Edhikiel 45 - Wëël Jwøk

Luum Jöö Mano Pääŋ Ŋöömö Ki Gø

¹ « ‹'Ba kanyo pääŋŋu ŋöömö ki køør ŋïïce mo wø tïïc na nyuuthe, løøk mør wär cïpu jï Wuuö Jwøk na kany mo ena kur keere, mo bär mare beeye gööye ma kume ma pïërariiø kurbïïc, ni dööŋ yie beeye gööye ma kume ma pïërariiø, ni ö yie bäre ni tïï nee bëëde ni ena kur keere na mar Wuuö Jwøk.

² 'Ba ki yïth ŋøøpøgø, thääŋö mør mo bär mare gööye ma dïpe abïïc, ni dööŋ yie gööye ma dïpe abïïc thuwø, wär tïïyu ni kanya en kur keere na mar Wuuö Jwøk, ni ö deŋŋe kany mo jïtö ki gööye ma pïërabïïc ni wii ni ŋaam.

³ 'Ba røk ŋøøpa en kur keere wäru cäŋu rummö ki kany mo bär mare jïtö ki gööye ma kume ma pïërariiø kurbïïc ni dööŋ yie gööye ma kume apaar. 'Ba kaagø øt lam na en kur keere na pere leth otïmö ni ena yie.

⁴ Ni ö ŋöömö manøgø ni tïme na kany mo ena kur keere kiper dïlämme, ni bee jø wø tïïö øt lam mana en kur keere ni wø nyänh kany mo cään ki man tïnyge Wuuö Jwøk. Kaagø otïmö na kar uudi moge, ni bëëde no ocïp kur keere kiper øt lam mana en kur keere.

⁵ 'Ba ŋöömö mo bär mare jïtö ki gööye ma kume ma pïërariiø kurbïïc ni dööŋ yie gööye ma kume apaar, wär cïp jï jø tuuŋ Libay, ni beege jø wø tïïö yi øt Wuuö Jwøk, ni cïp na kurge man gëëtge yie ki uudi.

⁶ « ‹'Ba uuni, wäru cïpu ki kany mo orømø ki man tïme na pääny, mo dööŋ yie gööye ma kume abïïc ni bär mare gööye ma pïërariiø kurbïïc, mo kïïö ki thääŋ ŋöömma en kur keere; ni tïme na mar dhi øt Icriel bäre.

⁷ « ‹'Ba dïbwödhi, ŋøøm moa en buut nyeŋ keee løøi ki løøi na en deŋ ŋöömma en kur keere këël kanyo tïïc na pääny, otïmö na moe, ni beeye ki mano täge ki jï løø kur pänh-cäŋ ki pääny, këël mano këët bäät naama dwøŋ; ni cäŋ tägö ki jï løø kur tuul-cäŋ mar pääny, ni put këët keew mana en jï løø kur tuul-cäŋ. 'Ba waŋ keew mana en jï løø kur pänh-cäŋ ki waŋ keew mana en jï løø kur tuul-cäŋ dïët ki nyeŋ keee mo ŋöömö moo cïp jï wï tuuŋ man nø.

⁸ Ŋøøm moøgø otïmö na kur dïbwödhi yi Icriel. 'Ba dïbwöthe 'moa, jiya ba thielge piny këët; 'ba ŋøøm ocïpge jï dhi øt Icriel ki køør wïth tuŋi moge.

⁹ « ‹'Ba man bee luumma caan Kwäärö Wuuö Jwøki, ena köö: Wui, u na dïbwöthe mo Icriel, yïthu thumge nø ni weyu japa reyø ni wø tïïyu, ki thiel jiya piny, ni tïmu nou tïïya ŋøl ma kare, ki tïïc gïn ma adïëri, ni weyu jiya ki man riemu ge wøk ki yïth ŋøøm moge. Luummögø caana aani, a na Kwäärö Wuuö Jwøk.

¹⁰ Tïïu ki rumme ma kare, ni bee rumi maru man wø cwøl ni iipa, ki rumi man wø cwøl ni baath.

¹¹ 'Ba iipa ki baath yïthge wär tïïc ni röömi. Baath yïthe apaar bee kömer, ni iipa yïthe apaar bee kömer; 'ba kömer wär tïme ni bee rumi marge bëët.

¹² 'Ba rumi mana cwøl ni cekel, yie bee yïth rumme ma pïërariiø mar rumi man wø cwøl ni gëëra. Yïth rumme ma pïërariiø mar cekel, ki yïth rumme ma pïërariiø kurbïïc mar cekel, ki yïth rumme apaar kurbïïc mar cekel, noo dwali bëët, tïmö ni bee yi rumi aciel mar miina.

Luum Muuce Moo Cïp Jï Dïbwödhi Kiper Ajwöm Moo Wøør

¹³ « ‹'Ba man beeye ajwäk mana dou cïbö: Ki røk beek wø cwøl ni cïndë ki gäbci, wäru cïpu ki yi rumi aciel ki røk yïth rumme ma pïërabïciel moi nø, ni bee rumi man wø cwøl ni kömer.

¹⁴ Maaw man wø cïpu bee rumi aciel ki røk yïth rumme mar dïpa man nø, ni bee rumi man wø cwøl ni köör, ni poot na kömer.

¹⁵ Ni lwötu ki diel aciel ki røk dïpe ariiø moi nø ki yïth kwör kwaath mo Icriel. Ni gïïögø tïïc kaper muuce mo beel, ko olämme mo wø waaŋ bäre, ko olämme mo wø duunni ki mëër, nee tïïc no okïdi kiper jiy. Luummögø caana aani, a na Kwäärö Wuuö Jwøk.

¹⁶ 'Ba jiy bëët mo wø bëëdö yi ŋööm Icriel, ŋati man nø eno cïpi ki muuce moøgø jï dïbwödhi mar Icriel.

¹⁷ Ni tïïc mano tïïc dïbwödhi mar Icriel kar ajwöma bee ki man pääŋ olämme mo wø waaŋ bäre, ki muuce mo beel, ki muuce mo kwøk nyïïomøki, ni bee kanyo päär dwääyi yie, ki yïth nïr jwöm, ki yïth nïr ajwöm moa no ocïp piny bëët ni wø wøør jø dhi øt Icriel. Eni olämme moo cïp opääŋŋe, ni bee olämme kiper wëën raay, ki muuce mo beel, ko olämme mo wø waaŋ bäre, ko olämme mo wø duunni ki mëër, nee ge tïïc no okïdi kiper dhi øt Icriel.›

¹⁸ «'Ba man beeye luumma caan Kwäärö Wuuö Jwøki, ena köö, ‹Noo tïme na dwääy mana dïkwøŋ yi cäŋ mana dïkwøŋ kiree, wärï lwötï ki rwaath mo bäŋ gïn jøøŋŋi dëëre, ni tïïyï kanya en kur keere ni waany ki gø.

¹⁹ 'Ba dïlämi wär lwöte ki rem rwaadhøgø, na näk olämi mar wëën raay, ni naaŋ gø deŋ dhi øt Jwøk, ki røk gøøde moa näk aŋween na en jï kuna da maal mar gïn wø cïp olämme bääte, ki ri deŋ dhi kal man wø døny yi kal mana en dïër ki gø.

²⁰ Ni cäŋï teeŋ gïnögø tïïyö thuwø ri bïriet nïne mo dwäänögø kiper jøøa tïïö ki raay mo ba kamge wala mo kucge, niï tïïya gø no okïdi kiper øt Jwøk.

²¹ « ‹'Ba kany wø tïm nïr dwääy mana dïkwøŋ na apaar kurŋween, cäŋ Cäŋa Pööth Thøøe Yie wär wøørru ki nïne abïriiø. 'Ba ki yïth nïrögø wäru cämu ki møø mo ree bäŋ thømmø.

²² Dïcäŋ manøgø kiree, dïbwödhi wär cïpe ki rwaath no olämi mar wëën raay kiper dëëre ki jiy bëët moa en yi ŋööm paac.

²³ Ki yïth nïrögø na abïriiø yøø mo ajwöma manøgø, ki yi cäŋ cooth, eni wär cïpe ki rwädhe abïriiø ki nyöök rööm abïriiø no olämme mo wø waaŋ bäre jï Wuuö Jwøk, ni cïpe thuwø ki nywø ateea no olämi mar wëën raay.

²⁴ Eni wär cïpe ki muuce mo beel ma yi rumi man wø cwøl ni iipa kiper rwaath man nø ki nywø røømmø man nø, ki maaw mo røm ka rumi man wø cwøl ni in kiper rumi man nø mar iipa.

²⁵ « ‹'Ba kiper ajwöma man wø tïïc ki nïne abïriiø ri bïriet dwäde ni nïr dwääy apaar kurbïïc, wär eni cïpe ko olämme kiper wëën raay, ko olämme mo wø waaŋ bäre, ki muuce mo beel ki mo mädhi.›