Edhikiel 43 - Wëël Jwøk

Kanya Duu Ajiem Wuuö Jwøki Bäät Øt Jwøk

¹ Køøre ŋatøgø aana kïth dhi kal mana en jï løø kur tuul-cäŋ,

² ni puta ajiem Jwø Icriel neen ni öö ki jï løø kur tuul-cäŋ. 'Ba dwøl mare lwör kaamar pïï mo thööth, ni wëëk piny rieny ka ajiem mare.

³ 'Ba gïnögø kanya nyoodhi jïra ki yi wïïa, atïmö ni caala mana nyooth jïra na neena kanya ö eni na Wuuö Jwøk na ö kuna raany pääny Jerucalem, ki mana nyooth jïra thuwø na neena kanya ena bäät Naam Kebar. 'Ba dëëra aputa leeŋ piny ni pädha ki bäp yia.

⁴ Kanyøgø ajiem Wuuö Jwøk aduny yi Øt Jwøk ki dhøk mana en jï løø kur tuul-cäŋ.

⁵ Køøre Jwïëc Wuuö Jwøk aana tïŋ maal ni kïth aani yi kal mana en dïër, ni ö ajiem Wuuö Jwøki ni pääŋ Øt Jwøk.

⁶ 'Ba kanya bëëde ni ŋatøgø cuŋŋö buuta, dwøl awïnynya ni cäänna aani ki yi Øt Jwøk,

⁷ ni kööe, «Wär dhaanhø, man beeye kar wälu mara, ni beeye kany këëlla tieta yie. Kany beeye kany bëëda yie dï jø Icriel na bäre bäre. 'Ba jø dhi øt Icriel, ki nyeye moge, nyeŋŋa na en kur keere ba päätge kany këët ki käp marge ki man wø wøørge dëët kït nyeye moge moa no othøw.

⁸ Kanya wara tïïcge dhøk uudi moge ni ena buut dhi øtø mara, ni tïïcge agööle moge ni ena buut agööla mara, naa pää kalli keere na en yïthakicwa ki geni, nyeŋŋa na en kur keere wø putge ka päät ki jap wø tïïcge na raac yia ki geni. Kiper manøgønø, gena raanynya ki køør gootø mara.

⁹ 'Ba ennø, bëët käp marge, ki man wø wøørge dëët kït nyeye moge moa no othøw, beerra man daakge ge nyïma; køøre nø, aano bëëdö dïge na bäre bäre.

¹⁰ «'Ba kiperï nø, ï na wär dhaanhø, caan luum Øt Jwøk jï jø Icriel nee wïthge lääge ki raay moge. Beerra man cätge kiper gïna no ocïp piny kiper Øt Jwøk.

¹¹ 'Ba ni näk mo wïthge lää ni caarge wïthge ki japa reyø na tïïcge bëët, yi jöö mana geer Øt Jwøk ki gø wär caanï jïge nee ŋäcge; ni beeye yi øt jöö mare mana jiiŋŋi ki gø, ki yi jöö mana tïïc dhøgi moe ki gø, ki yi jöö bäre mana geeri ki gø, ki yi jöör bëëtö mare bäre ki ciik moe. Luup moøgø bëët wär göör piny nyïmge, nee yi jöö mana geer Øt Jwøk ki gø nee ŋäcge ni cääthge ki køør ciik moe.

¹² Man beeye ciik kiper Øt Jwøk: Ŋøøm moa en deŋ øtø bäre bäät kïdi, wär bëëde ni beeye kanya en kur keere døc na pere leth. Manøgø beeye ciik kiper Øt Jwøk.

Luum Gïn Wø Cïp Olämme Bääte

¹³ «'Ba rumme mo gïn wø cïp olämme bääte na näk røm ka gööye mo cenø, mo bääte omëënnö ki kany ma kar lweedi aŋween, beege ii: Bär mar aŋaak mare bee gööyö aciel, ni ö dööŋ yie ni näk gööyö aciel thuwø, ni ö odhïŋ deŋŋe ni näk rumi aciel mar yïthakic lweedi. 'Ba rumme mo bëët bär mare beege ii:

¹⁴ Ki mano täge ki ya aŋaak yïth ŋøøm këël yie mana en jï piny, bär mare bee gööye ariiø, ni ö dööŋ yie ni näk gööyö aciel; 'ba ki mano täge ki yie mana en dïër këël yie mana en maal, bär mar gääŋe bee gööye aŋween, ni ö dööŋ yie ni näk gööyö aciel.

¹⁵ 'Ba kar maac mar gïn wø cïp olämme bääte manøgø, bär mar gääŋe bee gööye aŋween, no otïïö ni deŋŋi moe aŋween, ni wïth deŋŋi moe moø na aŋween yøø, da gïï ma aŋween mo cuŋŋö bäätge mo caala tuŋi.

¹⁶ 'Ba kar maac manøgø bär mare mar dïëre bee gööye apaar kurriiø, ni ö dööŋ yie ni näk gööye apaar kurriiø thuwø.

¹⁷ 'Ba yie mana en bääte maal, deŋŋi moe otïïö na aŋween thuwø, ni bär mare bee gööye apaar kurŋween, ni ö dööŋ yie ni näk gööye apaar kurŋween thuwø. 'Ba odhïŋ deŋŋi moe bee thääŋ gööyö, ni ö dööŋ ec mar aŋaak mana en tiere ni näk gööyö aciel. 'Ba kwöra no othørø na kwör tiel man eth bäät gïn wø cïp olämme bääte manøgø ki gø, ena jï løø kur tuul-cäŋ.»

Jöö Mano Tïïc Gïn Wø Cïp Olämme Bääte Ni Waany Ki Gø

¹⁸ Køøre ena cäŋ köö jïra, «Wär dhaanhø, a na Kwäärö Wuuö Jwøk, luum caana jïrï en kiper ciik mo olämme mo wø waaŋ bäre, ki rem mo wø ker bäät gïn wø cïp olämme bääte kanyo geeri, beege ii:

¹⁹ Ï cïpö ki rwaath jï dïlämme no olämi mar wëën raay, ni beege jï jø tuuŋ Libay na käl dhi øt Dhadök, ni beege jø wø ö nyïm kany mo cään kuna tïnyge aani, a na Kwäärö Wuuö Jwøk.

²⁰ 'Ba ïïni, wär lwötï ki rem rwaath ni gweelï gø bäät gïïa na aŋween na caal tuŋi na en bäät gïn wø cïp olämme bääte, ni gweellï gø ki deŋŋe bäre, niï tïïya gø ni waany, niï tïïya gø no okïdi.

²¹ 'Ba rwaath manøgø thuwø na näk olämi mar wëën raay diï kälö ni waaŋï gø kanya no ojierø na mar Øt Jwøk na näk kare bäär ki kanya en kur keere.

²² «'Ba noo tïme na riet nïne, wärï cïpï ki nywø ateea mo bäŋ gïn jøøŋŋi dëëre ki man cïbi no olämi mar wëën raay, nee gïn wø cïp olämme bääte tïme ni waany, kaawat mana tïï ni waany ki ri rem rwaath.

²³ 'Ba kanyo nø tïme ni waany nø, ï cïpö ki rwaath ki nywø røømmø mo bäŋ gïn jøøŋŋi dëëtge.

²⁴ Lääy moøgø cïbï nyïm Wuuö Jwøk, ni ö dïlämme ni kerge acäbö bäätge, ni cïpge ge jï Wuuö Jwøk no olämme mo wø waaŋ bäre.

²⁵ «'Ba ki yïth nïne abïriiø cooth, wärï cïpï ki nywø ateea na mar wëën raay, ni cïpï thuwø ki rwaath ki nywø røømmø mo bäŋ gïn jøøŋŋi dëëtge.

²⁶ 'Ba ki yïth nïne abïriiø moøgø, gïn wø cïp olämme bääte tïïcge tïïö ni waany ko okïdi manøgø, nee bëëde ni tøŋ; ni beeye jöö man cïpge gø kur keere jï Jwøk.

²⁷ 'Ba kanyo tïme na aŋuun nïne moøgø, ni caka bäc nïne, olämme mou mo wø waaŋ bäre, ko olämme mo wø duunni ki mëër, wär cïp dïlämme bäät gïn wø cïp olämme bääte. Køøre nø, u jïëa jïëö. Luummögø caana aani, a na Wuuö Jwøk.»