Edhikiel 39 - Wëël Jwøk

Luum 'Näk Mano 'Näk Göök Ki Gø

¹ «Wär dhaanhø, caan luum ajäla man dëër Göök, ni kööï ni man beeye luumma caan Kwäärö Wuuö Jwøki, ena köö, ‹Wui, Göök, ï na kwäärö mana dwøŋ mar jø Möcak ki Tubal, ïïna jääla.

² Ïïno dwøga køørï ni tuuda ïïni. Ïïno käla ki paana kare bäär na en jï løø wï-piny kuya, ni tïïa ïïni nee kïte mo Icriel tugï.

³ Køøre atum marï mana en cer caamï leeŋa piny, ni ö athëëre moa en cer cwïïï ni teeŋa ge piny.

⁴ Ïïni ki jø leny moï bëët, ki wïth juurre moa cäädhö ki ïïni, uuno päänhnhi bäät kïte mo Icriel. Uuni, u cïba cïbö na cam jï lääc paap ki teeŋ weny bëët mo wø cwëëdhö.

⁵ Uuni, uuno päänhnhi yi pwöla; kiper luummögø anø caana. Manøgø bee dwøra, a na Kwäärö Wuuö Jwøk.

⁶ Aani maac ojääŋŋa bäät ŋööm Magöök, ki bäät jø wø bëëdö yïth mïëri moa en bäät naama dwøŋ ni wø bëëdö ni bäŋ gïn lääŋge; køøre nø ŋäcge ŋääö ni bee aani na Wuuö Jwøk.

⁷ « ‹Aani nyeŋŋa na en kur keere tïïa tïïö nee ŋäc dï jiya ma jø Icriel. Køør man ennø, nyeŋŋa na en kur keere ba wëëga päät këët; køøre nø, oput wïth juurre ŋäc ni bee aani na Wuuö Jwøk, Jwø Icriel na en kur keere.

⁸ 'Ba ka adïëri møn, cäŋece öö, ni gïnece tägö møn ni ba kääŋi, ni bee dïcäŋ man cääna kipere en. Luummögø caana aani, a na Kwäärö Wuuö Jwøk.

⁹ « ‹Køøre jø wø bëëdö yïth päänye mo Icriel, geno ci wøk ni cooŋge jap leny bëët, ni tïïcge ge na jer maac, ni beege kööt leny moa therø ki moa døøŋŋø, ka athëëre, ka atummi, ka athøc leny, ki tøøŋi. Japøge otïïcge na jer maac kiper cwiiri abïriiø.

¹⁰ Geno put bëëte ni bäŋ ŋat ci paap këët kuna mööte ki jenni, wala ŋøta jenni, kiper jap leny tïmö na jer maac jïge. Geni thuwø jap jøøa twier geni otwierge. Luummögø caana aani, a na Kwäärö Wuuö Jwøk.

Luum Koony Mano Koony Jiy Mo Othøw Ni Tïïca Ŋöömö Ni Waany

¹¹ « ‹'Ba noo tïme na dïcäŋeca, aano cïpi ki kar bwörö yi ŋööm Icriel kiper Göök. Ni bee yi gool man wø ŋutö ki yie ki jï løø kur tuul-cäŋ mar Naam Acäbö. 'Ba øtjöö manøgø oput cïëgö, kiper mano koony Göök ki lwaae moe yie kaace. Køøre nø, oput cwøl ni Goor Lwaa Göök.

¹² 'Ba jø dhi øt Icriel geno bëëdö ki dwäde abïriiø ni ge køønynya jiy, ni marge tïïc ŋöömö ni waany.

¹³ Geno koony jø paaci bëët, ni ö jø Icrielli ni jïtge ki wödö dïcäŋo nyoodha ajiem mara yie. Luummögø caana aani, a na Kwäärö Wuuö Jwøk.

¹⁴ 'Ba noo tïme na køør dwäde abïriiø moøgø, da cwøw mo kïtha yi tïïc kiper nee ŋöömö tïïcge ni waany. Ni ö møøki dïge ni tïï nee cääthge ni ge raŋŋa dï ŋöömö bäre, ni tïïc møøk nee rïŋ dëët jiy moa no odööŋ wøk bäät ŋøøm nee koonyge.

¹⁵ 'Ba kanyo cige noo cääthge dï ŋöömö, ni näk da dhaanhø mo jïtö ki cöön dhaanhø, eno cïp buut gø ki ŋïï këël kanyo ö jø wø koony bwör noo koonyge ge yi Goor Lwaa Göök.

¹⁶ 'Ba päänya näk nyeŋŋe ocaa ri lwaak oen kaace thuwø. Køøre nø, ŋöömö oputge tïïc ni waany.›

¹⁷ «'Ba ï na wär dhaanhø en, man beeye luumma caan Kwäärö Wuuö Jwøki, ena köö, ni ‹Cwøl teeŋ weny bëët ki lääc paap bëët, ni kööï, ni «Cooŋŋu dëëtu ni ööu ki yïth kwörögø bëët, kiper 'näk mana tïïa kiperu bäät kïte mo Icriel, ni bee 'näk mo dwøŋ mo caala man wø 'näk lääy mo wø cïp no olämme. Uuno cämö ki rïŋö kaace, ni mädhu ki remø.

¹⁸ Rïŋ dëët cwøw moa teek ocammu, ni maathu rem kwääri mo bäät piny, ni ge caala rööm, ka atëëe, ki nyïïrøøe, ki lääc ŋööm Baacan mo olør.

¹⁹ 'Ba yi kar 'näk manøgø na jiiŋŋa kiperu, uuno cämö ki rïŋ mo olør këël kanyo jäŋŋu, ni mädhu ki remø ni meerru.

²⁰ Uuno jäŋ ya akaaŋ mara ki rïŋ okwëëc lääy, ki rïŋ jø wø këëdi ki bäät okwëëc lääy, ki rïŋ dëët cwøw moa teek, ki jø leny bëët.» Luummögø caana aani, a na Kwäärö Wuuö Jwøk.

Kanyo Ö Wuuö Jwøki Noo Dwøk Jø Icriel Karge

²¹ « ‹Aani ajiem mara owëëga bëëtö yïthakic wïth juurre, ni ö wïth juurre bëët ni neenge ajäla mana tïïa ki mana kïtha cera bäätge.

²² 'Ba ki mano täge ki dïcäŋeca këël yi nyïme, jø dhi øt Icriel oŋäcge ni bee aani na Wuuö Jwøk, Jwøk marge.

²³ 'Ba wïth juurre oputge ŋäc ni jø Icriel gïna mak ge ki tøŋ kipere, beeye ki køør raay moge, kiper japa reyø na tïïcge dëëra, ni puta täärnyïma kan ki geni, ni cïba ge ceŋ nyïïmän moge, ni 'näkge ge ko opëëllö.

²⁴ Kwör acoola dëëtge ki køør mana bëëtge ni ge ba waany, ni geno gaa wøk ki ri ciik 'moa, ni puta täärnyïma kan ki geni.›

²⁵ «Kiper manøgønø, man beeye luumma caan Kwäärö Wuuö Jwøki, ena köö, ni ‹Aani, nyïïkwaac Jeekap na mak ki tøŋ oduua, ni cïba cwïnya piny ki geni, ge na jø Icriel bëët, ni mara këëyö kiper nyeŋŋa na en kur keere.

²⁶ 'Ba kanyo duuge yi ŋöömö marge ni ge bëëdö ni bäŋ gïn lääŋge, ni bäŋ ŋat mo wëëk ge lwär, geni dëëtge jäälge jäälö kiper japa reyø na tïïcge dëëra.

²⁷ 'Ba noo duua geni ki baŋ wïth juurre, ni cuuŋa geni ki yïth mïëri mo nyïïmän moge, aani bëëtö mara na en kur keere nyoodha nyoodhø ki rege, ni nëënö nyïm wïth juurre mo thööth.

²⁸ Køøre nø, oputge ŋäc ni bee aani na Wuuö Jwøk, Jwøk marge, kiper gena wëëga mak ki tøŋ ni kïtha ge yïthakic wïth juurre, ni cäŋa ge duu yi ŋöömö marge, ni bäŋgø mo yaa wiiø rege.

²⁹ Aani täärnyïma ba kana këët ki geni, kiper jwïëya kønynya bäät jø dhi øt Icriel.› Luummögø caana Kwäärö Wuuö Jwøki.»