo päŋ mare ena wï-cuŋ. Køøre ena cäŋ rummö ki gööye møøk ma kuma, ni cäŋ aani wëëk ŋutö ki kany mo päŋ mare ena pier.

⁵ Køøre ena cäŋ rummö ki gööye møøk ma kuma, 'ba kaace atïmö ni ba løny ki ŋøl jïra; kiper naam päŋ døc ni rømi ka kwaaŋ keere, ni bäŋ dhaanhø mo løny jïre ki man ŋøl gø ki piny.

⁶ Køøre eni aana pëënynye ni kööe, ni «?Wär dhaanhø, gïn nëënö jïrï?» Køøre eni aana cäŋ dwøk bäät ageela.

⁷ 'Ba kanya pïïa kaace, aana jïtö ki jenni mo thööth døc bäät ageela løøi ki løøi.

⁸ Køøre ena köö jïra, ni «Naam man kwöta jï løø kur tuul-cäŋ ni kwöta yi goor Naam Jördan ni wø cwøl na Araaba, këël mano päth yi Naam Acäbö. 'Ba kanyo päth yi Naam Acäbö kunece, pï Naam Acäbö døøa karge ni met.

⁹ 'Ba naam man kanyo kwöt yie, gïïa näk rege da jwïëy ge bëëdö ni ge kwøw, ni ö Naam Acäbö ni jïte ki rec mo thööth, kiper naam man kwöta yie, ni tïïc pï acäbö ni met. Kiper manøgønø, naam man kany wø kwöt yie jaak, jammi bëët ge bëëdö ni kwøw.

¹⁰ Dïbïth rec geno cuŋŋi bäät ageel Naam Acäbö man; ki mano täge Ayn-Gadi këël Ayn-Eglam otïmö ni da kwör ma ajääpi di mää yïthge. Otïmö ni da teeŋ rec mo thööth mo di joodø yie kaawat mo wø joot yi naama dwøŋ.

¹¹ 'Ba kwöra thec, ki pulli, tïmö ni ba døø karge ni met, kiper ge bëëdö na kany joot acäbö yïthge.

¹² 'Ba wïth jenni ma teeŋi mo kännö ki nyïëdi geno tuy bäät ageel naamøgø løøi ki løøi. 'Ba bøøge moge obëëdö ni ba tal, ni bäŋe kany mo ge kääŋö yie ki man ŋweelge ki nyïëdi. Geno bëëdö ni ge ŋweel ki nyïëdi ki yïth dwäde cooth kiper pïï mo wø kwöt baŋge ki tier Øt Lam mana en kur keere. Nyïëdi moge okunynyi kiper cam, ni ö bøøge moge ni kunyge kiper køny täwe.»

Luum Nyeŋ Keee Mo Ŋøøm Moo Pääŋŋi

¹³ 'Ba man beeye luumma caan Kwäärö Wuuö Jwøki, ena köö, ni «Moi beege nyeŋ keee mo ŋöömö mano pääŋŋu yïthakiyu, ni bee u wïth tuŋi mo Icriel moa näk apaar kurriiø; 'ba tuuŋ Jocep wär mooyu ki thäk ŋøøm ariiø.

¹⁴ 'Ba ŋøøm wäru pääŋŋu ni dïët jïge bëët. Kiper aano nø kööŋ ki man cïba ŋöömö manøgø jï kwäyu. Ŋöömö manøgø dööŋ jïïu na maru.

¹⁵ «'Ba waŋ keew mar ŋöömö manøgø bee en: Ki jï løø wï-piny, tägö ki bäät naama dwøŋ ni døøe ki waŋjöör Ëthlön, ni cør Lïbö-Amath, ni pööth Cidat,

¹⁶ ki Bërötha, ki Cibiram, ni beeye waŋ keew mana en yïthakic Damacka ka Amath, ni put pööth Adher-Atikön na en waŋ keew mar Awran.

¹⁷ 'Ba keew manøgø täga bäät naama dwøŋ këël mano këët Adhar-Enan, ni rwöbe ka thääŋ Damacka kuna en jï løø wï-piny ki thääŋ Amath kuna en jï løø wï-piny. Manøgø beeye keew mare ki jï løø wï-piny.

¹⁸ «'Ba waŋ keew mar ŋöömö manøgø ki jï løø kur tuul-cäŋ cøra yïthakic Awran ki Damacka, ni put døø ki yi naam Jördan yïthakic Gelät ki ŋööm Icriel, këël mano këët bäät Naam Acäbö, ni pïïe Tamar. Manøgø beeye keew mare ki jï løø kur tuul-cäŋ.

¹⁹ «'Ba keew mar ŋöömö manøgø ki jï løø tier-piny täga Tamar këël mano pïïe yïth näm mo Meriba-Kadëc, ni cøra waŋ naam Ijep këël naama dwøŋ. Manøgø beeye keew mare ki jï løø tier-piny.

²⁰ «'Ba keew mar ŋöömö manøgø ki jï løø kur pänh-cäŋ beeye bäät naama dwøŋ, ni tägi ka paaba en jï løø tier-piny këël mano pïïe jï løø wï-piny kany mo raŋŋa rege ki Libö-Amath. Manøgø beeye keew mare mana en jï løø kur pänh-cäŋ.

²¹ «Ŋöömö manøgø wär pääŋŋu yïthakiyu ki køør wïth tuŋi mou, u na jø Icriel.

²² Wär pääŋŋu yïthakiyu ki køør ŋïïce mo wø tïïc na nyuuthe, ni bee u bëët ki jøøa path moa en dïïu na näk jïge da obwöre. Wäru cädu kiper jøøa path ni raŋŋu ge kaamar jiy mo nywøla jø Icrielli. Ge wär jïtge ki kurge ri ŋöömö manøgø yïthakic tuŋi mo jø Icriel.

²³ Ŋata path man nø doo jïtö ki kure ri ŋöömö manøgø yïthakic tuuŋ mana en yie dï jø Icriel.» Luummögø caana Kwäärö Wuuö Jwøki.