Edhikiel 4 - Wëël Jwøk

Nyuudhi Mana Tïïc Edhikielli Kiper Mano Ciel Jerucalem Dïër

¹ «'Ba ennø, ï na wär dhaanhø, määnyï ka athaa ni cïbï gø buutï ni göörï kït pääny Jerucalem bääte.

² Ni määnynyï deŋŋe ki kwör leny mo tuk eni ki yie, ni thørï deŋŋe ki ŋøøm mo eth bäät kiir ki gø, ni määnynyï deŋŋe ki twëëre mo jø leny mo këëdi ki gø, ni ŋudï ki jenni mo thiel kiir ki ge nee pädhe.

³ Køøre wär määnyï ki nywïënyö mo caala dööga ni cïbï gø yïthakiyu ki pääny kaamar kiir mar nywïënyö, ni løøï nyïmï baŋe, ni cielï pääny dïër, nee put bëëte no ocielø. 'Ba manøgø otïmö ni beeye nyuudhi kiper jø dhi øt Icriel.

⁴ «'Ba ïïni, wärï but bäät caamï, ni ö raayi mo jø dhi øt Icriel ni kïthï ge bäätï. 'Ba raay moge okäärï ki yïth nïne bëët ki mano täge ki kanya butï piny bäät caamï.

⁵ Aani, bäätï kwäänna kwäännö ki nïne mo caala kwään cwiiri mo raay moge. Ïïno bëëdö ki nïne ma dïpe adäk ki pïërabïŋween niï käära raay mo jø dhi øt Icriel.

⁶ «'Ba noo thöörï nïne moøgø, wärï cäŋ butö niï buta bäät cwïïï, ni kïthï raay mo jø dhi øt Juuda bäätï. 'Ba aani, bäätï kwäänna kwäännö ki nïne ma pïëraŋween, ni dïcäŋ aciel man nø beeye kar cwiir aciel mo raay moge.

⁷ Køøre nyïmï oløøï baŋ Jerucalem na näk ociel dïër, ni køpï luum ajäla mare jïre ni cäännï gø ni iï nyoodhø ki lweetï.

⁸ 'Ba aani ï tuua tuuö ki thøøli ni tïme ni ba løny jïrï ki man løgï riï këël kanyo thum nïne yie moo cielï Jerucalem dïër.

⁹ «'Ba ïïni, kädï ki cïndë, ki gäbci, ki ŋööri, ki beel, ka aja, ni kanï ge yi dak, ni tïïyï ge na cam kiperï yïth nïne moo beetï ni ïïno but bäät caamï, ni beege nïne ma dïpe adäk ki pïërabïŋween.

¹⁰ 'Ba cam mano camï otïmö ni beeye ya athöödhi aciel ki yi cäŋ, ni camï ka yïth caae.

¹¹ 'Ba pïï moo maathï ki yi cäŋ, otïmö ni røm ka yi cuŋguth, ni maathï ka yïth caae.

¹² 'Ba cam manøgø ocamï kaawat man wø cam acøøpa mar gäbci, ni thaalï ni nëënö jï jiy, ni thaalï ka maa cieth jiy mo otal.»

¹³ Ni kö Wuuö Jwøki, ni «Kaawat manøgøøni, jø Icriel ge cämö ki cam mo ba waany kanyo riema ge yie yïthakic wïth juurre.»

¹⁴ Køøre aana köö, «Wui Kwäärö Wuuö Jwøk, aani, dëëra poot kära tïïö ni ba waany na bäre bäre. Kiper ki mana käla thïnhö këël ennø, a poot kär cämö ki gïn mo thøwa eni keere en wala baga lääyi mør. Poot bäŋ rïŋö mo ba waany mo onø ci dhaa en.»

¹⁵ Køøre ena köö jïra, «Wøp nø, ï tïïa tïïö nee tïme ni møø thaalï ka maac mar wär mo dhäk ni patha maac mar cieth mo jiy.»

¹⁶ Køøre ena cäŋ köö jïra, ni «Wär dhaanhø, aani, cam man wø ö yi Jerucalem ŋøla ŋølø. Jø Jerucalem geno tïmö ni ge cama cam mo di rømø ni ge bëëdö ni geno lwäyö, ni tïmge ni ge maatha pïï mo di rømø ni ge bëëdö ni nyeŋge okwätö,

¹⁷ kiper mano tïme ni bäŋ cam ki pïï mo ge rømø ki gø. 'Ba ŋati man nø obëëdö ni raŋŋa jï wati no olwäyö, ni putge dwaalø yïth raay moge.