Edhikiel 46 - Wëël Jwøk

Jöö Man Wø Ö Dïbwödhi Noo Cïp Olämme Ki Gø

¹ «'Ba man beeye luumma caan Kwäärö Wuuö Jwøki, ena köö, ni ‹Dhi kal mana en dïër na en jï løø kur tuul-cäŋ wär cïëgi ki yïth nïr tïïc moa na abïciel. 'Ba kanyo wäro tïme na cäŋ jwömö ki kanyo wäro päär dwääyi wär jap.

² 'Ba dïbwödhi wär dunynye ki yi-øtø mana en nyïm mar øt-dhi-kal, ni cuŋŋe røk were moa en dï øtø. Ni ö olämme moe mo wø waaŋ bäre ko olämme moe mo wø duunni ki mëër ni cïpi ya dïlämme. Eni Jwøk wär wøøre dhi øtø kaace, køøre nø, eno døny wøk; 'ba dhi kal wär bëëde ni ba dëët këël abøøya.

³ 'Ba kany wø tïme na yïth cääŋŋe mo jwöm ki kany wø päär dwääyi, jø paac wär öge dhi øtø manøgø thuwø kuna wøørge Wuuö Jwøk.

⁴ « ‹'Ba olämme mo wø waaŋ bäre ni wø käl dïbwödhi jï Wuuö Jwøk ki yïth cääŋŋe mo jwöm, wär tïmge na nyïïdïëk abïciel ki nywø røømmø aciel, ni beege lääy mo bäŋ gïn jøøŋŋi dëëtge.

⁵ 'Ba beel moo cïbe na aciel ki nywø røømmø, wär tïme na rumi aciel mo røm ka rumi man wø cwøl ni iipa; 'ba beel moo cïbe na aciel ki nyïïdïëk, wär cïbe ni moa näk løny jïre, ni cïbe na aciel ki maaw ma rumi aciel mo røm ka rumi man wø cwøl ni in kiper iipa man nø mar beel.

⁶ « ‹'Ba kanyo wäro päär dwääyi cooth, eni wär cïpe ki rwaath aciel, ki nyïïdïëk abïciel, ki nywø røømmø aciel, ni beege lääy mo bäŋ gïn jøøŋŋi dëëtge.

⁷ Eni wär cïpe ki muuce mo beel ma yi iipa aciel ki rwaath aciel, ni cïpe ki beel ma yi iipa aciel ki nywø røømmø aciel, ni cïpe ki nyïïdïëk ki beel moa näk løny jïre, ni cïbe na aciel ki maaw ma yi in aciel kiper iipa man nø mar beel.

⁸ 'Ba kany wø ö dïbwödhi wø dunynye, eni wär dunynye ki dhøk mar yi-øtø mana en nyïm ni døø wøk ki yi gø thuwø.

⁹ « ‹'Ba kany wø ö jø paaci nyïm Wuuö Jwøk kuna wøørge gø ki yïth nïr ajwöm moa no ocaanø, jiy bëët mo wø dunynyi ki dhøk mana en jï løø wï-piny, wär dønyge wøk ki dhøk mana en jï løø tier-piny; 'ba jiy mo wø dunynyi ki dhøk mana en jï løø tier-piny wär dønyge wøk ki dhøk mana en jï løø wï-piny. Kär dee dhaanhø mo løk ŋääe nee døø wøk ki dhøk mana dunynye ki yie. 'Ba ŋati man nø wär døny wøk ki dhøk mana dïët ki nyïme.

¹⁰ 'Ba dïbwödhi wär bëëde dï jiy ni cäädhi ka geni, kany wø duny jiyi yi øtø ki kany wø døny jiyi wøk.

¹¹ « ‹'Ba kanyo wäro tïme na yïth cääŋŋe mo jwöm ki yïth nïr wödö moa no ocaanø, muuce mo beel moo cïp wär näk rumi aciel mar iipa mo cïp ka rwaath na aciel, ki beel mo iipa aciel mo cïp na aciel ka nywø røømmø, ni ö mo wø cïp na aciel ki nyïïdïëk ni cïbi ki køør moa näk løny jï ŋatøca, ni cïp na aciel ki maaw ma yi in aciel kiper iipa man nø mar beel.

¹² « ‹Kany wø näk dïbwödhi cïpö ko olämme ki met ec jï Wuuö Jwøk, ni bee olämi man wø waaŋ bäre wala olämme mo wø duunni ki mëër, dhi kal mana en jï løø kur tuul-cäŋ wär jap jïre. Eni olämi mare man wø waaŋ bäre wala olämme moe mo wø duunni ki mëër wär cïbe kaawat man wø tïïe ki yïth cääŋŋe mo jwöm, køøre eni wär døny wøk. 'Ba kanyo nø døny wøk, dhi kal wär cïëgi.

¹³ « ‹'Ba ki yi cäŋ cooth, wäru cïpu ki nyidiel mo cwiine aciel mo bäŋ gïn jøøŋŋi dëëre, ni cïp no olämi man wø waaŋ bäre jï Wuuö Jwøk; ni cïpu ka amöölla cooth.

¹⁴ Ka amöölla cooth thuwø, wäru cïpu ki muuce mo beel ma bïcier rumi mar iipa, ni cïpu na aciel ki dää rumi mar maaw mano en yi gïr røm man wø cwøl ni in; ni maaw manøgø beeye man jääp ki møø. Manøgø beeye ciik mo bëëdö na bäre bäre na man cïp muuce mo beel ki gø jï Wuuö Jwøk.

¹⁵ Ni manøgø beeye jöö man wø cïpge nyidiel ki gø, ki muuce mo beel ki maaw, ni cïp ka amöölla cooth kiper olämme mo wø waaŋ bäre.›

Jöö Man Cïp Ŋøøm Ki Gø Jï Ŋat Mør

¹⁶ «'Ba man beeye luumma caan Kwäärö Wuuö Jwøki, ena köö, ‹Ni näk dïbwödhi thäk ŋøøm moe cïbe cïbö jï wääde aciel røk wääte, ŋøøm moøgø tïmö na mo nyïïkwaaye; dööŋ jïge na thööŋge.

¹⁷ 'Ba ni näk mo thäk ŋøøm moe cïbe na muuy jï ŋat tïïc aciel mare røk jø tïïc moe, ŋat tïïc manøgø ŋøøm moøgø wär bëëde jïre këël kanyo tïme na cwiir mar dwøk jammi; køøre nø, døøa jï kwääye. Eni na dïbwödhi, ŋøøm moe dööŋŋa jï wääte keerge; dööŋ jïge na moge.

¹⁸ 'Ba dïbwödhi kär dee ŋøøm mo käle kälö baŋ jiy, ni ba rïëm jiy wøk yïth ŋøøm moge. 'Ba beeye ŋøøpe keere noo cïbe jï wääte, nee jiya bëëtge ni bäŋ ŋat mo käl ŋøøm moge wøk ceŋge.› »

Luum Këënne Moa No Otïïö Øt Jwøk

¹⁹ Køøre ŋatøgø aana käle ki dhi øtø mana en deŋ dhi kal ni wëëk aani døny yïth-øtø moa en kur keerge na en jï løø wï-piny, ni beeye yïth-øtø mo dïlämme; ni nyooth kany mør jïra mo ena ya aŋuun øtø ki jï løø kur pänh-cäŋ.

²⁰ Køøre ena köö jïra, ni «Kany beeye kany wø ö dïlämme wø thaalge rïŋ olämme yie, ni beege olämme mo wø wëën bääyö ki ge ki mo wø wëën raay ki ge, ni beeye kany thaalge muuce mo beel yie, ni ge mäna gø ki man kïthi yi kal mana en wøk, nee bëët waany marge na en kur keere nee ba pööth dëët jiy.»

²¹ Køøre eni aana kïth yi kal mana en wøk, ni kïth aani yïth gøøde moa na aŋween. 'Ba yïth gøøde moø na aŋween yøø, aana jïtö yi gøøt man nø ka agur.

²² Na agure moøgø ni en yïth gøøde moø na aŋween yøø, bär mar man nø bee gööye ma pïëraŋween, ni ö dööŋ yie ni näk gööye ma pïëradäk. 'Ba agure moø ni en yïth gøøde mo kal manøgø enø, yïthge dïët.

²³ 'Ba yïth agure moø na aŋween yøø ki deŋge bëët da këënne mo ocaamø ki kïte.

²⁴ Køøre ena köö jïra, ni «Moi beege kwör thaal mo jø wø tïïö øt Jwøk, ni beege kwör wø thaalge olämme yïthge mo wø cïp jiyi.»